Read rendile Mattaayo 7 Bible Online

Mattaayo 7 - rendile bible

Mattaayo 7

¹“Taba uurassiin goyaka enenyet ahukkumina, ommos atin laka Waakh a atin hukkumaa.

²A mehe saggaas atin enenyet ihukkuntaan saggaase atin laka Waakh atin ihukkuma. Geeddi atin ꞌdooꞌdi addan iyeessaan, geeddaase atin liiyeela.

³“A iꞌdoh urufti il walaalaah kijirto iagarta, gurtunki issaah goya kijiro la iargin?

⁴At saggoh walaalaah, ‘Alley uruftaas il kaajirto a kaabahcho,’ ikatadeeh, alla kol tuumman gurtume issaah goya kaajiraa?

⁵Iskaayyeessooy! Koloo gurtunki issaah goya kajiro bihiche, ꞌdee urufti il walaalaah goya kajirto mujjum agare, bihi.

⁶“Wihi munyee ꞌdooꞌdi Waakh ꞌdiiꞌddan asiinna. ꞌDooꞌda a iꞌdi kararreti yibaate kisoonokhatti, kitaham. Wihi weyti haaggan la, ꞌdooꞌdi haaggicho ꞌdiiꞌddan asiinna. ꞌDooꞌda iꞌdi golchuu wahaas haaggan a yabta.

⁷“Waakh wihi at ꞌdoonto daddaahe, a kisiicho. Wihi at ꞌdoonto Waakh kayoyyowo, a kaꞌhessaa. Waakh, arit ifah idahe, ulla a kifaho.

⁸Iꞌdi tahe eti tuummane walah daahe, Waakh wihi us daahe a siicha, ki walah yowti la, Waakh a kaꞌhela, ki ifaha yidah la, Waakh arit a ifaha.

⁹“Atinhi ooyenyee, etiinkoh chirri weeliis golol daahe dagah siicha?

¹⁰Ommos chirri weeliis bahag daahe toof siicha?

¹¹Chirri atinhi uskeel leh ba nyaakhutiin siinti haaggan siissaan, Aabbahiinki serey jiro la geeddoo meheenye ꞌdooꞌdi usu walah daahe siinti haaggan siicha!

¹²Walah tuumman ka, wihi kootte incheenka atinhi atin liiyeelo ꞌdoontaan, ꞌdooꞌdi addan iyeela. Wihi tahe, waha a wihi Chiirnaanneti Amurre ichoow Chiirnaanneti ꞌdooꞌdi Waákh íyeyyeedo enenyet abchaan.

¹³“Aritti juukhe kagel, a mehe aritti ꞌdabi armaanjireen lakagelo, a ballaaddantahe, jiti baabaa isohti la a ꞌdabakhe, ꞌdooꞌdi tabo la a buur.

¹⁴Iꞌdaasenyi aritti jiroti armaanjireen lakagelo a juukhe, jiti jiroti jirtuu imassan isohti la a miige, toro la ꞌdooꞌdi jita ꞌhelo a koo rucchul.

¹⁵“Taba ꞌdooꞌdi ꞌdooꞌdi Waákh íyeyyeedo iskaayyeelo yuubsada, iꞌdi tahe icho uummanki iiyyaate atin ikayamiitiine, ugoka uurassicho ka a yaayti weyti sussuuje.

¹⁶Gurnaanki icho delaane kaabattaan. Geeyi bilhil medeer ma kaguratti, toro la geeyi khasah dommog ma kaguratti gon.

¹⁷Saggaas on u geeyi haaggan tuumman gurnaanki haaggane dela, iꞌdaasenyi geeyi suuje gurnaanki suuje on dela.

¹⁸Geeyi haaggan gurnaanki suuje delin ma yabuuꞌde, geeyi suuje la gurnaanki haaggan delin ma yabuuꞌd.

¹⁹Geeyi tuummane gurnaanki haaggan idelin, a lagoocha ꞌdab lakalugꞌda.

²⁰Iꞌdaakka ꞌdooꞌdi ꞌdooꞌdi Waákh iyeyyeedo iskaayyeelo, gurnaanki icho delaane kaabaattaan.

²¹“Eti tuummane af ka, ‘Kamuraayaaw,’ idowo mee dakhi goobi Waakh gelo. Iꞌdaasenyi eti gelo a ki wihi Aabbaheeyki serey kajiro ꞌdoono yeelo kalday on.

²²Maanti Waakh enenyet hukkumo, ꞌdooꞌdi buure mehe ani iyadeeh ya, ‘Kamur, Kamur, magahaah ka a kiyeyyeene, toro magahaah ka ginnayyo ꞌdooꞌd a kabihinne, wihi ittaawenye weeli enenyet yeelin iubaaꞌdan laka yeelle.’

²³Anna ꞌdow ka mehe icheeka ya, ‘An injire ma atin garan. Atinha hugunꞌdarri kaassohattaan nyaama ikataba.’

²⁴“Maantaka eti tuummane wihi an idowo daago toro la raaho, a iꞌdi eti khareenye minkiis inti ngꞌaajjee kadise.

²⁵Saahka hir ꞌdeye, ꞌduley il khaate, hafari buure laka sookahe min guꞌdde. Iꞌdaasenyi minkaas ma reyin. Iꞌdi tahe mujjume il katoolla.

²⁶Iꞌdaasenyi eti tuummane yeedeeyka daago toro iraahin, a iꞌdi eti ꞌdalamenye minkiis yooh goya kadise.

²⁷Saahka hir ꞌdeye, ꞌduley il khaate, hafari buure laka sookahe min guꞌdde, min tuumman iskareye iskaambase.”

²⁸Inkoo Yeesso waha tuumman cheeke ka, urur saggi us ꞌdooꞌd walah iabcho kagirmeeste.

²⁹Yeesso iꞌdi tagaammetichoti amurre mee, us saggi etoo anto khabo iche enenyet walah iabcha.