Read pokoot 1 SAMWEL 29 Bible Online

1 SAMWEL 29 - pokoot bible

1 SAMWEL 29

¹Kutuyechï Pilisti lïkoskökwa Apek, kïmang pipö Israel kö pö pögh nyo mi mpöghoghyo Yesrel.

²Kuwer pöytoghi pipö Pilisti cho le mut nko söpïchis cho le 100 nko söpïchis cho le 1,000, kïrïp Daudi lötï nko pikachi nko Akis.

³Kïtep yetïntino lïkos pö pipö Pilisti lö, “Ighöy ne pïchï pö Eprania yi nya?” Kïlenchï Akis chane, “Daudi nyete, mötworinto Saulö, pöytoghinto Israel, akyomitan nko nyinte könyiswechaye löwïr amöminye ghöyityö nyo kyosöchan nyinte kïngata otini kimi nko ani.”

⁴Kïnörekyï yetïntinechay Akis akïlenchï, “Nya kïmïla chichï kanasyantanini kitönönyi nyinte, möwetönye poryot nko acha, ompöwölo muköy kïwaghaka akïporyeghenecha ompö wölini. Muköy lö ne chichï ntökïchomnyö nko echotyontenyi kïpoto ato parecha?

⁵Daudi nyete, nyay kitumchini korï akughönchini kegh lö, ‘Kapar Saulö elpun cho chang kïpar Daudi elpun cho makïrar.’ ”

⁶Kïkur Akis Daudi akïlenchï, “Owolwolan ompö kaynata ECHOTYON lö, kitöpenyi nko ani nyo karam, achöman kepa nko nyi poryonï, ompöwölo möminye ghöyityö nyo kyosöchinyi kïngata otini kingwïnanyi wölo omitan, wölo melö chömöy pöytoghichï walaka.

⁷Kïlenyona mïlena ye nyu ompö kalya atömönörekyö pöytoghichï pö pipö Pilisti.”

⁸Kïlenchï Daudi Akis, “Kaghan ne ye nyo gha? Ne nyo kesöchaninyi kïngata atanye kyotorön opöghisyewunyi nko ye, nyo mömïchininye owan oporyeghö pung pö echotyontenyan pöytoghin?”

⁹Kïlenchï Akis Daudi, “Onkïtön lö metïngetenyinye kigheghchin ompö ani nyonikïny, ilatenyi malaykayanta Tororöt wölo kïrkegh kïlata nyoni, kïkimwa yetïntino lïkos pö pipö Pilisti nyo mötïny lö, ‘Mewetenyinye nko acha poryot.’

¹⁰Kïlenyona inget asïyech tökwoghö aiwö nko mötwori echotyontengu Saulö cho kapka nko nyi.”

¹¹Kïnget Daudi tökwoghö kïmïla koro pipö Pilisti, wölo kïpa pipö Pilisti kutang Yesrel.