Read pokoot 1 SAMWEL 3 Bible Online

1 SAMWEL 3 - pokoot bible

1 SAMWEL 3

¹Kimi Samwel kïpöghisyechini ECHOTYON akuntöghoghchini Eli. Kingörï ngala ECHOTYON osiswechoni, kimömicha sïwïyaghtina cho chang.

²Kimi Eli kïrïwöy konyi nangat akikïrich kïkar.

³Kïmi Samwel kïrïwöy Kö pö ECHOTYON, ato kimi Santuku Muma* akitomönye kemis kitömöwon.

⁴Kïkur ECHOTYON Samwel lö, “Samwel! Samwel!” Kïngitön lö, “Yoy!”

⁵Akurïp wölo mi Eli, akïlenchï, “Anyï ani, ilentenyi ne?” Kïlö Eli, “Mokurinyinye wïyönyi rïwö.”

⁶Kïkur ECHOTYON ngat Samwel, kïnget Samwel akïwö wölo mi Eli, akïlenchï, “Anyï ani, ilentenyi ne?” Kïlö Eli, “Mokurinyinye werïnyu, wïyönyi rïwö ngat.”

⁷Kitomönye kunkïtï Samwel ECHOTYON, ompöwölo kitomönye kungwïnchï ECHOTYON nyinte.

⁸Kïkur ECHOTYON Samwel ngat nyo pö sömök, kïnget akïwö wölo mi Eli, akïlenchï, “Anyï ani, ilentenyi ne?” Kïpköchï Eli lö kichï ECHOTYON nyini kökuröy Samwel.

⁹Kïlenchï Eli Samwel, “Wïyö rïwö, ato kurïnyi, ilenchï, ‘Ngalana ECHOTYON, ompöwölo lïmöy mötworintengu.’ ” Kïwö Samwel kïrï.

¹⁰Kungwïn ECHOTYON, akïkursyö lenyaye pö tagh, “Samwel! Samwel!” Kïlö Samwel, “Ngalana ompöwölo lïmöy mötworintengu.”

¹¹Kïlenchï ECHOTYON Samwel, “Omökan agh kïgh ompö Israel, nyo otyot chi anka tïkwïl nyo lïmöy.

¹²Opuntenan asisoni osïltenan kinyarat nyo kyamwaghan ompö paraku Eli nko katanyi kïngata towunöt ntökwit söröm.

¹³Kyomwochan Eli lö otöninan sitöt konyi kokay, ompö ghöyityö nyo kighwanïn werkachi aki nkït nyinte, wölo mömwochïnye nyinte chane kïpïstö.

¹⁴Owolwolan ye lö, memukonye ghöyityo kö pö Eli ntöketïlilö amöros anta kitötogh kokay.”

¹⁵Kïrï Samwel kïyech, atolapay kïyat kukoti Kö pö ECHOTYON. Akuway kïmwochï Eli sïwïyaghnay.

¹⁶Kïkur Eli Samwel akïlenchï, “Werïnyu!” Kïlö Samwel, “Anyï ani.”

¹⁷Kïlenchï Eli nyinte, “Komwowunyi ne ECHOTYON? Mewïngenanïn. Nya kïtïghinyi ECHOTYON, ato iwïngenaninyi kïgh anka tïkwïl nyo kömwowunyi.”

¹⁸Kïmwochï Samwel nyinte kïgh anka tïkwïl amöminye nyo kiwïnga nyinte. Kïlö Eli, “Nyinte kï ECHOTYON, nya kwigh kïgh nyo sïwïyi lö karam.”

¹⁹Kïyetï Samwel akimi ECHOTYON nko nyinte amöminye ngölyon nyo kimwa nyo kiwö ngwïny.

²⁰Kunkïtï pipö Israel löwïr kïngata Dan nyo mi okumpö löt ntökwit Persyepa nyo mi okumpö tagh lö, Samwel kï werkoyonto ECHOTYON.

²¹Kïtas tagh ECHOTYON kuporï kegh ompö Syilo, wölay kingwïnichineghö Samwel akïngalan tïkwïl. Nyini kingalan Samwel kïter pipö Israel löwïr.