Read rendile Marko 2 Bible Online

Marko 2 - rendile bible

Marko 2

¹Inkoo ibeennetoo kutte, Yeesso ilkerengeetohi Kafarnaaꞌhum isoonokhte. ꞌDooꞌd saggi us goob iyimiy daage.

²ꞌDooꞌdi buure kulme, min goya inti lagelo lawaaye, min afafhiis ka laka meel lawaaye. Yeesso la Yeedi Waakhe ꞌdooꞌd icheeke.

³ꞌDooꞌdoo affare la, etoo khannane sar tuumman hanjaawte iche Yeesso ikeene.

⁴Jeenteti urur buur iyahuu saggi iche Yeesso ikageesso waayte. Min sartiis korte, inti Yeesso toollo sartiis alohoo doobbo kabihisse. Ilaali et kajiifo il iwoyte, ichoowka Yeesso ortiis tissil.

⁵Chirri Yeesso saggi ꞌdooꞌdaas usu ikakhuufo arge ka, wihi us etaas sare hanjaawte iyidah, “Inankaaw, uskeelaah a liikaakute.”

⁶Tagaammetoo amurre la intaase fiddiita. Wihi icho uuricho ka essaan,

⁷“Eta mehe iꞌdaas kayadeeh? Wahaas gaf menya? Ayyo addane enenyet uskeeliis ikakuta, Waakh on menye?”

⁸Chirraas on Yeesso uuriis ka wihi icho uuricho goyaka dowtaan garte, wihi us makhaaballetaas iyidah, “Mehede malassi iꞌdaase idowattaan?

⁹Mehe maanta ki addan kaꞌdabakhe, chirri an eta sare hanjaawte, ‘Uskeelaah a liikaakute,’ iadeeh a ommos usuhi an, ‘Kah ilaalaah okhso, soho,’ iadeeh?

¹⁰Iꞌdaasenyi saggi Ínam Aadam antohi us harrata ka enenyet uskeel ikakuto ikhabo a abattaan.” Wihi us eti sare hanjaawte iyidah,

¹¹“Tolosso, ilaalaah okkhiche, goob iro!”

¹²Et tolossate, ilaal okhsate enenyet tuumman ꞌdeyꞌdoochaayi bahe. Icho tuumman la girmeesteene, Waakh koolicheene wihi icho yidaaheen, “Inno injire wihi iꞌdee ma argin.”

¹³Yeesso toro beyti Gaalilaaya afiche irte, ururoo buure la intaas ka iyimiyye, ulla wori Waakh abche.

¹⁴Toro orey isohte, etoo Laawi [3] layadeehe koo Alfaayee arge. Laawi meessi kooddi lakagoocho goya fiddiya. Yeesso, “Isooraahe, abattiteey ateeh,” Laawi iyidahye, Laawi la kahe usu raahe.

¹⁵Saahka Yeesso min Laawi kagolossataayi, ꞌdooꞌdoo kooddi goocho ittaawe ichoow ꞌdooꞌdoo ꞌdooꞌdi uskeel leh liiekkaacho ittaawe yimiyye, Yeesso ichoow abattitiis ba leegolossate. A mehe ꞌdooꞌdi buurenye usu sooraahe.

¹⁶Tagaammeti amurre iche laka Farissaayee la, Yeessohi ꞌdooꞌdi iꞌdaase leegolossati agarte. Wihi iche abatti Yeesso worsatte, “Yeesso a iꞌdoh ꞌdooꞌdi kooddi goocho ichoow ki uskeel leh ileegolossata?”

¹⁷Yeesso la chirri us wihi icho essaan daage ka wihi us iyidah, “ꞌDooꞌdi ilkitárri yowti ki feffeyyan menye, iꞌdaasenyi a ki khakkhannan. ꞌDooꞌdi an iimiyye an waho, ki ꞌdooꞌdi fiffissan isiekkaacho menye, iꞌdaasenyi a ki uskeel leh.”

¹⁸Maantoo abatti Yoohanahi Enenyet Baattissiyo ichoow Farissaayo af hiitaane jirte. ꞌDooꞌdoo la yimiyye, wihi us Yeesso worsate, “A iꞌdoh abatti Yoohana ichoow too Farissaayo af ihiitaane, abattitaah la af ihidan?”

¹⁹Yeesso wihi us ilaabe, “ꞌDooꞌdi mindischo yimiy af ma hiiti geeddi eti min disti intaas kijiro, menya? Geeddi eti min disti on leejiro af ma hiitaan.

²⁰Iꞌdaasenyi maane a tamiit, ti ꞌdooꞌd eti min disti lakakhaato. Maantaase ꞌdee ꞌdooꞌd af hiita.”

²¹Yeesso la yeed orey iwoye, wihi us yidah, “Et goonankoo dafareete husub gaaddiisti raagane kharradde kadaddabo mele. Chirri us iꞌda yeele, goonankaas husub a isinyaama gaaddi raagan la kharradiche orey isohta geeddi oraat laka kuta.

²²Ommolla et farsoti sabiibe husub urgohi uktoote raagan kachibo mele. Chirri iꞌda layeele farso urgo a fuurissa doossa, farso lawaaya urgo laka lawaaya. Iꞌdaasenyi farsoti sabiibe husub urgohi uktoote husub on lakachiba.”

²³Maalinkoo Seeri Lanasee Yeesso abattitiis khabaayi gosase goya raaha. Geedda icho ꞌdulaan, abattitiis ilmohoo ꞌdargaayye guratte.

²⁴Farissaayo wihi iche Yeesso itidah, “Yey, abattitaah a iꞌdoh Seeri Lanaso ka wihi amurre ꞌdiiꞌddantahe iyeessa?”

²⁵Yeesso wihi us ilaabe, “Atin injire wihi Dawuud yeele maanti usu ichoow ꞌdooꞌdi us khabe ba raarahteen Yeedi Waakh ka ma soomin a?

²⁶Maanti Abiyaaꞌdar kuhaanihi weyti ween eheet, Dawuud uranti minki Waakhe gele, makaateti Waakh liibahche yuhuyye, toro reeri leejire laka wohoo siiche. Amurreti laraaho ka la kuhaaniyyo kaldaye makaatetaas yaham.”

²⁷Yeesso ꞌdeerka wihi us ilaabe, “Seeri Lanaso iroonoti enenyete liiyeele, enenyet mee Seeri Lanaso liiyeele.

²⁸ꞌDeerka Ínam Aadam a Kamuri Seeri Lanaso laka.”