Read pokoot 1 SAMWEL 24 Bible Online

1 SAMWEL 24 - pokoot bible

1 SAMWEL 24

¹Otini kimïla Saulö ompö poryonay pö pipö Pilisti, kelenchï, “Mitö Daudi surkwen pö Enkedi.”

²Kïwö Saulö nko nyökon 3,000, kïyarata Daudi nko pikachi ompö kongasispa Koghi Ngömïgh.

³Kïwö ntökwit ato kimi akalu kechir ompö or kamas, ato kimito köpön, kïsir Saulö ompö köpönonay. Kichö mi Daudi nko pikachi wölo le ori.

⁴Kïlenchï pikachi nyinte, “Asete nyay kimwa ECHOTYON lö, ‘Otöni punyontengu moriku, ateghchinö nyinte le wölo kemököy.’ ” Kïkantelta Daudi akïmut sïra Saulö kel.

⁵Wölo kusus kegh Daudi ato le löt ompöwölo kamut sïra Saulö.

⁶Kïlenchï Daudi pikachi, “Melö chömöy ECHOTYON aghan kïgh nyo gha ompö Saulö, echotyontenyan, nyo le kïlana ECHOTYON. Kïlenyona möchömönye aparan nyinte.”

⁷Kïlenyona kïsaghsagh Daudi pikachi ompö ngalechï, amelö kichömchï chane kïpar Saulö. Kïweghö Saulö köpönonay akïwö pantanyi.

⁸Tömönye kite kïweghö Daudi köpönonay akïrïp Saulö akïkur lö, “Pöytoghin!” Nyini kiwaghaka Saulö kuros löt, kïkïtïng Daudi ompö konyït

⁹akïlenchï Saulö, “Ompö ne teteranyi ngala pich cho lentöy, ‘Möröy Daudi kïpörinyi?’

¹⁰Kesïwenyi lö ketöninyi ECHOTYON asete morichan ompö köpön, kïlenchanïn piköchan para nyi, wölo machamanye. Olan, ‘Mopöranye echotyontenyan, nyo le kïlana ECHOTYON!’

¹¹Rose apoy, kareranto sïrengu nyï mi ewunyan, kamutan sïrengu, amelö kaparinyi nkïtunö nyu lö möminye ghöyityö nyo otïngetan ompö nyi, amöminye kïgh nyo kolelunyi, kïrkegh yörenyi pöranïn.

¹²Nya kurwokwecha ECHOTYON ani nko nyi, nya kutökwanïn ECHOTYON ghöyityengu, wölo momukanye ntaparinyi.

¹³Kïle ato kimwa pipö köny ompö ngötïnyö lö, ‘Ngwïno ghöyityö pich cho ghach.’ Wölo melö opörinyi.

¹⁴Kengwïn pöytoghinto Israel kïyar ngo? Iminyi irïpöy ngo? Iyonotonyi kukïy nyo kima! Anta kïmïtyan!

¹⁵Nya kïlïkwï ECHOTYON kirwokinte, nyo rwokwecha ani nko nyi, akuros, akungarakanïn kïsörwanïn ompö moriku.”

¹⁶Nyini kiwany Daudi kïmwochï Saulö ngalechï, kïlö Saulö, “Nyi nyoni nya werïnyu Daudi?” Kïlok Saulö.

¹⁷Akïlenchï Daudi, “Iponyi man kïtïlanïn, ompöwölo keghwaninyi nyo karam, aghunyi nyo gha.

¹⁸Keporunyi asete köromnyengu ompö ani, atomelö keparaninyi otini ketönanïn ECHOTYON moriku.

¹⁹Ompöwölo atonyorï chi punyontenyi, kïmöpïstonye kïsatat. Kïlenyona nya kïkoninyi ECHOTYON köromnyö ompö kïgh nyo keghwaninyi asete.

²⁰Konkïtwan ye nyoman lö ilïkunenyi pöytoghin, akïteko pöyunöto Israel ompö nyi.

²¹Wolwolwanïn ye nyu ompö tawu ECHOTYON lö mepörenyinye monechan, akï melö inyorenyi kaynenyan nko nyo pö piköcha.”

²²Kuwalwal Daudi lenyoni. Kïwö Saulö kutang katanyi, kïwö Daudi nko pikachi kutang walay aghïgh köwïngo kegh.