Read rendile Mattaayo 27 Bible Online

Mattaayo 27 - rendile bible

Mattaayo 27

¹Baryo ka kuhaaniyyohi wewween ichoow ewweenki Yaꞌhuud tuumman Yeessohi layagiis goocheen.

²Hidhideene, khaateene, Bilaatohi gaafanee dahan gesseen.[57]

³Chirri Yuudahi Yeesso ꞌdub gooche saggi Yeesso liihukkumo omoot liikagooche arge ka, weyti ejer istowe. Chilimmeti goorat lahaageete tomon seyyahe sookhaate, kuhaaniyyohi wewween ichoow ewweenki Yaꞌhuud ikeene.

⁴“An haꞌdaabe gele, a mehe an eta wohoo iyeeline atin ikeene, diiggiis gele,” yidah. Wihi icho ilaabeen, “Wahaas walah icho nah iyahiin mele! Ati on iꞌdi at tadeeh dah.”

⁵Yuuda ꞌdeerka chilimme minki Waakhe buure goyaka khube, ꞌdeerka irte, geeyoo iskasoolooꞌdiche, isyigis.

⁶Kuhaaniyyohi wewween la chilimme khaateene wihi icho yidaaheen, “Amurre ichoow chilimmetane ugarti minki Waakhe buure lakalugꞌdo ma israahaan, iꞌdi tahe a chilimmeti diig.”

⁷ꞌDeerka saggi iche chilimme ikhaatto gosoo etoo ꞌdiryo haaggicho leeyahe kasoogatto goosse, ꞌdee gos eti yeelane yumuy lakahawwaala.

⁸Jeentetaase intaas ichoowka uliba laka, magahiche Gosi Diig liiyadeeh.

⁹ꞌDeerka wihi eti Waákh íyeyyeedo Yeeremiya layadeeh ka lacheeke labuuhiche. “Chilimmeti lahaageete tomon seyyahe khaateen, a gatoti ꞌdooꞌdi Issiraayel igoochee,

¹⁰iꞌdi Kamur ani iyidah u, chilimmetaas khaateene, gosi eti ꞌdiryo haaggicho kasoogatteen.”[58]

¹¹Yeesso geeddaas ba Bilaatohi gaafanee ortiis tolossate, gaafana la wihi us worsate, “Karnati Yaꞌhuud a ati?” Yeesso wihi us ilaabe, “A rum, a iꞌdaas at elatti on.”

¹²Chirra kuhaaniyyohi wewween ichoow ewweenki Yaꞌhuud Yeesso cheektaan, us walah us ilaabe mele.

¹³Bilaato ꞌdeerka wihi us worsate, “Waha icho kaacheektaan ma daagto?”

¹⁴Iꞌdaasenyi Yeesso walah us laabe mele, yeedoo kalday laka ma ilaabine, ichoowka gaafana weyti girmeeste.

¹⁵Hugunki gaafana ka, daawti Baasakka ka etoo hidane urur usuhi lasoofuro soobahsate iche soofura.

¹⁶Maantaas la etoo weyti jeenteti suujoonkiis u lagarti Barraba layadeehe hidan, a jira.

¹⁷Inkoo ꞌdeerka icho urureen ka, Bilaato wihi us icho worsate, “Ayyo atin isoofura ꞌdoontaan, Barraba bal Yeessohi Ki Lasubhe layadeeh?”

¹⁸A mehe Bilaato saggi icho jeenteeti kalꞌdarri on u Yeesso dahanohiis igesseen a garta.

¹⁹Bilaato komborti enenyet lakahukkumo kafiddiyaayi, makhaabassiis farniin isooeregte, “Etaas uskeeloo iyeelin wohoo rucchul laka ayeeline, diiggiis agelin. Iꞌdi tahe ibeenkate issilloteey ka jeentetiis u weyti sina a ikawaartee,” itidah.

²⁰Iꞌdaasenyi kuhaaniyyohi wewween ichoow ewweenki Yaꞌhuud ba urur malicho urgiyicheene ꞌdee Barrabahi lasoofuro Yeesso la layagiis a daaheen.

²¹Gaafana wihi us urur worsate, “Reera lammatiis, koh atin isoofuro ꞌdoontaan?” Wihi icho ilaabeen, “Barraba.”

