Read pokoot 1 SAMWEL 9 Bible Online

1 SAMWEL 9 - pokoot bible

1 SAMWEL 9

¹Kimito chi nyo pö Penchamen nyo kikïkuro kaynenyi Kis wero Apiel, wero Seror, wero Pekorat, wero Apia nyo pö ara Penchamen, aki chi nyo le sïkön.

²Kitïng werïnyi nyo kïkuro Saulö, mïrön nyo pïchigh. Akimöminye chi anka nyo pïchigh le nyinte ompö pipö Israel. Ki kogh nyinte kïtïl chi anka tïkwïl ompö Israel.

³Kipotyö sïkïröyi Kis papoto Saulö. Kïlenchï Kis Saulö, “Wïyö nko mötworin akonga atayaratena sïkïröyi.”

⁴Kïpa akuwer komoswo koro Epraim, akuwer koro Syalisya, wölo kimönyorïcha. Kuwer koro Syaalim mönyorïcha. Kïpa kïyarata kuwer koro Penchamen, wölo kimönyorïcha.

⁵Nyini kit koro Sup, kïlenchï Saulö mötworintenyi “Kemïlisyenö atömöpïstö paponyan kunonchï sïkïröy akunanech.”

⁶Wölo kïlenchï mötworintenyi nyinte, “Mi chi pö Tororöt kanasyantanï akï chi nyo kïkonyïtöy, ompöwölo ngal löwïr cho mwoghöy nyinte kïlïku man. Kepe wölini, töptoy muköy kïmwoghwecha wölo kïnyorchini sïkïröyi.”

⁷Kïlenchï Saulö mötworintenyi, “Ato kïpa, kipchini ne nyinte? Akwanyï kiwonyö omisyö amöminye kïgh nyo kitöni chi pö Tororöt. Kïtïng ne?”

⁸Kuyokyï mötworintonay Saulö lö, “Otïngetan ropïyen cho ngörï, otönan chichoni pö Tororöt atökïmwowecha wölo kïnyorchini sïkïröyi.”

⁹(Ato kiwetöy chi köny ompö Israel, kïtepöy ngölyon Tororöt, kilentöy, “Kepe wölo mi pkeghyon.” Ompöwölo chi nyo kïkuro ye werkoyon, kï kikuro köny pkeyghyon.)

¹⁰Kïlenchï Saulö mötworintenyi, “Kemwaghanyi nyoman, nyonö kepe nyu.” Kïpa kutang kanasyan nyo kimi chi pö Tororöt.

¹¹Otini kipustoy kamas kutöngöy kanasyantanay, kuryam nko tipïn cho kipkonöy kïrömöy pögh, kïtep chane lö, “Mi pkeghyon kanasyan nya?”

¹²Kuyokyï tipichay lö, “Owöy, pïn nyinte tawunkwa. Ape lawel ato nyorunö, kengwïn nyinte kanasyantanay, ompöwölo kapa pich kutötö amöros ompö tïkumwok.

¹³Ape nyu lawel onyorukwa nyinte otini kolïtökwa kanasyan, tomökïwö kwomisyö ompö tïkumwok wölo kitötegho amöros, ompöwölo momisïyinye pich kïtomö kungwïn nyinte. Nyoghöy nyinte kusoyönöy amörostö, atolapay kwomisyö nyu pich cho kakïtach.”

¹⁴Kïpa chane kutang kanasyan. Otini kimi kïlïtöy kanasyantanay, kïsïwa Samwel kungwïnöy wölo mi chane, wetöy kutöngöy tïkumwok wölo kitötegho amöros.

¹⁵Kökikïngongchï ECHOTYON Samwel ato le omötu kïtomö kungwïn Saulö lö,

¹⁶“Atotenö ye asïyech, oyokunyi chi nyo ngwïno koro Penchamen, iyil nyinte atökïpayta piköchan pö Israel. Söruno nyinte chane mori pipö Pilisti, ompöwölo kasïwan kichopat nyo tïng piköchan, akikwitï lokekwa wölo omitan.”

¹⁷Otini kisïwa Samwel Saulö, kïlenchï ECHOTYON nyinte, “Nka nyona chichay komwowunyi! Nyinte nyo pöytoy piköchan.”

¹⁸Kïrich Saulö Samwel ompö kukat akïtep lö, “Porwante ka pkeghyon?”

¹⁹Kïlenchï Samwel Saulö, “Ani nyoni, ntaghogha wïyö tïkumwok, ompöwölo omisïyekwa asisete nko ani. Ato mi asïyech omwowunyi ngal lapay cho mi mïkulöwungu, atolapay iwenyi nyu.

²⁰Menonchï sïkïröyiku chay kepotyö osis sömök cho kikuwer, ompöwölo kikïrumï. Ngo nyo mököy pipö Israel tya? Kïpoto nyi nko koto papongu?”

²¹Kïlö Saulö, “Opoyan or nyo mïnïng ompö ortïna pipö Israel, akï mïnïng koncha ompö ara Penchamen, ompö ne nyu temwowaninyi lenyoni?”

²²Kumït Samwel Saulö nko mötworintenyi kïpa kö nyo wow, kyomisyegho akïtïpï nko pich cho konyïtote, pich cho kingata tömönut sömök.

²³Kïlenchï Samwel chïlin, “Ipunö penyay kokoninyi lö, ‘Rora.’ ”

²⁴Kïcheng chïlintonay kïpes akutö tawu Saulö. Akïlö Samwel, “Kakïrorunyi nyoni mi tawungu. Ama, ompöwölo kakïror ntökwitïta otini iomisïyenyi nko to.” Kwomisyö Saulö nko Samwel asisoni.

²⁵Otini kipkono tïkumwok wölo kitötegho amöros kutöngu kanasyan, kïngalan Samwel nko Saulö ompö kö parak.

²⁶Nyini kiyech, kïkur Samwel Saulö ompö kö parak akïlenchï, “Ngeta, atewechinö kegh.” Kïnget Saulö akïwö nko Samwel kutang sany.

²⁷Otini kiröytö kwit sörömu kanasyan, kïlenchï Samwel Saulö, “Mwochinö mötworintengu kuntagha.” Kïwö mötworintonay. Kïlenchï Samwel Saulö, “Ghyongenö yi nyo le nyi kite, atomwowun kïgh nyo kamwa Tororöt.”