Read rendile Marko 14 Bible Online

Marko 14 - rendile bible

Marko 14

¹Ibeen lamma ankhane ꞌdee daawti Baasakka ichoow Daawti Makaateti Liikhasin lagela. Kuhaaniyyohi wewween ichoow tagaammeti amurre la ekkeysi ka saggi iche Yeesso ikhabatti ꞌdee itagiise yowatta.

²A mehe wihi icho essaan, “Uus inno daawta goyaka khaban. Kolossoo enenyet hol ka il a baabiichaa.”

³Yeesso ilkerengeetti Beꞌdaaniya ka minki etoo Siimonhi Ki Buꞌda Khabe layadeeh ka, komborti ballaaddane lakagolossati ka dikkile kajiifa golossata. Makhaabassoo kurunkoo daakki alabaasta lakahaaggiche miricchihoo weyti gato miige kijiro geeyoo naad layadeeh lakahaaggiche leetimiy. Kurum lukhum jebisse, Yeesso miricchi matah kakhubte.

⁴ꞌDooꞌdi intaas kijire gaasoo, “Miricchiha a iꞌdoh immarah labaabiicho?” iche hol ka isidowa.

⁵“Kootte chilimmeti eti guꞌhoo hil haaggiche laguto ꞌdirihiissa lakoororicha, chilimme miskiin lasiicha,” iche essaan. Icho la makhaabál weyti leejaakheen.

⁶Yeesso wihi us yidah, “A iꞌdoh iche imalalissaan? ꞌDiicha! Wihi iche iyeesse a haaggi weyti buure.

⁷Miskiin kol dakkhan goytiinna kakhabtaane, kolbaaw atin ꞌdoontaan la a gargaartaan. Iꞌdaasenyi ani kol dakkhan ma ikhabtaan.

⁸Makhaabassa wihi iche tabuuꞌd tuummane yeesse. Sarteey miricchi ka subahte, orey on geeddi liihawwaalin tannabisse.

⁹Rume atin icheeka, meelbaaw Wori Haaggan harra tuumman ka lacheeko ka, wihi iche yeesse laka a lacheeka, iche la lakasooꞌhela.”

¹⁰ꞌDeerka Yuuda Iskaariyoothi ullaka abatti Yeessoti tomon ichoow lammee kichekoowe, kuhaaniyyohi wewween iirte, Yeessó ꞌdub goocha dahanohicho gessaa.

¹¹Inkoo icho wahaas daageen ka weyti hamaadeene toro chilimme iayyicheen. Yuuda ꞌdeerka inti leemujjumenye us Yeesso dahanohicho kagesso yowte.

¹²Ibeenki oraate Daawti Makaateti Liikhasin maanti heleenki daawti Baasakka lasoorriyoocho eheet. Ibeenkaas goya abatti Yeesso wihi iche Yeesso worsatte, “Intoh ꞌdoonta iranna katannabanna, ꞌdee gololi daawti Baasakka kataham?”

¹³ꞌDeerka abattitiistoo lammee erge wihi us iyidah, “Nyaama ilkerengeet gela, etoo ꞌdirihoo biccheet siꞌdo afiin a kayamiite raaha.

¹⁴Minki us gelo wihi atin ooyo itadeehiin, ‘Eti Ween mehe worsata ya, min goyaka meessi marti ani ichoow abattiteey gololi daawti Baasakka kanaham meeke?’

¹⁵Meessoo buurenye minkiis sartiisenye meeh tuumman khabto lahaaggiche iche atin tusa. Intaas ka golol inno ihaaggicha.”

¹⁶Abatti bahte ilkerengeet gesse, walah dakkhan ba iꞌdi kootte usu iyidah on iꞌheleen. ꞌDeerka gololi daawti Baasakka haaggisse.

¹⁷Chirri il gelebnowe ka, Yeesso abattitiisti tomon ichoow lammee khabaayi yimiy.

¹⁸Chirra icho komborti lakagolossati ka dikkille kajiifaane golossataan ka, Yeesso wihi us yidah, “Rume atin icheeka, etiinkoo ꞌdub igoocha, a etiinkoo ileegolossati.”

¹⁹Iche tuumman fool ribowe kooba, “Rumanka ani mee menya?” worsate.

²⁰Wihi us ilaabe, “Atinha tomon ichoow lammee, a etiinkoo. A etiinki makaate karanta ikaleelugꞌdo.

²¹Ínam Aadam iꞌdi usu miinsane lachiiruu, a yamuut. Iꞌdaasenyi eti Ínam Aadam ꞌdub goocho, sinati sugto eenna a buure! Usuhi goorat idelanne deefta.”

²²Golossataani Yeesso makaate khaate Waakh kalaꞌd ilaabe, jejjebche abattitiis ididdiibe, wihi us yidah, “Khaata, waha a sartaayaa.”