²²Bilaato wihi us worsate, “ꞌDeerka Yeessohi Ki Lasubhe layadeeh iꞌdoh idaahe?” Icho tuumman la wihi icho ilaabeen, “Massalaaba kakaah.”

²³Bilaato wihi us worsate, “A iꞌdoh? Mehe suujenye yeele?” Iꞌdaasenyi geeddi kootteet ꞌdirihiis riireene, “Massalaaba kakaah!” yidaaheen.

²⁴Chirri Bilaato saggi us wohoo iyeeline iꞌdaasenyi urur weyti iuskulaate il ibaabiicho arge ka, bicche on khaate, urur ortiis ka dahano dikhte. Wihi us yidah, “An eta wohoo rucchul laka iyeelin diiggiis ma gelo, khaata iꞌdi atin tadeehiin daha.”

²⁵Enenyet tuumman wihi us ilaabe, “Diiggiis nah ichoow nyaakhuteenyo a nah fuulo!”

²⁶Bilaato ꞌdeerka Barraba icho isoofure. Iꞌdaasenyi amuri Yeesso lakadoocho toro massalaaba lakakaaho bahche.

²⁷ꞌDeerka iskar gaafana Yeesso khaatte, minki buurenye gaafana igelo geesse, rabittoo iskareet tuumman la Yeesso khaarisse.

²⁸Darfohiis kabihisse, kabuuꞌdoo muggee iꞌdi karnat u korisse.

²⁹ꞌDuuboo kudaheet iskayuubte matah korisse, wussoo dahantiisti miigeet gelisse, ortiis ka jilbo il kaguꞌdubte kachaaratte, “Karnati Yaꞌhuudoow, jiroti deer ꞌhel!” idowte.

³⁰Hanjuf kaattufte, wussaas kakhaatte matah kaajjahte.

³¹Inkoo icho kachaarteen ka, kabuuꞌd kabahcheene gaaddiis gesseen. ꞌDeerka leebaheene woyeen massalaaba kakaahaanee.

³²Chirra icho bahaan ka, etoo ilkerengeetti Kureene magahiis Siimon layadeeh ꞌheleene, massalaaba Yeesso sinnaan ihosseen.

³³Meessoo Golgooꞌda layadeeh yimaateen. Golgooꞌda la a mehe ya, Meessi Lafohi Matahe Enenyet.

³⁴Intaas ka Yeesso farsoti sabiibe reenkoo hadaade lakawarse[59] siisse. Iꞌdaasenyi inkoo us chanchame ka ꞌdiiꞌde.

³⁵Inkoo iche massalaaba kakaahte ka, kura guꞌddateene gaaddiis gisante.[60]

³⁶Yeesso massalaaba kakaahanyahaayi, iskare orrommatte yuubisse.

³⁷Matakkiis sartiis la, wihi lakayigisye lakachiire lagesse a mehe ya, WAHA A YEESSO, KARNATI YAꞋHUUD.

³⁸Reeroo lammeenye hatto lehe laleekaahe. Koo ankiiski miigeet lakakaahe, koo la ankiiski gurro lakakaahe.

³⁹ꞌDooꞌdi intaas tabo a leeabaarrama, ꞌdarraaw ka matah moroogicha.

⁴⁰“Atihi minki Waakhe buure jejjebisso, toro orrah seyyah on ka disso, bal isribe, massalaaba kasooyag chaꞌat Weeli Waakh tahe!” iche idowaan.

⁴¹Saggaas on u kuhaaniyyohi wewween ichoow tagaammeti amurre ichoow ewweenki Yaꞌhuud laka a kachaartaane,

⁴²“ꞌDooꞌdi addan a ribe, iꞌdaasenyi isribin ma yabuuꞌd. Usu a karnati Issiraayel a? ꞌDiicha toolla massalaaba a kasooyago, ꞌdee usu a rummeysanni,” esseen.

⁴³“Usu Waakhe kakhuufa, ‘Aní Weeli Waakhe,’ iche essa menya? ꞌDiicha giꞌde Waakh usu a ribo chiꞌ Waakh usu ꞌdoono,” yidaaheen.

⁴⁴Saggaas on u ꞌdooꞌdi hatto lehe laleekaahe laka weyti usu leeabaarrame.

⁴⁵Uus sahaꞌd lihti maalimeet ka il tuumman mugꞌdi yitahye, ichoowka sahaꞌd saagaale eleesse.

