Read rendile Marko 5 Bible Online

Marko 5 - rendile bible

Marko 5

¹Beyti Gaalilaaya aficheki ꞌdiri eleeleen. Wahaas a ili ilkerengeetohi Geraasa layadeeh kijiro.

²Chirri Yeesso kooban kasooyage ka, etoo ginna dakhatti, goꞌddassi enenyet lakahawwaalo kasoobahe, usu ꞌhele.

³Eta fiddihiis a goꞌddassaas hawwaaloot on. Ét biingoyyo ka laka jeyin yabuuꞌd mele.

⁴A mehe biingoyyo luhlo ichoow dahano geeddi buure lakahidhida, iꞌdaasenyi kol dakkhan biingoyyohaas goggooche, gaꞌdaarreti luhlo lakahide laka bar tire. Et miigti jeyisso khabo mele.

⁵Maalim ichoow ibeen ba goꞌddassaas hawwaaloot ka, ichoow kuro ka riirit a tuma, dagah laka sar iskagoggoocha.

⁶Chirri us Yeesso foga kaarge ka, soonyaame, ortiis ka jilbo il kaguꞌdde wahte.

⁷Deeddi us yabuuꞌd dakkhan riire, “Yeesso, weeli Waakkhi weynaan tuumman tiis tahe, at mehe ikaꞌdoonta? Magahi Waakh ka daato, bolokh iitusin!”

⁸A mehe Yeesso chirraas mehe idowa ya, “Ginnata, eta goya kabah!”

⁹Yeesso ꞌdeerka, “Magahaah a ayyo?” worsate. Wihi us ilaabe, “Magaheey a Ururi Iskareet, a mehe nah a ittaawee.”

¹⁰Yeessó hahhawwaaste, uus icho ilaas kaguurin.

¹¹Woyhoo buurenye golcha la, burroo intaas idow, iche tahariis yaakha.

¹²Ginnayyo Yeesso hawwaasteene, “Golcha goya nah iꞌdii! Alley goyche a gello!” iyidaaheen.

¹³Yeesso amur siiche, ginnayyo golcha goya itabeen. Woyhi golcha geeddi elif lammee, orye bur kakhubte, beyti Gaalilaaya goya itabe, usu tuumman ba bicche khaateen.

¹⁴ꞌDooꞌdi golcha yaakhicho orye, ilkerengeet ichoow ilaas tuumman ka wihi yitah cheeke. Enenyet la soobahe wihi yitahye yeyaa.

¹⁵Chirri ꞌdooꞌd Yeesso iyamiit, eti ginnayyohi ittaawe dakhteen usuhi samacchaar fiddiyo, darfo mujjum gessate matah la haagsate argeen. Enenyet roorro gesse.

¹⁶ꞌDooꞌdi kootte wihi yitah arge la, wihi eti ginnayyo dakhteen ichoow golcha kayitah ꞌdooꞌdi addan icheeke.

¹⁷ꞌDooꞌd ꞌdeerka Yeesso hawwaaste, ꞌdee ilicho a katabo.

¹⁸Chirri Yeesso kooban goya kidiho, etaas kootte ginnayyo dakhteen Yeesso hawwaaste, usuhi raaho daahe.

¹⁹Iꞌdaasenyi Yeesso wihi us iyidah, “Mele, nyaam goobaah iro, geeddi Kamuraah kiyeele, ichoow saggi us uur ikaasoonugleeste, ꞌdooꞌdaah icheek.”

²⁰Et ꞌdeerka irte, Dekaabolis[5] goya tabe, geeddi Yeesso iyeele cheeke. Eti daage tuumman weyti girmeeste.

²¹Inkoo Yeesso kooban ka toro bey afichekuus imaahe ka, bey hagga kijiraayi ururi buure kasoourure.

