Read rendile Mattaayo 25 Bible Online

Mattaayo 25 - rendile bible

Mattaayo 25

¹Yeesso toro wihi us yidah, “Maanti Inam Aadam soonokhti, dakhi goobi Waakh a iꞌdi albehoo tomonenye taassicho khaatte, eti min disti or kadowo.

²Albeha chane a ꞌdalame, chane la a khara.

³Chanti ꞌdalammee taassicho a khaatteene, iꞌdaasenyi subakki geeyi oolife taa lakachibo ma siꞌdan.

⁴Iꞌdaasenyi chanti kharayyee, khulaammeti subakki geeyi oolif kijiro ichoow taassicho siꞌdatte.

⁵Eti min disti soomalmale, albe tuumman yuufe, urꞌdumme khaatte.

⁶“Naanokhoka, etoo riire wihi us yidah, ‘Eti min disti kallaaye, kaha or a kadowno.’

⁷“Albe ꞌdeerka kahe, tooba taahiche sookorisse.

⁸Chanti ꞌdalame, wihi icho chanti kharayyee iyidaaheen, ‘Taasseenyo a jitaane, subakkiinkoo geeyi oolif nah siicha.’

⁹“Icho la wihi icho ilaabeen, ‘Mele! Subah ma inno yaakho, nyaama ꞌdooꞌdi subah ororicho iirda, subah kasoogadda.’

¹⁰“Iꞌdaasenyi chirra icho irteene subah soogattaan, eti min disti yimiyye, albehi kharayyeenye kootte subakkoo yeere soositte la min leegele, daawti mindischo leegele. Afaf la lasoohide.

¹¹“Yomboka albehi addan laka yimiyye, ‘Kamuroow! Nah fura,’ yidaaheen.

¹²“Iꞌdaasenyi wihi us ilaabe, ‘Rume atin icheeka, an ma atin gardi.’

¹³“Maantaka toorribda, a mehe maan ichoow sahaꞌd ma garattaanee.

¹⁴“Toro dakhi Waakh a iꞌdi etoo sulhaal irti. Bowꞌdayyohiis wahe, kooba wihiiskoo dahan gesse.

¹⁵Koo ugar[55] chan chilimme buuhto siiche, koo la ugar lamma chilimme buuhto siiche, koo la ugartoo kaldaye chilimme buuhto siiche. Ugare ba la chilim alif chan ꞌdahabe khabta. Ebba la geeddi us yabuuꞌde dahan gesse, ꞌdeerka sulhaassiis irte.

¹⁶Ki ugar chan chilimme dahan lagesse, chilimmetaas khaate hil kahaagsate, ugar chan addan kaꞌhele.

¹⁷Ki ugar lamma chilimme khabe laka lamma addan kaꞌhele.

¹⁸Iꞌdaasenyi ki ugartoo kalday ꞌhele, a khaate one, lum khute, chilimmeti kamuriis dahan gesse kalugꞌde dagche.

¹⁹“Inkoo geeddi deer labarye ka, kamuri ilbooyyetaas soonokhte, ebba wihi us chilimmetaas kahaagsate worsate.

²⁰Ki ugar chan chilimme ꞌhele, wihi addane chane sookhaate, wihi us yidah, ‘Kamur, at ugar chan chilimme dahan isoogelisse. Yey, chan addane ꞌhele.’

²¹“Kamuriis wihi us ilaabe, ‘At weyti haaggisse! At rumanka a ilbooyi haaggane toro lakakhuufo! At wihi rucchule dahan lakisoogesse ka laka a lakaakhuufa gone, wihi ittaawenye kiweynaacha. Kaale kamuraah hamaadiis leegisam!’

²²“Ki ugar lamma chilimme khabe laka yimiyye, wihi us yidah, ‘Kamur at ugar lamma chilimme dahanteey soogelisse. Yey, lamma addane ꞌhele.’

²³“Kamuriis wihi us ilaabe, ‘At weyti haaggisse! At rumanka a ilbooyi haaggane toro lakakhuufo! At wihi rucchule dahan lakisoogesse ka laka a lakaakhuufa gone, wihi ittaawenye kiweynaacha. Kaale kamuraah hamaadiis leegisam.’

²⁴“Yomboka ki ugartoo kaldaye chilimme khabe yimiyye, wihi us yidah, ‘Kamur, an saggi at bacchaara ka uur idaayantahe a garda. Inti at ilmo il ikagelinne gurnaan kayowatta, inti at ilmo il ikataaꞌhin la golol kayowatta.