⁴⁶Geeddi sahaꞌd saagaal ka, Yeesso hooyi buure ka riire, “Elooy! Elooy! Laama sabakhtani?” yidah. Wahaas la a mehe ya, “Waakkhaayaaw, Waakkhaayaaw, a iꞌdoh ikatabte?”[61]

⁴⁷ꞌDooꞌdoo intaas toollo la baabule daage wihi icho yidaaheen, “Usu eti Waákh íyeyyeedo Eliiya layadeeh iche waha.”

⁴⁸Chirraas on kichekoo nyaame, haaruggoo sookhaate, farsoti sabiibe birrakhe buuhiche. Khoꞌdoonkoo deer kahide Yeesso iyooge, ꞌdee a yubhaabe.

⁴⁹ꞌDooꞌdi addan la, “ꞌDiicha, usu Eliiya yamiite ribo a agarro,” yidah.

⁵⁰Yeesso inkoo us toro hooyi buure ka riire ka rubey gooche.

⁵¹Chirraakka dafarti weyti yobbeenye minki Waakhe buure seley goosso meel lamma seley igoote, sereye kasookharradde ichoowka iliche kabahte. Harra sesseehte, daddaabo laka khakkharradeen.

⁵²Hawwaalo furnameene, ꞌdooꞌdi Waakhe ittaawenye munyeenye goorat tuume omoot lakasookahche.

⁵³Icho la hawwaalo goya kasoobaheen. Inkoo Yeesso omoot kasookahe ka ilkerengeetti weene lagane Yeerusaleem irteene, ꞌdooꞌdi ittaawe la arge.

⁵⁴Chirri eti koobbintoo iskareet itoollo ichoow iskarti leejirte Yeesso yuubisso harrati sesseehto ichoow wihi tuummane yitah agarte ka, weyti nahte, “Rumanka usu Weeli Waakhe eheet,” tidah.

⁵⁵Deyyehoti ittaawe intaas a kijirte, fogaka a ꞌdeyꞌdoossa. Icho Yeesso boroofenhi Gaalilaaya kasooraaheene ꞌdee gargaaraan.

⁵⁶Goycho ka a Maariyati ilkerengeetti Magdaala, ichoow Maariyati Yaakoobo ichoow Yuussuf desse ichoow abar yeele Sebedaayo.

⁵⁷Geleb ka makhaabaloo kamurenye ilkerengeetti Arimaꞌdaaya magahiis Yuussuf layadeehe, ullaka abatti Yeesso yitah yimiy.

⁵⁸Yuussuf Bilaato iirte, sar Yeesso daahe. Bilaato amur bahche a lasiicho, yidah.

⁵⁹Yuussuf sar Yeesso khaate, dafartoo husub kaayyuube.

⁶⁰Goꞌddoo daddaabeete husube us isikhute goya kareeche. Daddaabtoo buure la goꞌd afiche iꞌdembeleeliye, katabe.

⁶¹Maariyati ilkerengeetti Magdaala ichoow Maariyati addan ba intaase fiddiyaane, goꞌddaas ꞌdeyꞌdoochaan.

⁶²Ibeenki kaas sooraaho, Ibeenki Latannabti ꞌdubiise ka, kuhaaniyyohi wewween ichoow Farissaayo ba Bilaato iirteen.

⁶³Wihi icho yidaaheen, “Eti weenoow, wihi etaas ekkeysi leh geeddi us noolyahe yidah a kasooꞌhella. Us mehe yidah ya, ‘Chirri maan seyyahe kutte, omoot a kasookaha.’

⁶⁴ꞌDeerka amur bihiche, goꞌddi lakahawwaale a layaakhicho, ichoowka ibeenki seyyahnaatteet a yitaahe. Uus abattitiis iranne sartiis hatine, ꞌdee ꞌdooꞌd ‘Yeesso omoot a kasookahe,’ idowinee. Chiꞌche iꞌdaas yeesse, ekkeysihicheki toolla, koo Yeesso laka a kuta.”

⁶⁵Bilaato wihi us ilaabe, “Iskarti yaakhisso khaata. Irda goꞌd geeddi atin tabuuꞌdiin yaakhicha.”

⁶⁶ꞌDeerka irteene daddaabti goꞌd lakoote wohoo usu lafure lakaabti kadagcheene, iskarti yaakhisso la ibahcheen.