Read pokoot 1 SAMWEL 8 Bible Online

1 SAMWEL 8 - pokoot bible

1 SAMWEL 8

¹Otini kiyosit Samwel, kutö werkachi kurwokï Israel.

²Kayneto poretye kï Yoel, nyo pö odeny kï Apiya. Kirwoköy chane ompö kanasyanta Persyepa.

³Kimarïpcha werkachi körkeyïntanyi, wölo kipïrchï ropïyen akïcheng asoya amökurwokcha ompö man.

⁴Kïnyoryö poyi pipö Israel löwïr akïpa Rama wölo kimi Samwel,

⁵akïlenchï, “Kiyositunyi, akwanyï mörïpöcha werköku körkeyïntöngu. Kïmökecha pöytoghin le puntonichï walaka.”

⁶Wölo melö kingarak Samwel ompö somötengwa nyo pö pöytoghin, kïlenyona kïsagh nyinte ECHOTYON.

⁷Kïlenchï ECHOTYON Samwel, “Tera ngal löwïr cho mwowunyi chane, ompöwölo melö kataghinyi chane, wölo kataghanïn alïkwan pöytoghintengwa.

⁸Kewunyi ngal cho kighwanïn kïngata otini kyamïtunan chane koro Misri nko nyete le ye, kitaghanïn akïpöghisyechï tororötin walaka.

⁹Kïlenyona terchinö chane aichil chane tya aiporchï chane otöp nyo pö pöytoghin nyo pöytoy chane.”

¹⁰Kïmwochï Samwel pïchay kimököy pöytoghin kïgh anka tïkwïl nyo kimwochï ECHOTYON.

¹¹Kïlö, “Anyï wölo idonokwa pöytoghintenkwa, nömöy monekwa cho le werkö kwip nkarinechi. Kïlïkwï walaka cho pö angoletin, atökuntöghoghchï nkaritinechi.

¹²Kïlöy walaka kïlïkwï yetïntino pich 1,000 nko yetïntino pich tömönut mut nko walaka cho ngorsïyi nko cho le ilï nko cho tongöy kari poryot nko kari nkarinechi.

¹³Chengöy tipikwa kwigh mwowöy cho ngutoy cho onyïn akïlïkwï chïlï akwigh makatin.

¹⁴Chengöy parenikwa cho karamach nko pareni sapipun nko cho pö arol akutö.

¹⁵Chengöy kareranpa taman ompö paghekwa nko sapipune akutö kirwokotichi nko yetïntinechi.

¹⁶Chengöy mötworikwa cho le kor nko mïrön nko chumwak nko sïkïröyikwa akutö kwigh ighisyenyi.

¹⁷Chengöy kareranpa taman nyo pö kyakikwa alïkukwa nyu sekeyichi.

¹⁸Olokyokwa asisoni akwompö pöytoghintenkwa nyo kyokïlchikwa kegh akwane, wölo möterwokwanye ECHOTYON.”

¹⁹Wölo kïtagh pïchay kïterchï Samwel, akïlö, “Ewo! Kïmökecha pöytoghin,

²⁰atökekaracha kegh nko puntonichï walaka, atökïpaytecha akuntöghoghwecha ompö poryot.”

²¹Otini kiter Samwel ngala pïchoni löwïr, kïwö kïmwochï ECHOTYON lenyaye.

²²Kïlenchï ECHOTYON Samwel, “Terchinö chane ngalekwa aikïlchï pöytoghin.” Kïlenchï Samwel pipö Israel, “Wïyö chi anka tïkwïl katangu.”