Read rendile Mattaayo 21 Bible Online

Mattaayo 21 - rendile bible

Mattaayo 21

¹Chirra icho ilkerengeetti weene Yeerusaleem isoodowwaateene, ilkerengeetti Beꞌdifaage Hali Geeyohi Oolif haggee yimaateen ka, Yeesso abattitoo lammee ergate.

²Wihi us icho iyidah, “Ilkerengeetti ortiin jirto irda, chirraas on eheli hidane, inkuraarruhiis hagga tololo ꞌhessaan. Lammacho soofura ani ikeena.

³Chirri etoo wohoo atin iidah, wihi atin itadeehiin, Kamure ꞌdoona toolla kofcheeda on sooerga.”

⁴Waha la a yitaaheene ꞌdee wihi eti Waákh íyeyyeedo ka lacheeke labuuhicha.

⁵“ꞌDooꞌdi ilkerengeetti Saayon yaal mehe itadeeh ya, ‘Yeya, karnatiin a yamiite, ulla a etoo samacchaare, inkuraarru sookora, weeli ehele sookora.’ ”[40]

⁶Abattiti iratte, wihi kootte Yeesso yeela iyidah yeesse.

⁷Ehel ichoow inkuraarruhiche ba sookhaateene, kabuuꞌddeticho inkuraarru kagaadeene, Yeesso koorronte.

⁸Ururi buure kabuuꞌddeticho jit kagolge, gaasoo la seytohi geeyoot soogooche jit kagolge.

⁹Ururreti ortiis raahto ichoow ti ꞌdubiis raahto ba riirte wihi iche tidah, “Inam Dawuud a lakoolicho!” “Waakh ki magahi Kamur kayamiit a imaale!”[41] “Waakkheenki inti weyti saraat kijiro koolinno!”

¹⁰Chirri Yeesso ilkerengeetti weene Yeerusaleem gele ka, ilkerengeet tuumman kowdo kalday titahye, enenyet, “Kan a ayyo?” esse.

¹¹Urur la wihi us laabe, “Kan a eti Waákh íyeyyeedo, Yeesso layadeehe, ilkerengeetti Naasarete boroofenhi Gaalilaaya kajirto kayimiy.”

¹²Yeesso uranti minki Waakhe buure gele, ꞌdooꞌdi intaas ka walah gatti ichoow ki walah ororicho tuumman rihe. Komborohi balballaaddane ꞌdooꞌdi chilimmeti ilassi addan iskadooricho leeyahe ichoow komborohi ꞌdooꞌdi kutukuurrug ororsati ba rerreeche,

¹³wihi us iyidah, “Wihi chiiran, ‘Minkeey minki weysiite layadeeh,’[42] iꞌdaasenyi, ‘inti ꞌdooꞌdi hatto leh kadagti,’[43] iche kayeesseen.”

¹⁴ꞌDooꞌdi indo laa ichoow ꞌdooꞌdi luhlo laa Yeesso uranti minki Waakhe buure ka liikeene, ulla icho samaache.

¹⁵Iꞌdaasenyi chirri kuhaaniyyohi wewween ichoow tagaammeti amurre girmohi us yeele argeene, toro nyaakhuti uranti minki Waakhe buure ka riiro, “Ínam Dawuud a lakoolicho,” essi daageen ka, weyti holloween.

¹⁶Wihi icho Yeesso worsateen, “Wihi nyaakhuta essi ma daagto?” Yeesso wihi us ilaabe, “Aa, a daaga. Atin waha injire ma soomin a? “ ‘Afassi ꞌdaaꞌhum ichoow nyaakhuti rurrucchul ba koolohi icho mujjum kikoolichaan a abisse.’ ”[44]

¹⁷Yeesso la kuhaaniyyohi wewween ichoow tagaammeti amurre katabe, ilkerengeet kabahe, ilkerengeetti Beꞌdaaniya irte, ibeenkoo intaas barye.

¹⁸Baryo ka geedda us ilkerengeetti weene Yeerusaleem inokhti Yeesso ankaye.

¹⁹Chuꞌus geeyoo fiige jit ꞌdossiis katoollo arge ka ibuje. Iꞌdaasenyi walah us kaꞌhele mele, seeb on menye. ꞌDeerka geey fale, wihi us iyidah, “At ba toro jirtuu tuumman gurnaan deliwwaayta.” Geey chirraas on angage.

²⁰Abatti chirri iche wahaas agarte ka, weyti girmeysatte, “Geeyi fiig saggoh dowwa on iangage?” worsatte.

²¹Yeesso wihi us ilaabe, “Rume atin icheeka, chirri atin Waakh kakhuuftaane, uurlammaal la ikhabin, wihi geeyi fiig layeele kalday ma yeessaane, iꞌdaasenyi a geeddi atin hala laka, ‘Nyaam beyti buure goya iskaluguꞌd,’ itadeehiine, iꞌdaas la tateeh.

²²Chirri atin Waakh rummeysattaan, walahbaaw atin weysi ka daahteen, a ꞌhessaan.”

²³Yeesso uranti minki Waakhe buure gele, geedda us ayti Waakh enenyet abcho, kuhaaniyyohi wewween ichoow ewweenki Yaꞌhuud ba Yeesso iyimaateen. Wihi icho worsateen, “Antohi at wahanyeyyoha kahaaggisso a weheeyya? Antoha la ayyo kisiiche?”

²⁴Yeesso wihi us ilaabe, “An laka wohoo kaldaye atin worsada. Chirri atin isoolaabteen, ani antohi an khabo, an wahanyeyyoha dakkhan kahaaggicho, a weheeyya a atin isoocheeka.

