Read rendile Marko 4 Bible Online

Marko 4 - rendile bible

Marko 4

¹Yeesso toro beyti Gaalilaaya afiche ka, Wori Haaggan enenyet abche. Jeenteti ururi weyti buure iyimiy u, Yeesso koobanhoo goya koorronte, enenyet la bey afiche khaariche, dagansate.

²Enenyet mammaho ka wihi buure abche, wihi us yidah,

³“Dagansada bal! Etoo gos khabo a irte ilmo harra kachibaa.

⁴Ilmoha us taaꞌhicho, gaasoo jit goya kadiheene, chimbiro la yimaateene, yumheen.

⁵Gaasoo ilassi ngꞌaajjeenye harrati rucchul khabto kadiheen. Wahaas dowwa on soobaheen, a mehe harra rucchulee.

⁶Iꞌdaasenyi chiꞌ orrahe soobahte ka, orrahe geeyohaas soobahe gubte. Hiiyyaye laa yihiin gone, angageen.

⁷Gaasoo laka inti geeyohi rurrucchule kudah khabo kadiheen. Geeyohaas la geeyohi soobahe afcheene ꞌdeerka gurnaan icho deleen mele.

⁸Gaasoo la inti harrati haaggan khabto kadiheene, mujjum baheene, weynaateene, gurnaan deleen. Gaasoo kol tomon seyyah deleene, gaasoo kol tomon lih deleene, gaasoo laka kol kudoo deleen.”

⁹Yeesso ꞌdeerka wihi us yidah, “Eti dogo khabo, a daago giꞌde!”

¹⁰Yeesso inkoo us keley yitah, ergaanotiisti tomon ichoow lammee ichoow ꞌdooꞌdoo usu sooraahe iyimiyye, wihi mammahohaas yihiin worsateen.

¹¹“Waakh atine wihi dagsane dakhi Waakh miinsan atin siiche. Iꞌdaasenyi ꞌdooꞌdi kharaat walah tuumman ka a liimammahta,

¹²ꞌdeerka, “ ‘Walah a yeyaane, yeyaane, iꞌdaasenyi jirtuu ma gelaan. Toro la a dagansataane, dagansataane, iꞌdaasenyi jirtuu ma abtaan. Chiꞌiche iꞌdaas ieheynan, uskeelicho a kasoonokhanne, Waakh la uskeelicho ikakuta.’[4]”

¹³Yeesso ꞌdeerka wihi us icho iyidah, “Chirri atin mammahta wihi iche tahe igaran, sag ꞌdeerka atin mammahohi addan wihicho iabattaan mele gon.

¹⁴Etaas gos khabo, a eti Yeedi Waakh taaꞌhicho.

¹⁵ꞌDooꞌd gaasoo a iꞌdi ilmohi jit lakachibe. Waha a inti Yeedi Waakh lakataaꞌhicho. Uus icho Yeedi Waakh daagaan, Seytaan chirraas on yamiite, yeedaas icho daageen kakhaata.

¹⁶ꞌDooꞌd gaasoo la, a iꞌdi ilmohi ilassi ngꞌaajjeenye harrati rucchul khabto lakachibe. Yeedi Waakh uun icho daagaan, hamaadi buure ka khaattaan.

¹⁷Iꞌdaasenyi hiiyyay icho khabaan mele, mujjum ma tolossataan. Maanti jeenteti Yeedi Waakh u sinatoo isoobahte ommos sina loomhiche, dowwa on soodihaan.

¹⁸ꞌDooꞌd gaasoo a iꞌdi ilmohi inti geeyohi kudah khabto lakachibe. Icho Yeedi Waakh a daagaane,

¹⁹iꞌdaasenyi dowwa on waꞌdwaaꞌdi harrata ichoow ꞌdamaanki kamurroon ichoow wahanyeyyohi addane liimoono ba Yeeda afchaane, gurnaan icho delaan mele.