²²ꞌDeerka etoo ꞌdooꞌdi minassi weysiite Yaꞌhuud itoollo kichokoowenye Yaayiro layadeeh intaas yimiy. Yeesso arge, luhlohiis kakufe,

²³hawwaaste, “Inanteeyti rucchul a omoot. A kihawwaasde, kaale dahan kaꞌdaare, ꞌdee a samaatti jiro a ꞌhesso,” iyidah.

²⁴Yeesso ꞌdeerka makhaábal raahe. Enenyeti buure laka raahe, ꞌdollohiis tuumman ka enenyet a ishude.

²⁵Ururaas goyaka la makhaabassoo khannane guꞌh tomon ichoow lamma ba hugunkiche tolossawwaaye, diig on ꞌdulo a jirta.

²⁶Chirri iche ilkitarrinyeti ittaawe iiratte sina tuhum laka, a samaawwaayte. Wihi iche khabte tuumman massisse toro ma deefsanne, a kaꞌdarsatte on.

²⁷Chirri iche Yeesso woriis daagte ka, ꞌdubiis leetimiyye urur goyaka kabuuꞌdiis ꞌdaarte.

²⁸Uuriche goyaka, “Chirri an gaaddiissa on ꞌdaare, a samaada,” iche tidah.

²⁹Chirraas on diiggi ꞌdulo tolossate, sartiche ka saggi sinatiche liikabukkhiche agarte.

³⁰Chirraas on Yeesso saggi miige sar ikabahte abte, urur goyaka urgiye, “Ayyo gaaddeey ꞌdaare?” worsate.

³¹Abattitiis la wihi iche ilaabte “At saggi ꞌdooꞌd isisootakho a agarta, iꞌdaasenyi ‘Ayyo iꞌdaare?’ worsatta.”

³²Iꞌdaasenyi Yeesso enenyet indo leeraahe, eti ꞌdaare yowte.

³³Makhaabale ꞌdeerka wihi kayitah agarte, ichehi roorro ka hamarto timiyye, ortiis ka il guꞌdubte, rum tuumman icheekte.

³⁴Ulla wihi us iyidah, “Inantaay, kakhuufnaanki at ikakhuufte a kisamaache gone, tab giꞌde nebey leeiro, sinati sugeer kikeene a lakasamaachee.”

³⁵Yeesso yeedaas af kakhabaayi, ꞌdooꞌdoo goob Yaayirohi minki weysiit itoollo kayimiyye wihi icho iyidaaheen, “Weel a massate. A iꞌdoh uliba eti ween immarah sina ikawaarissa?”

³⁶Yeesso la wahaas icho essaan nabah laka ma isudine, eti minki weysiite Yaꞌhuud itoollo wihi us iyidah, “Roorro akhabine, ani on irummeyso.”

³⁷Beetero ichoow Yaakoobo ichoow walaal Yaakoobohi Yoohana layadeehe us khaatte on menye, ꞌdooꞌdi addan tuumman et us khaatte mele.

³⁸Chirri icho minki eti minki weysiit itoollo yimaateen ka, Yeesso saggi enenyet iriiro, iooyo, iuwwicho arge.

³⁹Min goya gele, enenyet mehe worsate ya, “A iꞌdoh iriirtaane iuwwissaan? Weel ma umaatane, iꞌdaasenyi a urꞌda!”

⁴⁰Iꞌdaasenyi Yeesso kareyteen. Enenyet tuumman khar ibahche, weel abarche ichoow aabbahiche ichoow abattitiisti seyyahe khaatte, meessi weel jiifo geleen.

⁴¹Inám dahan sookhabte, “Taliiꞌda kuum!” iyidah. Iꞌda ka mehe leessa ya, “Inantaay sookahe kidowa!”

⁴²Chirraas on sootolossatte sohatte. Iname la guꞌh tomon ichoow lamma khabte. Enenyet uuꞌ wahaas yitah arge, weyti girmeeste.

⁴³Yeesso la weyti katirriinsate amur ibahche, uus etoo kalday laka yeeda garan. Weel wohoo us yaham a lasiicho yidah.