Read rendile Mattaayo 4 Bible Online

Mattaayo 4 - rendile bible

Mattaayo 4

¹Rubeyti Munyee saahka Yeesso woyte, ichoowka hidaad geesse, ꞌdee Seytaan kajmeti uskeel kaluguꞌddo ikeena.

²Inkoo us ibeen tomon affar maalintiche khabto af hiite ka, weyti ankaye.

³Seytaanki ꞌDookkaje layadeeh la iyimiyye, iiyeyye, “Chirri at Weeli Waakh tahe, dagahta leeyeede makaate a titaahe.”

⁴Yeesso la wihi us ilaabe, “Wihi chiiran, ‘Weeli enenyet golol kalday mee kanoolyahe, iꞌdaasenyi yeedi tuummane afi Waakh kasoobaho kanoolyahe.’ ”[8]

⁵Seytaan toro Yeesso khaate, ilkerengeetti weene lagane Yeerusaleem ka minki Waakhe buure guutiis korche.

⁶Wihi us Yeesso iyidah, “Chirri at Weeli Waakh tahe, inta kanyaam. Iꞌdi tahe wihi chiiran, “ ‘Waakh hertiis amure ibahcha, iche la dahanohiche ka serey kiokkhissa, uus ꞌdee luhtaah dagah guꞌddine.’ ”[9]

⁷Yeesso wihi us ilaabe, “Chiirnaanneti Waakh toro mehe tadeeh ya, ‘Kamuri Waakkhaahe kajme agelin.’ [10]”

⁸Seytaan toro Yeesso khaate, haloo weyti deer korche, yaafohi harra tuumman ichoow kamurroonkicho ba tuse.

⁹Seytaan wihi us Yeesso iyidah, “Chirri at jilbo il kaguꞌdubte at ani iwahatte, waha tuumman a kisiicha.”

¹⁰Yeesso wihi us iyidah, “Seytaan, nyaam ikatab! A mehe wihi chiiran, ‘Kamuri Waakkhaahe waho toro la usu kalday on ihil.’[11] ”

¹¹Seytaan ꞌdeerka Yeesso katabe, herti Waakh la timiyye Yeesso gargaarte.

¹²Yeesso inkoo us saggi Yoohana jeela liigesse daage ka, boroofenhi Gaalilaaya inokhte.

¹³Ilkerengeetti Naasaret katabe, ilkerengeetti Kafarnaaꞌhume beyti Gaalilaaya aficheenye ili yaaf Seebulon ichoow Naaftalee irte furte.

¹⁴Waha la a yateehiine, ꞌdee wihi eti Waákh íyeyyeedo Isaaya layadeeh ka lacheeke, labuuhicha.

¹⁵ꞌDooꞌdi harrati yaaf Seebulon ichoow yaaf Naaftali toolla yaalle, jiti beyti Gaalilaaya liikasohti, hawti ꞌdusso Yoordan bahayhiise yaal, harrati Gaalilaaya ꞌdooꞌdi Waakh igaran yaalliine yaal.

¹⁶Atinhi mugꞌdihi uskeel goya fiddiiteen, banayhi Waakhe buure a agarteen. ꞌDooꞌdi ili oosinti omooteet fiddiye, banay a isookoreen. [12]

¹⁷Uus maantaas Yeesso Yeedi Waakh ꞌdooꞌd icheeke, wihi us iyidah, “Uskeeliin kasoonokhda, a mehe dakhi goobi Waakh a soodowwaatee.”

¹⁸Yeesso Beyti Buurenye Gaalilaaya afiche kasohtaayi, reeroo lammeenye isleedesse arge. Waha a Siimonhi Beetero layadeeh ichoow Andereeya. Iche la oroohti bahag lakakhabti bey goya isaate, a mehe hiliche a ki bahag lakhabti.

¹⁹Yeesso la wihi us iyidah, “Kaaleya isooraaha abattiteey ateeha, hiloo husube enenyet Waakh liikeeno a atin korcho.”

²⁰Chirraas on oroohti kootte iche bahag kakhabatti ꞌdiisse Yeesso raahte.

²¹Toro orey isohte yeeletoo addane lammeenye isleedelatte too Sebedaayee arge. Iche la a Yaakoobo ichoow Yoohana. Lammache aabbahiche khabtaayi kooban goya fiddiita, oroohti bahag lakakhabti haagsatta. Yeesso yeele lammache wahe.

²²Iche la chirraas on kooban ichoow aabbahiche ba katabte Yeesso raahte.

²³Yeesso boroofenhi Gaalilaaya tuumman goya tabe, minassichoki weysiite Yaꞌhuud ka Wori Haaggane dakhi Waakh miinsan cheeke, ꞌdooꞌdi khakkhannane khannaattetiis fil dakkhan tahe laka samaache.

²⁴Woriis boroofenhi Siiriya tuumman kataaꞌhe, ꞌdooꞌd la ꞌdooꞌdi tuummane khakkhannane sugeerreti yeerare khabo ichoow ki bolokkhi uskul khabo ichoow ki ginnayyo dakhtaan ichoow ki sungaal khabo ichoow ki maꞌdee ikeene, ulla icho tuumman samaache.

²⁵Ururreti buurenye boroofenhi Gaalilaaya ichoow Dekaabolis[13] ichoow ilkerengeetti weene Yeerusaleem ichoow boroofenhi Yaꞌhuudiya ichoow hawti ꞌdusso Yoordan berihichee kayimiy Yeesso raahe.