Read rendile Marko 1 Bible Online

Marko 1 - rendile bible

Marko 1

¹Waha a uumacchoti Wori Haaggane, Yeesso Kiriistohi Weeli Waakhe miinsan.

²Wihi Isaayahi Waákh íyeyyeedo chiire kallaayo, “Yeya, ergattiteey ortaahha erga iche rubeyohi enenyete tannabissa.[1]

³Ergattita la hidaade karirriirta, ‘Kamur jit imujjummoocha, jiti us leeyamiit ficcha,[2]’ iche elatta.”

⁴ꞌDeerka Yoohanahi Enenyet Baattissiyo hidaad yimiyye wori baattissiyo cheeke. Us enenyete baattissiye uskeelicho kasoonokhtaane, ꞌdee Waakh uskeelicho ikakuta.

⁵Enenyet boroofenhi Yaꞌhuudiya tuumman ichoow ilkerengeetti weene Yeerusaleem tuumman ka soobahe, Yoohana iyimiy. Eti tuummane uskeeliis Waakh icheekte la, Yoohana hawti Yoordane ꞌdusso ka baattissiye.

⁶Yoohana gaaddi us khabe tinti gaale lakahaaggiche. Saabi us dabar kakhabe la niibe lakahaaggiche. Gololi us yuhum la a gubaal ichoow malab.

⁷Wori us orey on cheeke a kan, “Etoo ani weyti ikaween ꞌdubeey ka a yamiit. An walah an ahe mele, gulguubsanaanki an gulguubsadi an falfihi kobtiis laka jalkhicho ma muꞌdan.

⁸Ani toolla bicche atin kabaattissiya, iꞌdaasenyi us berri Rubeyti Munyee ka a atin baattissiya.”

⁹Saahka Yeesso ilkerengeetti Naasaret layadeehe, boroofenhi Gaalilaaya kijirto kayimiyye, Yoohana la hawti Yoordane ꞌdusso ka usu baattissiye.

¹⁰Chirra Yeesso bicche goya kasoobaho, sereyti kharradde Rubeyti Munyee la iꞌdi kutukuurrug u isooyagto arge.

¹¹Hooyoo serey kasooyeede, wihi us yidah, “Ati a Weeleeyki an weyti ꞌdoono, weyti ikahamaadicho.”

¹²Chirraas on Rubeyti Munyee Yeesso hidaad ieregte.

¹³Ibeen tomon affar Yeesso hidaaddaas on kijire, Seytaan la kajmeti uskeel kaluguꞌddo ikeene. Hidaaddaas ka binahi yibaat on leejire, herti Waakh la Yeesso ihisse.

¹⁴Inkoo Yoohana jeela lagesse ka, Yeesso boroofenhi Gaalilaaya irte. Intaas ka, Wori Haaggane Waakh kayimiy on cheeka.

¹⁵Wihi us yidah, “Il kola a yitah! Dakhi Waakh kola a soodowwaate! Uskeeliin kasoonokhda, Wora Haaggane ani atin idowo rummeesda!”

¹⁶Yeesso Beyti Buurenye Gaalilaaya afiche kasohtaayi, eti Siimon layadeeh ichoow walaaliiski Andereeya layadeeh, arge. Oroohti bahag lakakhabti, iche bey goya isaate, a mehe iche hiliche a ki bahag lakhabti.

¹⁷Yeesso la wihi us iyidah, “Kaaleya, isooraaha abattiteey ateeha, hiloo husube enenyet Waakh liikeeno a atin korcho.”

¹⁸Chirraas on oroohti kootte iche bahag kakhabatti ꞌdiisse, Yeesso raahte.

¹⁹Yeesso iꞌdaaru marah on orey isohte, Yaakoobohi inam Sebedaayee ichoow walaaliiski Yoohana layadeeh ichehi kooban goya fiddiito, oroohti bahag lakakhabti haagsatti arge.

²⁰Chirraas on lammache wahe, iche la aabbahiche ichoow ꞌdooꞌdi lakireeste kooban goya katabte Yeesso raahte.

²¹Yeesso ichoow abattitiis ilkerengeetti Kafarnaaꞌhum irteen. Saahka Seeri Lanaso ka, Yeesso minki weysiite Yaꞌhuud gele, enenyet wori Waakh abin sookhabte.

