Read pokoot 1 SAMWEL 30 Bible Online

1 SAMWEL 30 - pokoot bible

1 SAMWEL 30

¹Otini kit Daudi Siklak nko pikachi asispa sömök, kichï kikupokyï pipö Amalek Nekep* nko Siklak, kipar chane kanasyante akïpel.

²Kinam kor löwïr akïcheng kïgh anka tïkwïl nyo kimi kanasyan, nyo mïnïng nko nyo wow, amaparcha chi, wölo kimït chane.

³Otini kitïta Daudi nko pikachi kanasyan, kïnyorï kikepel akikenam korukwa nko monekwa.

⁴Kïrir Daudi nko pikachi ntömökïtïngcha owesyö nyo lokyot.

⁵Kikïnam koru Daudi tïkwïl kwodeny: Ainoam nyo pö kanasyanta Yesrel nko Apikail nyay kimïl kile koko Napal nyo pö kanasyanta Karmel.

⁶Kusus kegh Daudi nyoman, ompöwölo kimököy pich kïwiro nyinte koghïn. Kinörekyö chane tya ompö monekwa, wölo kukil kegh Daudi ompö ECHOTYON Tororötïnyi

⁷Kïlenchï Daudi tïsin Apyatar wero Aimelek, “Ipunö yi epod.”* Kwipchï Apyatar Daudi epodnay.

⁸Kïtep Daudi ECHOTYON lö, “Arïpan lïkonï nya? Anyorunan chane?” Kïlenchï ECHOTYON Daudi, “Rïpa chane, ompöwölo inyorunyi aisörunyi pïchay kakïnam.”

⁹Kïwö Daudi nko pïchay le pokolay mut nko akonga kimi nko nyinte ntökwit champilwa Pesor, kudong pikö walaka atoni.

¹⁰Kïtas tagh Daudi nko pich cho le 400 kïrïp pïchay, kudong lötï walaka cho le 200 cho kipöl kwoghyö champilwa Pesor ompöwölo kökikwoghochö.

¹¹Kïnyorchï chi pö Misri wölo le ompölyon, kumït wölo mi Daudi, akutö nyinte makatyan nko pögh

¹²nko makatyan nyo mïnïng nyo pö akwa makany nko makatina sapipun odeny. Nyini kyomisyö, kïsïch owesyö, ompöwölo melö kikikwam kïgh anta gha pögh ompö osis sömök.

¹³Kïtep Daudi nyinte lö, “Ipoyenyi ngo? Aingwïnonyi onö?” Kïlö nyinte, “Ochan chi pö Misri, nyo le mötworinto chi pö Amalek, köpïstanïn echotyontenyan, ompöwölo kyakasan osis sömök cho kewer.

¹⁴Kikipokyicha Nekep nyo pö pipö Keret nko nyo pö Yuda nko nyo pö Kalep akepelacha Siklak.”

¹⁵Kïlenchï Daudi nyinte, “Imukenyi ye imïtanïn wölo mi lïkonini?” Kïlö nyinte, “Wolwolwanïn ompö kaynata Tororöt lö mepöranïnyinye anta itönanïn mori echotyontenyan atamïtïn wölo mi lïkonini.”

¹⁶Kumït nyinte Daudi wölo mi lïkonay, kökitoyechï chane korononi, kimi kwomisïyi akïgheghsïyi akinyolöy ompö chongïn pö pöröw cho kipörunö koro pipö Pilisti nko koro Yuda.

¹⁷Kïpar Daudi chane ato le asïyech kïngata tökwoghö ntökwit mönon. Möminye chi nyo kichïwït, kïpoto pich 400 cho kilang tamasay akïryagh.

¹⁸Kuyokwï Daudi tïkwïn löwïr cho kicheng pipö Amalek akïsörï koruchi kwodeny.

¹⁹Möminye kïgh nyo kipot nyo mïnïng anta nyo wow. Kuyokwï Daudi tïkwïn löwïr cho kikïnam nko monïng tïkwïl

²⁰nko kechir nko tïch löwïr, kïrang pich tuchay kuntaghogha Daudi akïlö, “Chï kï pöröwo Daudi.”

²¹Kungwïn Daudi ntökwitï champilwa Pesor wölo kidong pïchay le 200 kyoghochö kimi nko nyinte. Kïpa pïchay kïtarok Daudi nko pikachi. Nyinte, nyini kirich Daudi pïchay kutakwes chane.

²²Kïlö pich cho ghach akï pkatis cho kipa nko Daudi, “Metöninye chi pïchï pöröw cho kakiyokucha, ompöwölo mapacha nko acha, wölo kitöni korukwa nko monekwa.”

²³Wölo kïlö Daudi, “Merokonye kegh lenyoni werköcho ompö kïgh nyo kökonecha ECHOTYON, ompöwölo köripecha nyinte akutö moricha lïkonay kingwïn kupokyecha.

²⁴Memukonye lenyoni kamwaghakwa, kïchöghchini chi anka tïkwïl kïkarkegh, ato kö chi nyo körip karïn nko omisyö anta nyo köwö poryot.”

²⁵Kïngata asisoni kwigh Daudi ngalechoni kïlïkwï kirurut nyo kïrïpöy ompö Israel nko ye.

²⁶Nyini kit Daudi Siklak, kïchöghchï kongotichi poyi Yuda kareranpa pöröwechay kipörï akïlenchï, “Achï ropöw cho le chikwa cho pö pöröwo pung pö ECHOTYON.”

²⁷Kiyokyï pöröwechay pipö Petel nko pipö Rama nyo pö Nekep nko pipö Yatir

²⁸nko pipö Aroer nko pipö Sipmot nko pipö Estemoa

²⁹nko pipö Rakal nko kanastina pipö Yeramel nko kanastina pipö Ken

³⁰nko pipö Orma nko pipö Porasyan nko pipö Atak

³¹nko pipö Epron nko wop anka tïkwïl wölo kiwesteghö, Daudi nko pikachi.