²³Toro kokkoob khaate, Waakh kalaꞌd ilaabe, abatti idiibe, iche tuumman la isleeanguumatte.

²⁴“Waha a diiggeeyki ayyinti husube Waakh enenyet igoocho, a diiggi iroonoti enenyeti buure liikhubo.

²⁵Rume atin icheeka, an farsoti sabiib toro ma damo, ichoowka ibeenkaas an wihi husub dakhi Waakh ka damo yateeh.”

²⁶Inkoo icho geeyoo Waakh dowteen ka, Hali Geeyohi Oolif ibaheen.

²⁷Yeesso wihi us abatti iyidah, “Atin tuumman a ikafiriddaan, a mehe wihi chiiran, “ ‘An ersime guꞌdda, iiye la seley baabaata.’[25]

²⁸Iꞌdaasenyi inkoo an omoot kasookahe, boroofenhi Gaalilaaya ortiin a irda.”

²⁹Beetero la, wihi us yidah, “Chirri iche tuumman kaafiridde laka, ani ma kaafirdo!”

³⁰Yeesso wihi us ilaabe, “Rume atin icheeka, maanta ibeenka goya laka, geeddi lukki kol lamma iriirin, ati rubeytaah kol seyyahe, ma igaratti tadeeh!”

³¹Iꞌdaasenyi Beetero weyti yeediis katirriinsate wihi us yidah, “Chaꞌan kileeamuut laka, jirtuu ma kigardi ma adeeh!” Ti addan tuumman laka iꞌdaas tidah.

³²Intoo Gesseemane layadeeh irteene, Yeesso wihi us abatti iyidah, “Inta orronda, geeddi an Waakh wahdi.”

³³Beetero ichoow Yaakoobo ichoow Yoohana khaatte. Sohtaayi, uur goya iooye, mali uskul gele.

³⁴“Huleesi rubeyteey kijiro, huleesi omooteet laka a ikeena. Inta fiddiya, toorribda la,” iyidah.

³⁵Iꞌdaaru orey isohte, il isiꞌdiiche, Waakh wahte, chiꞌiche tateeh sahaꞌdda sinayyoot usu a kakutto.

³⁶Wihi us yidah, “Aabba, Aabbahaaw, ati ka walah tuumman a geeddi icho yateehiin. Kokkooba sinayyoot ikakhaat. Iꞌdaasenyi in an ꞌdoono menye, in at ꞌdoonto a titaahe.”

³⁷ꞌDeerka abattitiis inokhte, ichehi uꞌdurto ꞌhele. Beetero leeyeede, wihi us iyidah, “Siimon, a uꞌdurte? At sahaꞌddoo kalday laka toorribnaan a agaafatte?

³⁸Toorribda Waakh wahda, ꞌdee kajmeti uskeel atin kaluguꞌddo akidihina. Rubeyohiin wihi mujjumenye ꞌdoonaane, iꞌdaasenyi sartiinna ꞌdabakhe.”

³⁹Toro irte Waakh wahte, wihi kootte us yidah on inokhte.

⁴⁰Chuꞌus soonokhti, ichehi uꞌdurto, indo hulees kore toro ꞌhele. Wihi iche usu itadeeh ma garatti.

⁴¹Koli seyyahnaatteet soonokhte, wihi us iyidah, “Atin uliba a uꞌdurtaane, nassaan? A geeddaas on! Sahaꞌde a titah. Yeya, Ínam Aadam ꞌdube lagoocha, dahanohi ꞌdooꞌdi uskeel leh lagessa!

⁴²Sookaha a iranni! Eti ꞌdub igoocho kalla soosohtaa!”

⁴³Yeesso yeyyeedaayi, Yuudahi ullaka abattiti tomon ichoow lammee kichekoowe yimiy. ꞌDooꞌdi sooraahe a ururoo birlabbe ichoow khokkhoomme khabo, kuhaaniyyohi wewween ichoow tagaammeti amurre ichoow ewweenki Yaꞌhuud sooergate.

⁴⁴Eta Yeesso ꞌdub goocho la mehe urur iskakhabeen ya, “Eti ꞌdee an dongade, a usu, khabda khaata iskar a toorribto.”

⁴⁵Yuuda chirraas on Yeesso iirte, “Eti weenoow!” iyidahye dongate.

⁴⁶ꞌDooꞌd la Yeesso khabte hide.

⁴⁷ꞌDeerka etoo ullaka intaas toollo, birlab on sooꞌhiire falfati kuhaanihi weyti ween guꞌdde nabah ngꞌure.

⁴⁸Yeesso la wihi us yidah, “Chaꞌatin khokkhoomme ichoow birlabbe leetimaateene ikhabattaan, an a etoo enenyet walah saro?