²⁰ꞌDooꞌd gaasoo a iꞌdi ilmohi harrati haaggan lakachibe. Icho Yeedi Waakh a daagaane toro khaattaane, gurnaanki buure delaan. Gaasoo kol tomon seyyah delaane, gaasoo la kol tomon lih delaane, gaasoo la kol kudoo delaan.”

²¹Toro wihi Yeesso iyidah, “Etoo taa a bolkhicha, ꞌdee baakhuul kaankuba ommos siriir iliche gessa? Taa wohoo menya korcho?

²²A mehe wihi dagsan a lasoobahcha, wihi oboobsan la ꞌdowe liisoobahcha.

²³Chiꞌ etoo dogo khabo, a daago giꞌde!”

²⁴Toro wihi us iyidah, “Waha atin daagtaan la, weyti dagansada. Geeddi atin ꞌdooꞌdi addan iyeessaan geeddaase atin liiyeela, toro la ꞌdirihiis atin liiyeela.

²⁵Eti tuummane wihi dahan lagesse mujjum woywoye a liikakhaya. Iꞌdaasenyi eti wihi dahan lagesse mujjum iwoywoyin, wihi us khabo laka a lakakhaata.”

²⁶Yeesso toro imammahte, wihi us iyidah, “Mammahtoo addane dakhi Waakh cheekto talla. Etoo ilmohi golole il gessa, kataba.

²⁷Maalim ichoow ibeen us uꞌduryeey ommos neybaayyeey ka ba, ilime a bahta one weynaatta, chuꞌus saggi iche ibahto igaran laka.

²⁸Harra on gurnaan bihissa, kolooraat la geeye bihissa, geeyaas ꞌdeerka ilim dela.

²⁹Uuꞌ gurnaan bissaati on yamiite warhanti gurnaan lakagoocho ka goocha, a mehe a maanti gurnaanee.”

³⁰Toro mehe iyidah ya, “Kamalda bal, dakhi Waakh a koo meheenye nadeeh? Toro la mammahtoh iꞌdi uꞌ yahe dowdowta?

³¹Dakhi Waakh a iꞌdi ilinti geeyi dahare, iche la ilmo goyaka a ilinti weyti rucchule il lagesso.

³²Maanti il lagesse iche soobahte la, gos goyaka geeyi geeyo tuumman kabuurenye liikhimohi burbuure khabo tateeh. Chimbirohi saraat la oosintiis kafiddiyaan.”

³³Yeesso mammahohi ittaawenye tan iyoog ka, wori Waakh geeddi icho aban yabuuꞌdiin icheeke.

³⁴Enenyet mammah on menye, wohoo addan walah ma kaabin. Iꞌdaasenyi maanti icho keley yahiin, abattitiis mammahohaas wihi icho yahiin a icheeke.

³⁵Maalinkaas geleb ka, Yeesso abattitiis, “Beyta Gaalilaaya maahno, aficheki ꞌdiri a iranni,” iyidah.

³⁶Abatti Yeesso iꞌdiis yahaayi khaatte kooban kaleedihte, dowte, urur bey afichekaas katabte. Koobanohoo addan laka kicho a leejireen.

³⁷Hafaroo buure la yimiyye bicche irtoo uskul bahcheene, kooban ꞌdollo jaheene, ichoowka bicche kooban goya isootabeene, buuhin leheet.

³⁸Yeesso la kootte reentoo ꞌdaꞌddabakhenye matah gessate, kooban ꞌdubichekuus ka a urꞌda. Abatti Yeesso kihisse wihi iche itidah, “Eti weenoow, innoha bicche inno khaataan laka aw ma inno ikhabto ba?”

³⁹Ulla sookahe, hafar leejaakhe, ir “Gammadicha! Yaasa!” iyidah. Hafari kootte ir kahcho, baabe beye rukkuy goosse.

⁴⁰Wihi us abattitiis iyidah, “A iꞌdoh iꞌduu iburꞌdowteen? Atin uliba Waakh ma kakhuuftaan a?”

⁴¹Iche tuumman weyti nahte, wihi iche isworsatte, “Icho eta a ayyo? Hafar ichoow ire laka yeediis daagaan?”