²²Enenyet tuummamba saggi usu ꞌdooꞌd walah iabcho, kagirmeeste, a mehe iꞌdi tagaammeti amurre menye, iꞌdi etoo anto khabo, iche ꞌdooꞌd walah iabche.

²³Chirraas on etoo ginnatoo dakhatti minkichoki weysiit kijire riire,

²⁴“Wooy! Yeessohi Naasaret, ati mehe nah kaꞌdoonta?” yidah. “Nahe nah massin timiy? Ani alah eti at tahe a garda, at a Ki Munyeenye Waakh kayimiy!”

²⁵Yeesso ginna leejaakhe, “Gammadiche, etaas goya kasoobah!” iyidah.

²⁶Ginnataas chirraakka etaas kafadisse, riirte, et kasoobahte.

²⁷Enenyet tuumman girmeeste. “Waha iꞌdee a mehe?” isworsate. “A yeedi husube, toro anto khabo! Ginnayyo laka amur on ibahcha, icho la yeediis raahaan.”

²⁸Wori usu miinsan dowwa on boroofenhi Gaalilaaya tuumman kataaꞌhe.

²⁹Uun icho minki weysiit kabaheen, Yaakoobo ichoow Yoohana khabaayi, irteene ichoowka min is Andereeya ichoow Siimon geleen.

³⁰Seyyoh Siimon la sare kululaatta, siriire kajiifta. Chirraas on Yeesso saggi araarri ikhannanyahe liicheeke.

³¹Ulla irte, dahan sookhabte, sootoolliche. Lakabukkhe iche la icho goollin sookhabatte.

³²Gelebtaas, inkoo orrahe dihte ka, enenyet ꞌdooꞌdi khakkhannan ichoow ki ginna dakhatti tuumman ba Yeesso ikeene.

³³Ilkerengeet tuumman soobahte, min afiis buuhisse.

³⁴Yeesso la ꞌdooꞌdi ittaawenye sugeerreti yeerare khabo samaache. ꞌDooꞌdi ittaawenye ginnayyo dakhtaan laka, ginnayyo kabahche. Iꞌdaasenyi ginnayyo amuri icho kasooyeedaan tirte, a mehe eti usu yahe a garteenee.

³⁵Yeesso baryoti booran ka kahe, min kabahe, inti enenyet ikijirin irte, weeste.

³⁶Siimon ichoow wahalhiis ba irteene, usu yowteen.

³⁷Chirri icho ꞌheleen ka, wihi icho iyidaaheen, “Enenyet tuumman ati kiyowta.”

³⁸Yeesso wihi us ilaabe, “Kaaleya, intoo addan a iranni, iꞌdi maanta ilkerengeetohi soodow a iranni, ꞌdee Yeedi Waakh a cheeko. An alah wahaase iimiy.”

³⁹ꞌDeerka boroofenhi Gaalilaaya tuumman goya kasohte, Yeedi Waakh minassichoki weysiite Yaꞌhuud ka cheeke, ꞌdooꞌdi ginnayyo dakhtaan la ginnayyo kabahche.

⁴⁰Saahka etoo buꞌdatoo uskul sar kasoofoofte Yeesso iyimiy. Ortiis ka jilbo il kaguꞌdde, hawwaaste, wihi us yidah, “Chirri at ꞌdoonto, at biꞌdir ibihin a tabuuꞌd.”

⁴¹Yeesso etaas weyti uur isoonugleeste, dahan ooge et ꞌdaare, wihi us iyidah, “A ꞌdoona, biꞌdir bah!”

⁴²Chirraas on buꞌdati kootte etaas sar kasoofoofte baabaate, et samaate.

⁴³Yeesso chirraas on et erge, weyti tootooche wihi us iyidah,

⁴⁴“Etoo kalday laka jit ka aleeyeedine, iꞌdaasenyi kuhaani iiro saggi at isamaatte istus. Sadakhati amurre Muusa kachiirane eti buꞌda lakabahche bahcho bihiche, ꞌdee garti saggi lakisamaache a titaahe.”

⁴⁵Iꞌdaasenyi etaas irte, enenyet tuumman yeedaas icheeke, woraas taaꞌhiche. Yeesso saahka jeentetaas u chiꞌ laargo ilkerengeet gelin ma yabuuꞌd, iꞌdaasenyi hidaad on fiddiya. Eheetteey laka, enenyet Yeesso ma ꞌdiicho, ꞌdollo tuumman ka a iyamiit on.