⁴⁹Maan tuumman ani a atin leejire one, uranti minki Waakhe buure ka Yeedi Waakh atin abche, ma ikhaban la. Iꞌdaasenyi wahanyeyyoha a yitaaheene ꞌdee wihi Chiirnaanneti Waakh kachiiran labuuhicha.”

⁵⁰ꞌDeerka ꞌdooꞌd tuumman usu katabe kafirde.

⁵¹Etoo nugule dafartoor sookorsate la Yeesso ꞌdubiissa sooraaha. ꞌDooꞌdi kootte Yeesso woyo la, etaas khabte.

⁵²Ulla dafar intaas on katabe, murukhenyi firde.

⁵³Yeesso minki kuhaanihi weyti ween geecheen. Kuhaaniyyohi wewween tuumman ichoow ewweenki Yaꞌhuud ichoow tagaammeti amurre kulmeen.

⁵⁴Beetero la fogaka Yeesso sooraahe ichoowka uranti kuhaanihi weyti ween fiddiyo goya gele. Intaakka iskarti meel yaakhisso koorronte ꞌdab dahammoote.

⁵⁵Kuhaaniyyohi wewween ichoow Jaldaabti Weene Yaꞌhuud tuumman, garti iche yeeddo, ꞌdee icho Yeesso omoot ikagoochaan yowteene, iꞌdaasenyi walah icho ꞌheleen mele.

⁵⁶A mehe ꞌdooꞌdi buurenye Yeesso garti beenaat kacheekte, iꞌdaasenyi yeedicho ma israahin.

⁵⁷ꞌDeerka ꞌdooꞌdoo kahe, garta beenaat yeede, wihi icho yidaaheen,

⁵⁸“‘Minka Waakhe buurenye dahanohi enenyet diseen a jejjebcha koo addane enenyet idisin ibeen seyyah goyaka disa,’ usuhi essi a daagne.”

⁵⁹Iꞌdaasenyi garti icho laabeen laka ma israahin.

⁶⁰Chirraakka kuhaanihi weyti ween ꞌdooꞌd tuumman ortiis ka kahe, wihi us Yeesso worsate, “Walah at soolaabto mele? Yeeda enenyet kaacheekti, mehe jira?”

⁶¹Iꞌdaasenyi Yeesso gammadiche, walah us soolaabe mele. Kuhaanihi weyti ween toro wihi us worsate, “At a Ki Lasubhe, a Weeli Waakkhi Lakoolicho?”

⁶²Yeesso la wihi us iyidah, “Aa, a ani. Ínam Aadam la usuhi Waakkhi Miig Leh anki dahantiisti miigeet fiddiyo toro mirsohi saraat fuulaayi yamiit a agartaan.”

⁶³Kuhaanihi weyti ween hol on ka ubbaariiski deer kharradiche, wihi us worsate, “Inno a iꞌdoh ꞌdooꞌdoo addane gar laabo iyowanna?

⁶⁴Atin saggi us igafe a daagteen gon! Mehe goosseen?” enenyet worsate. Icho tuumman omoote imasse ayyicheene, omoot igoocheen.

⁶⁵Gaasichekoo hanjuf katufin sookhabteene, indo hideene khomhoyyo kajaheene, “Eti Waákh íyeyyeedoow, eti kiguꞌdde nah isoocheek,” idoween, a kachaartaanee. Iskarti meel yaakhisso khaatte, jahte.

⁶⁶Beetero uranti minkaas khariise iliche fiddiyaayi, inantoo falfati kuhaanihi weyti weene timiy.

⁶⁷Chirri iche Beeterohi ꞌdab dahammooti agarte ka fiirisse, “At laka etaas Naasarete Yeesso layadeeh a leejirte,” tidah.

⁶⁸Iꞌdaasenyi ꞌdiiꞌde, “An waha at elatti ma gardi, foolicho ma khabo ba,” yidahye, kahe, anki ariteet tabe. Chirraas on lukkihoo riire.

⁶⁹Chirri inanti falfee intaas ka agarte ka, ꞌdooꞌdi intaas toollo wihi iche toro itidah, “Reenka alah a kichekoo.”

⁷⁰Beetero toro ꞌdiiꞌde. Iꞌdaaru on fiddiyeene, ꞌdooꞌdi intaas hagga toollo wihi us Beetero iyidah, “At rumanka a kichekoo, iꞌdi tahe at laka a ꞌdooꞌdi Gaalilaaya!”

⁷¹Beetero isabaare toro Waakh dowe, “An eta atin kaayyeeddaan ma gardi!” yidah.

⁷²Chirraas on lukki koli lammaatteet riire. ꞌDeerka Beetero yeedi Yeesso iyidah kasooꞌhele, “Geeddi lukki kol lamma iriirin, at kol seyyah, ‘Ma kigardi!’ tadeeh.” Chirraas on ilmo sookhube, ooye.