Read rendile Mattaayo 18 Bible Online

Mattaayo 18 - rendile bible

Mattaayo 18

¹Chirraakka abatti Yeesso itimiyye, “Dakhi goobi Waakh ka ayyo ꞌdooꞌdi addan tuumman iween?” worsatte.

²Weeloo rucchul wahe, goycho toolliche.

³Wihi us yidah, “Rume atin icheeka, sammata atin iurgiyine, iꞌdi nyaakhuti rurrucchul iitaahan, koloo kalday laka dakhi goobi Waakh ma gessaan.

⁴Maantaka eti tuummane iꞌdi weeluu isnuglaache, dakhi goobi Waakh ka weyti weenyahe.

⁵“Eti tuummane weeloo iꞌdee jeenteti us abattiteey iyahuu martiiste, ani imartiiste.

⁶“Iꞌdaasenyi chiꞌ etoo ꞌdooꞌdaar irummeesti kichokoo tarraantarricho wihi ideefo a usuhi daddaabti buurenye gurnaan lakatumo lukhum lakahido, beyti buurenye hoge ka bicche khaataan.

⁷Jeenteti wahanyeyyohi enenyet uskeel kalugꞌduu, ꞌdooꞌdi harrata sinati sugto eenna a buure! Wahanyeyyoha a yamiitiine, iꞌdaasenyi eti icho leeyamiitiin sinati sugto eenna a buure!

⁸Chiꞌ dahantaah ommos luhtaah uskeel kaaluguꞌddo gooche rog. Atihi dahan laaye ommos luh laaye jiroti jirtuu imassan ꞌhesso deefta, atihi dahano lammacho ommos luhlo lammacho khabto ꞌdabi armaanjireen lakalugꞌdo ka.

⁹Chiꞌ issaah uskeel kaaluguꞌddo la, bihiche rog. Atihi issoo laaye jiroti jirtuu imassan ꞌhesso deefta, atihi indo lammacho khabto, meessi ꞌdabi armaanjireen lakaalugꞌdo ka.

¹⁰Taba nyaakhuti rurrucchul aꞌdarraawina. Iꞌdi tahe wihi an atin iadeeh, herti Waakhe goobi Waakh ka icho yuubisso kol dakkhan goobi Waakh ka fool Aabbaheey a agarta.[34]

¹²“Bal waha kamalda. Ersinki iiyti kudoowe khabo, naffoo kabaabe, mehe yeela? Ersinkaas iiyti tomon saagaal ichoow saagaale hal yaakhtaayi a kataba, irta naffi kaldache baabe yowta menya?

¹³Chirri us ꞌhele la, naffaas kalday weyti kahamaada iiyti kootte tomon saagaal ichoow saagaalenye ibaabin ka laka.

¹⁴Aabbaheeyki serey jiro laka saggaas u, nyaakhuta rurrucchul ichehi koo kalday laka baabo ma ꞌdoono.

¹⁵“Chirri etaahkoo koo Kiriistee uskeeloo kiyeele, iiro saggi us uskeel kiyeele icheeke, lammatiin on la a eheetti. Chirri us kidaage, etaas a sooholisse.

¹⁶Iꞌdaasenyi chirri us kidaagiwwaaye, etoo ommos et lammatoo addane Kiriisto rummeysatte khaato, leeyyeeda, ꞌdee et lammataas ommos et seyyahtaas gar a laabto.[35]

¹⁷Chirri us ꞌdooꞌdaas sookute, urur Kiriisto icheek. Chirri us urur Kiriisto laka sookute, iꞌdi eti Waakh igaran ommos iꞌdi eti suujenye kooddi goocho iekkaacha.

¹⁸“Rume atin icheeka, walahbaaw at harra ka hiddo, Waakh laka goobiis ka a hide. Wihi at harrata ka furto la, Waakh laka goobi Waakh ka a fure.”

¹⁹“Toro wihi an atin iadeeh, chirri harrata ka et lammatoo wihi iche Waakh daahto iskadaagte, Aabbaheeyki serey jiro wahaas iche daahte a siicha.

²⁰Wihi tahe inti et lamma ommos et seyyahe jeenteti icho abattiteey iyahiin u kakulmeen, an goycho a kijira.”

²¹Yomboka Beetero Yeesso iyimiyye wihi us worsate, “Kamur, chirri walaaleeykoo uskeeloo iyeele, kol geeddoh uskeel ikakuto? Kol teeba ikakuta?”

²²Yeesso wihi us ilaabe, “Wihi an kiadeeh, kol teeba menye, iꞌdaasenyi kol tomon teeba ichoow teeba ikakut.

²³“Iyookkoka dakhi goobi Waakh a iꞌdi karnati ilbooyyetiis ebba mogti us kakhabe ichehi soogutto ꞌdoono.

²⁴Chirra us worsan sookhabte ka, koo mogti weyti buurenye, jirtuu dakkhan igunnamin[36] khabo liikeene.

²⁵Mog gunnaan ma yabuuꞌd gone, kamuriis amuri usu ichoow makhaabassiis ichoow nyaakhutiis ichoow wihi us khabo tuumman lakoororicho, ꞌdee mog lakaguto bahche.

²⁶“Ilbooy kamuriis ortiis ka jilbo il kaguꞌdde, hawwaaste, ‘Kamuraaw, isug on, amba mogtaah tuumman kisoogutaa,’ iyidah.

²⁷Kamuri ilbooyaas la uur isoonugleeste, mog leeꞌdiiche, toro la ꞌdiiche irte.

²⁸“Iꞌdaasenyi ilbooyaas uus bahe, ilbooyoo addane wahalhiisenye mogti chilimmeti eti orrah kudoo hil haaggiche laguto kakhabo ꞌhele, kur khabte, hude, ‘Toolla kofche mogteey soogut,’ iyidah.

²⁹“Ilbooyaas wahalhiise luhlo khabte, hawwaaste, ‘Isug on, amba mogtaah kisoogutaa,’ iyidah.

³⁰“Iꞌdaasenyi ilbooyaas us mogtiis khabo sugnaan leeꞌdiiꞌde, khaate jeela gesse, ichoowka maanti us mog sooguto.

³¹Chirri ilbooyyeti addan wihi yitah agarte ka, weyti bolkheene, irteene, kamuricho wihi yitah tuumman icheekeen.

³²“Kamuricho ꞌdeerka ilbooyi mogtiis khabo wahe, wihi us iyidah, ‘Atiha ilbooyi suuje, an jeenteti at ihawwaassatte u, mogteeyti ati khabto tuumman a kileeꞌdiiche.

³³Saggaas maanta an uur kisoonugleesde u, at laka ilbooyaas wahalhaahe uur ma inugleysatti?’

³⁴Kamuriis hol ka, dahanohi ꞌdooꞌdi usu jeela ka sina kawaaricho gesse ichoowka maanti us mog tuumman sooguto.

³⁵“Sammata at walaalaah uuraah ka tuum uskeel ikakutin, Aabbaheeyki serey jiro laka, etiimba iꞌdaas on yeela.”