Read pokoot 1 SAMWEL 21 Bible Online

1 SAMWEL 21 - pokoot bible

1 SAMWEL 21

¹Kïwö Daudi kutang Nop wölo mi tïsin Aimelek. Kungwïn Aimelek kïtarok nyinte akïpotönöy, akïtep lö, “Ompö ne tenyonönyi onkït wölï?”

²Kïlenchï Daudi tïsintonay, “Keyokwanïn pöytoghintö, akïlenchanïn, ‘Mekany kunkïtï chi kïyoni koyokinyi.’ Mi wölo komwochan piköchan lö kiryomo.

³Itïngetenyi ne nyo kyomöy? Konanïn makatin mut, anta omisyö anka nyo itïngnyi.”

⁴Kïlö tïsin, “Motïngetanye makatin chay pö osis, kïpoto chay ngotote, ato melö karich piköku kor.”

⁵Kïlö Daudi, “Nyoman melö karich piköchan kor. Tïlilöy kegh chane osis ato mi wölo kïpetöy, ntömïr tya ompö rutogh nyo lata nyï.”

⁶Kutö tïsin Daudi makatinechay ngotote, ompöwölo kimömicha walaka kïpoto makatin cho kipöy tawu Echotyon cho kikïchengo mesa nyo tïlil, atö ketö walaka cho lölöng.

⁷Kimito asisoni mötworinto Saulö akong wölini ompö ngala kitïlilöt nyo kikïkuro Doek nyo pö Edom, nyo kiwowö mösöw cho pö Saulö.

⁸Kïtep Daudi Aimelek lö, “Itïngönyi ngot anta chok ompö yete? Ompöwölo kömwowanïn pöytoghintö lö wïyö lawel, ntömonyorwanye pöroyïn nyo kachenga ngotïnyu anta choke.”

⁹Kïlö tïsin, “Mi ngotpa Kolyat chichay pö Pilisti kipörchinyi mpöghoghyo Ela, kikïnonoghchï sïra akï mi lötu epod,* ato imökenyi icheng, ompöwölo möminye anka.” Kïlö Daudi, “Möminye anka nyo karam lenyoni, chengunö.”

¹⁰Kupertegha Daudi wölo mi Saulö, kïwö kutang wölo mi Akis pöytoghinto Kat.

¹¹Kïlenchï pikachi Akis, “Melö so Daudi nyï pöytoghinto koronete? Nyay kitumo korï lö, ‘Kapar Saulö elpun cho chang, kïpar Daudi elpun cho makïrar.’ ”

¹² Kwotyö Daudi ompö ngalechoni, akuwagh Akis pöytoghinto Kat.

¹³Kïwaghach Daudi otöptanyi akwigh kegh le chepoyï, akïkolkol kukoti kanasyan akïpïstö ngwïlechi kïrökwï tamughyenyi.

¹⁴Kïlenchï Akis pikachi, “Mosïwïyekwanye so lö chepoyï chichï? Kwompö ne tomïtwanïkwa?

¹⁵Olentekwa so ochopan chepoyin atamïtunakwa chichï kuporï chepoynönenyi ompö kanasyantenyan. Melö ngwïnöy chi nyo lata nyï katanyan?”