Read rendile Mattaayo 3 Bible Online

Mattaayo 3 - rendile bible

Mattaayo 3

¹Inkoo guꞌhassoo kuteen ka, Yoohanahi Enenyet Baattissiyo yimiyye, hidaaddi boroofenhi Yaꞌhuudiya ka Yeedi Waakh cheeke.

²Wihi us yidah, “Uskeeliin kasoonokhda, iꞌdi tahe dakhi goobi Waakh a soodowwaatee.”

³Yoohana a eti goorat eti Waákh íyeyyeedo Isaaya layadeeh ka lacheeke, “Etoo hidaad ka a rirriira, ‘Kamur jit imujjummoocha, jiti us leeyamiit ficcha,’” iche essa.[5]

⁴Yoohana la gaaddiis tinti gaale lakahaaggiche, saabi us dabar kakhabe la niibe lakahaaggiche, gololiis la a gubaal ichoow malab.

⁵Enenyet ilkerengeetti weene Yeerusaleem ichoow boroofenhi Yaꞌhuudiya tuumman ichoow ilkerengeetohi hawti Yoordane ꞌdusso idow tuumman kasoobahe, Yoohana iyimiyye, wihi us essi dagansate.

⁶Eti tuummane uskeeliis Waakh icheekte la, Yoohana hawti Yoordane ꞌdusso ka baattissiye.

⁷Iꞌdaasenyi Yoohana maanti us rabitti Farissaayo ichoow ti Sadukaayo ittaawenye iche laka baattissiyo timiy arge ka, wihi us iyidah, “Dessi toof! Ayyo atin tootooche ꞌdee holi Waakh dowwanoha ka keeno kafiriddaan?

⁸Taba gurnaanki saggi rumanka atin uskeel ikasoonokhatteen tuso dela.

⁹Taba la iisekkeysanna, ‘Aburaaham a aacchihaanya,’ eelanna. Wihi an atin icheeko, Waakh a geeddi us dagahta urgiyicho us nyaakhut nyaakhut Aburaaham[6] kayeelo.

¹⁰Toolla laka Waakh iꞌdi eti uroti geeyo hiiyyay khabaani goosso dahan kakhabuu, geeyohi gurnaanki haaggan idelin tuumman a goocha ꞌdab goya iseya.”

¹¹Yoohana toro wihi us yidah, “Ani atinhi tuummane uskeeliin kasoonokhatteen, bicche atin kabaattissiya. Iꞌdaasenyi etoo ꞌdubeey ka yamiit weyti ikaweenyahe, ortiis ka walah an ahe mele, kobtiis laka sinnaan ma muꞌdan. Us Rubeyti Munyee ka ichoow ꞌdab ka a atin baattissiya.

¹²Birtiisti gurnaan lakahafaricho, dahane kakhaba. Inti gurnaan lakatumo hara, ꞌdargaayyetiis koondi kichiba, urfo la ꞌdabi jirtuu ijitin goya kichiba.”[7]

¹³Saahka Yeesso boroofenhi Gaalilaaya kayimiyye, hawti Yoordane ꞌdusso ka Yoohana iyimiy, ꞌdee Yoohana usu baattissiya.

¹⁴Iꞌdaasenyi Yoohana usuhi Yeessó jeycho ꞌdoona wihi us iyidah, “Ati kootte incheenka ani ibaattissita, a iꞌdoh ani ikatamiit?”

¹⁵Iꞌdaasenyi Yeesso wihi us ilaabe, “Toolla iꞌda on a titaahe. A mujjum chiꞌinno iꞌda yeello, ꞌdee mali fissane Waakh buuhinno.” Yoohana ꞌdeerka wihi Yeesso iyidah ayyiche, baattissiye.

¹⁶Yeesso uus labaattissiye, chirraas on bicche goya kasoobahe. Chirraas on sereye bakkaahte, ulla Rubeyti Waakhe iꞌdi kutukuurrug u sooyegto sartiis koorrommatti arge.

¹⁷Hooyoo la serey kasooyeede, wihi us yidah, “Waha a Weeleeyki an weyti ꞌdoono, weyti ikahamaadicho.”