²⁵Yoohanahi Enenyet Baattissiyo, antohi us enenyet kabaattissiyo, intoh kayimaateen? Waakhe kayimaateen, bal enenyet?” Iskaleehawwoocheene wihi icho isiyidaaheen, “Chiꞌinno, ‘Waakhe kayimaateen,’ nadeeh, mehe inno iyadeeh ya, ‘A iꞌdoh ꞌdeerka irummeysanna?’

²⁶Iꞌdaasenyi chiꞌinno, ‘Enenyete kayimaateen,’ nadeeh, ꞌdooꞌde karoorra, a mehe icho tuumman Yoohana eti Waákh íyeyyeedo ikhaataan.”

²⁷ꞌDeerka wihi icho Yeesso ilaabeen, “Nah ma garanni.” Ulla ꞌdeerka iiyeyye, “Ani laka antohi an wahanyeyyoha kahaaggicho ma atin isoocheeko gon.”

²⁸Yeesso wihi us ꞌdooꞌdaas iyidah, “Hawweesa kamalda bal. Makhaabaloo ínam lamma khabe, inanki weene iirte, ‘Inankaaw, maalinka iro goseenki sabiib khut,’ iyidah.

²⁹“Wihi us ilaabe, ‘Ma irdi,’ toro iꞌdaasenyi yomboka maliis urgiyiche, gos goya irte.

³⁰“Makhaabal toro inankiiski addan iirte, wihi us iyidah, ‘Inankaaw, bal iro, goseenki sabiib khut.’ Ínam la wihi us ilaabe, ‘Ayye, aabba, amba irda,’ iꞌdaasenyi gos ma iran.

³¹“Yeelataas lammache, koh wihi aabbahicho yeela iyidah yeele?” Wihi icho ilaabeen, “Ki ween.” Yeesso chirraakka wihi us iyidah, “Rume atin icheeka, ꞌdooꞌdi inno ꞌdooꞌdi uskeel leh nadeehe, iꞌdi maanta ꞌdooꞌdi kooddi goocho ichoow malaayeyyee, icho ortiin dakhi Waakh gela.

³²Iꞌdi tahe Yoohanahi Enenyet Baattissiyo a atin iyimiyye ꞌdee jiti fissan atin tusa, atin la usu ma rummeysanne, iꞌdaasenyi ꞌdooꞌdi kooddi goocho ichoow malaayeyyo, iche usú rummeesté. Inkoo atin wahaas tuumman agarteen laka, yomboka uskeeliin ma ꞌdiinne, usu ma rummeysan.

³³“Mammahtoo addan dagansada. Etoo gos lehe geeyohi sabiib gosiis goyaka il gesse a jire. Gos la oot kamarche inti gurnaanki sabiib lakayabti khute. Koondihi deere eti gos yaakhicho fiddiyo laka dise. ꞌDeerka gosiis lakireeste, ulla iloo deer sulhaal kiirte.

³⁴Maanti ibeenki gurnaan lagurti yitah ka, eti gos leh falfayyohiis ꞌdooꞌdi gos kireeste iergate, gisi gurnaankiis yowte.

³⁵“ꞌDooꞌdi gos kireeste ilbooyye khabte, koo jaheene, koo la yigaaseene, ki seyyahnaatteet la dagah kachibeen.

³⁶ꞌDeerka ilbooyyetoo addane wihi oraat kiittaawe icho iergate. ꞌDooꞌdi gos kireeste la wihi us ilbooyyeti oraat yeele on taas laka yeele.

³⁷ꞌDaꞌddaboka inankiis icho iergate, ‘Rumanka inankeey ꞌdee a inkaanyitta on,’ yidah.

³⁸“Iꞌdaasenyi ꞌdooꞌdi gos kireeste uus icho ínam argeen, mehe isiyidaaheen ya, ‘Ki dahal leh kalla. Kaaleya a nigaase, ꞌdee dahalhiis a khaatanni.’

³⁹ꞌDeerka khabteene gosi sabiib khariis iseyeene, yigaaseen.

⁴⁰“Maantaka chiꞌ eti gosi leh yimiy, ꞌdooꞌdaas gos kireeste iꞌdoh yadeeh?”

⁴¹Wihi icho ilaabeen, “ꞌDooꞌdaas sussuuje jiti suuje ka a bakkicha, ꞌdee ꞌdooꞌdoo addane mujjumenye maanti gurnaan lagurti gisi gurnaankiis siicho gos siicha kireesta.”

⁴²Yeesso wihi us icho iyidah, “Atin Chiirnaanneti Waakh ka waha a soonteen menya? “ ‘Daakki ꞌdooꞌdi minan diso ꞌdiiꞌde, iche tirrinki dagaheete min tiiro yitah. Kamure waha yeele, indoheen ka la weyti haagganyahiin.’[45]

⁴³“Maantaka wihi an atin icheeko, dakhi Waakh a atin lakakhaata yaafti gurnaanki Waakh ꞌdoono desso lasiicha.

⁴⁴Eti tuummane daakka sartiis kakufe, a jejjeba, iꞌdaasenyi chirri daakkaas etoo kasoodihe, etaas a urkaha.”[46]

⁴⁵Chirri kuhaaniyyohi wewween ichoow Farissaayo mammaho Yeesso daageen ka, saggi us woricho ikaayyeede garteen.

⁴⁶Jiti iche Yeesso kakhabatti yowatte. Iꞌdaasenyi urure karooraan. A mehe enenyet Yeesso eti Waákh íyeyyeedo ikhaate.