Read pokoot 1 SAMWEL 27 Bible Online

1 SAMWEL 27 - pokoot bible

1 SAMWEL 27

¹Kunan Daudi lö, “Muköy Saulö ntökïparanïn asistanka, nyo mïchini apertan owö koro pipö Pilisti, atökïma mu Saulö kïyaranïn ompö koro Israel achïwïtan nyu nyinte.”

²Kïwö Daudi nko pikachi cho kimi tïkwïl cho le 600 kutang wölo mi Akis wero Maok, pöytoghinto Kat.

³Kïmang Daudi Kat nko pikachi nko monekwa nko Akis. Kimi Daudi nko koruchi kwodeny: Ainoam nyo pö kanasyanta Yesrel nko Apikail nyo pö kanasyanta Karmel nyay kile koko Napal.

⁴Kemwochï Saulö lö kikuperta Daudi kïwö kutang Kat, kïmökïyörisyönye ngat.

⁵Kïlenchï Daudi Akis, “Ato ichinyi kongenyan, ikonante kanasyan akonga nyo mïnïng ompö korengu amang, ompöwölo melö karam amangan kanasyan nyo wow nko nyi.”

⁶Kutö Akis Daudi kanasyanta Siklak, kïlenyona kïpöyit kanasyanta Siklak pöytoghi Yuda nko ye.

⁷Kïmang Daudi koro pipö Pilisti ompö köny akonga nko aro angwan.

⁸Kïwö Daudi nko pikachi akupokyï pipö Kesyur nko pipö Kerisi nko pipö Amalek, ompöwölo chane cho kimöngöy Syur ntökwit Misri kïngata könyisyok.

⁹Kipar Daudi koronay amöpïstönye mïrön anta korka kïsöp akïrang kechir nko tïch nko sïkïröy nko tamasay akïcheng sïro akïmïla wölo mi Akis.

¹⁰Ntökitep Akis lö, “Kewenyi ipar onö?” Kilentöy Daudi, “Kowan apar Nekep* nyo pö pipö Yuda, anta nyo pö pipö Yeramel anta nyo pö pipö Kenin.”

¹¹Kipar Daudi pich lömïs mïrön nko kor, atömömi chi nyo wetöy kïmwotïtoy ompö Kat lö, “Daudi nyo kegh lenyoni.” Kilata nyoni otöp nyo pö Daudi otini kimi koro pipö Pilisti.

¹²Kughan Akis Daudi akunan lö, “Kikerey Daudi nyoman ompö Israel, kïlenyona lïku nyinte mötworintenyan kokay.”