Read rendile Mattaayo 8 Bible Online

Mattaayo 8 - rendile bible

Mattaayo 8

¹Chirri Yeesso hal tahariis kasookhubte ka, ururoo buure usu sooraahe.

²Etoo buꞌdatoo uskul sar kasoofoofte la Yeesso iyimiy. Ortiis ka jilbo il kaguꞌdde, wihi us yidah, “Kamuraaw, chirri at ꞌdoonto, at biꞌdir ibihin a tabuuꞌd.”

³Yeesso dahan ooge, et ꞌdaare, wihi us iyidah, “A ꞌdoona, biꞌdir bah!” Chirraas on buꞌdati kootte et sar kasoofoofte baabaate, et samaate.

⁴Yeesso ꞌdeerka wihi us iyidah, “Etoo kalday laka jit ka aleeyeedine, iꞌdaasenyi kuhaani iiro, saggi at isamaatte istus. Sadakhati amurre Muusa kachiirane eti buꞌda lakabahche bahcho bihiche, ꞌdee garti saggi lakisamaache a titaahe.”

⁵Chirra Yeesso ilkerengeetti Kafarnaaꞌhum gele ka, etoo ili Rooma koobbintoo iskareet itoollo, iyimiyye hawwaaste,

⁶wihi us iyidah, “Kamur, ilbooyeey goobe jiifa, sare a hanjaawte, weyti bolkha.”

⁷Yeesso la wihi us iyidah, “A amiite samaacha?”

⁸Etaas koobbintoo iskareet itoollo la wihi us Yeesso ilaabe, “Kamur, at minkeeyki at tamiit ma muꞌdane iꞌdaasenyi intaas on ka sooyeed, ilbooyeey la a samaataa.

⁹Iꞌdi tahe ani rubeyteey laka a etoo iskarti addane ikawewween antohicho raaho, toro la iskarti addane an andi laka a jirta. Chirri an koo, ‘Kaale,’ iidah a yamiit. Chirri an koo, ‘Nyaam iro,’ iidah la a irta. Chirri an ilbooyeey, ‘Waha yeel,’ iidah la a yeela.”

¹⁰Chirri Yeesso waha daage ka weyti girmeeste, wihi us ururi sooraaho iyidah, “Rume atin icheeka, an injire yaafohi Issiraayel goyaka, eti geedda weyti Waakh kakhuufo ma ꞌhelin.

¹¹Wihi an atin iadeeh, maanti harrata ꞌdubiche yitah, ꞌdooꞌdi ittaawe beri ichoow bahaye kayamiite, Aburaaham ichoow Isakh ichoow Yaakoobo khabaani meelassicho khaattaane, dakhi goobi Waakh ka sukuuku isleegelaan.

¹²Iꞌdaasenyi ꞌdooꞌdi yaafohi Issiraayelenye kootte dakhaas miinsanyahe Waakh icho khar ka mugꞌdi goya iseya. Intaas ka la a ooyaane bolokh ka ilko iskarobaan.”

¹³Yeesso ꞌdeerka wihi us etaas koobbintoo iskareet itoollo iyidah, “Nyaam goob iro. Saggi Waakh ilbooyaah isamaacho a rummeysatte gone, Waakh usu a samaacha.” Ilbooyi etaas iskareete ween la chirraas on samaate.

¹⁴Chirri Yeesso min Beetero gele ka, seyyoh Beetero ichehi sare kululaatti siriir kajiifto arge.

¹⁵Yeesso la dahan sookhabte, lakabukkhe iche la sookahte, usu goollisse.

¹⁶Chirri il gelebnowe ka, ꞌdooꞌdi ittaawenye ginnayyo dakhtaan usu liikeene, ulla yeedi afoot on ka ginnayyo kabahche, toro la ꞌdooꞌdi khakkhannan tuumman samaache.

¹⁷Ulla wahaas a yeele ꞌdee wihi eti Waákh íyeyyeedo Isaaya layadeeh ka lacheeke, labuuhicha. “Usu rubeytiis khannaatteteen a inno kabahche, sugeerreteen laka inno kakhaate.”[20]

¹⁸Chirri Yeesso ururi khaariche arge ka abattitiis amur ibahche, beyti Gaalilaaya aficheki ꞌdiri a imaaheen.

¹⁹ꞌDeerka etoo tagaanki amurree yimiyye, wihi us Yeesso iyidah, “Eti Weenoow, meelbaaw at iratti ka, an a kiraaha.”

²⁰Yeesso wihi us ilaabe, “ꞌDowwohoyyo lumame khabaane, chimbirohi saraat la minchimbiroote khabaan. Iꞌdaasenyi Ínam Aadam inti us matah gesso laka ma khabo.”

²¹Etoo addane abattee wihi us Yeesso iyidah, “Kamur, alley koloo a irdi aabbaheey a laabo.”

²²Iꞌdaasenyi Yeesso wihi us iyidah, “Isooraah. ꞌDooꞌdi tuume lamaaꞌdo a hili ꞌdooꞌdi tuume.”

²³Yeesso ꞌdeerka koobanhoo kadihe, abattitiis la raahte.

²⁴Koloo kalday on hafaroo buure yimiyye bey guꞌdde, bicche irtoo uskul bahcheene, kooban goya isootabeen. Iꞌdaasenyi Yeesso a urꞌda.

²⁵Abatti Yeesso iiratte, kihisse wihi iche itidah, “Kamur, inno rib, bicche a inno khaataanee.”

²⁶Yeesso la wihi us ilaabe, “Eenna iꞌdaaru marah on ikakhuuftaane, a iꞌdoh iꞌduu iburꞌdowteen?” ꞌDeerka kahe, hafar ichoow ir ba leejaakhe, chirraakka beye rukkuy goosse.

²⁷Abatti girmeysatte, wihi iche worsatte, “Icho eta a ayyo, hafar ichoow ire laka yeediis daagaan?”

²⁸Chirri us bey aficheki ꞌdiri imaahe, us ili ꞌdooꞌdi Gadaara eleele ka, reeroo lammeenye ginnayyo dakhtaan goꞌddassi enenyet lakahawwaalo kasoobahe usu ꞌheleen. Icho weyti enenyet sina igoocheene, ꞌdeerka et jitaas tabo mele.

²⁹Chirraas on riireene, “Weeli Waakh, at mehe nah kaꞌdoonta? Geeddi ibeenki Waakh nah ichiire iitaahan on tamiite bolokh nah tussa?” yidaaheen.

³⁰Woyhoo buurenye golcha la intaas hagga yaakha.

³¹Ginnayyo la Yeesso hawwaasteene, “Chirri at nah bihisso, woyha golcha goya nah iꞌdii,” iyidaaheen.

³²Yeesso la wihi us iyidah, “Nyaama irda!” Ginnayyo ꞌdeerka baheene, golcha goya itabeen. Woyhi golcha kootte bur tahariis yaakho, bey goya itabe, woy tuummamba bicche khaateen.

³³ꞌDooꞌdi golcha yaakhicho orye ilkerengeet irte, waha tuumman ichoow wihi ꞌdooꞌdi ginnayyo dakhtaan kayitah cheeke.

³⁴ꞌDooꞌd tuumman ꞌdeerka ilkerengeet kabahe Yeesso iirte. Chirri icho Yeesso argeen ka usu hawwaasteene ilicho a katabo.