²⁵Jeenteti an ikaarooruu, ugarti kaldaye chilimme at dahanteey soogelisse, a khaate harra goya kadagche. Yey, wihi wahaahe kallaayo.’

²⁶“Kamuriis wihi us ilaabe, ‘At a ilbooyi suujenye toro seyꞌho leh. At saggi an wihi weheey ieheynan ikhaato, toro la gosi an ikhutin ka gurnaan iyowdi a garatta menya?

²⁷Incheenka kootte chilimmeteey baangi gelissa, ꞌdee chaꞌan soonokhde ka chilimmeteey ichoow wihi iche desse ꞌhela.

²⁸“ ‘Ugartaas kaldaye chilimme ilbooyaas kakhaata, ilbooyi ugar tomon chilimme khabo siicha.

²⁹A mehe eti wihi dahan lagesse mujjum woywoye a liikakhaya ichoowka wihi us khabo buuraataan. Iꞌdaasenyi eti wihi dahan lagesse mujjum iwoywoyin, wihi us khabo laka a lakakhaata.

³⁰Maantaka ilbooya marahe indigir laa mugꞌdihi ginnayyo yaalliin iseya. Intaas ka enenyet a ooya, toro la bolokh ka ilko iskaroba.’

³¹“Maanti Ínam Aadam herti Waakh khabaayi miigtiis leesoonokhti, kombortiisti antoote karnatoote koorronta.

³²Ulla ꞌdooꞌdi harra tuumman ortiis ka a kulmicha enenyet seley saaha saggi ersim iiy ichoow riiyyo seley isaahuu.

³³ꞌDooꞌdi fiffissan ankiiski miigeete gessa, ki addan la ankiiski gurro gessa.

³⁴“Karnat ꞌdeerka wihi us ꞌdooꞌdi ankiiski miigeet toollo iyadeeh, ‘Kaaleya, atinhi Aabbaheey atin imaale, goobi Waakhe atin liiabbire, uus harra lasoouume atin muꞌdantahiin gela.

³⁵Iꞌdi tahe an ankaa a khabe atin la igoollisseen. Sugub a khabe, atin la sugub ibihisseen. An iꞌdi eti yeelane eheete atin la a imartiisatteen.

³⁶Murukhe eheete, atin la gaad ikoorisseen. A khannaneete, atin la mujjum iwoywoyteen, jeela a kijire atin la a isooyeyteen.’

³⁷“ꞌDeerka ꞌdooꞌdi fiffissan wihi us soolaabo, ‘Kamur, maantoh atihi ankaa khabto kiagarre kigoollinne, ommos maantoh atihi sugub khabto kiagarre sugub kibihinne?

³⁸Maantoh atihi iꞌdi eti yeelane kiagarre, kimartisanne? Ommos maantoh atihi murukhe kiagarre gaad kikorinne?

³⁹Toro la maantoh atihi khannan kiagarre kisooyeyne? Ommos maantoh atihi jeela kijirto kiagarre kisooyeyne?’

⁴⁰“Karnat la wihi us ilaabo, ‘Rume atin icheeka, wihi atin ꞌdooꞌda irummeeste wohoo liikoogeynan iyeesseen, a iꞌdoo atin ani iyeesseen.’

⁴¹“ꞌDeerka wihi us ꞌdooꞌdi ankiiski gurro kijiro iyadeeh, ‘Nyaama ikataba, atinha falan, ꞌdabaas armaanjireene Waakh Seytaan ichoow herti Seytaan ba iyeele kachimmama.

⁴²Iꞌdi tahe an ankaa a khabe atin la ma igoollin, sugub a khabe atin la sugub ma ibahin.

⁴³An iꞌdi eti yeelane eheete, atin la ma imartiisan, murukh a eheete atin la gaad ma ikorin, a khannaneete jeela kijire, atin la ma isooyeyin.’

⁴⁴“Icho la wihi icho ilaabaan, ‘Kamur maantoh atihi ankaa khabto ommos sugub khabto ommos iꞌdi eti yeelane eheete ommos murukh eheete ommos khannaneete jeela kijirte kiagarre, kigargaariwwaayne?’

⁴⁵“Ulla ꞌdeerka wihi us ilaabo, ‘Rume atin icheeka, chirri atin ꞌdooꞌdeeykaar wohoo liikoogeynan gargaariwwaayteen, a iꞌdoo atin ani igargaariwwaayteen.’

⁴⁶“ꞌDeerka ꞌdabi armaanjireene goya irtaane, iꞌdaasenyi ki fiffissan jiroti jirtuu imassanne ꞌhela.”