Read rendile Marko 6 Bible Online

Marko 6 - rendile bible

Marko 6

¹Yeesso intaas katabe, ilkerengeetti goobicheenye Naasaret layadeeh irte, abattitiis khabaayi.

²Seeri Lanaso ka, minki weysiite Yaꞌhuud ka enenyet Yeedi Waakh abin sookhabte, enenyeti buurenye usu daage weyti girmeeste. Wihi icho worsateen, “Us eta waha tuumman inta us kaabte a intoh? Kharata deeddeenye lasiiche a toh? Saggoh waha weeli enenyet yeelin iubaaꞌdan iyabuuꞌd?

³Eta tagaanki khoꞌdoomme diso menya? Maariya abartiis menya? Yaakoobo ichoow Yuuda, ichoow Yoosse, ichoow Siimon menya leedesse? Waha la albehi leedesse menya inno leejiro?” ꞌDooꞌd la usu kahollowe.

⁴Yeesso ꞌdeerka wihi us icho iyidah, “Eti Waákh íyeyyeedo goobicho ka ꞌdooꞌdi uuriise ichoow yaaftiis kalday on iinkaanyitin.”

⁵ꞌDooꞌdoo rucchule khakkhannane us dahan korche samaache on menye, wihi weeli enenyet yeelin iubaaꞌdan intaakka yeelin ma ubaaꞌdan.

⁶Ulla girmeeste icho ikakhuufinee. Yeesso ꞌdeerka goobassi intaas kamarsan marche, Yeedi Waakh abche.

⁷Abattitiis tomon ichoow lammacho ba isiwahe, lallamma ka ili kharaat ierge, antohi icho ginnayyo enenyet goya kabahchaan laka siiche.

⁸Wihi us leefarme la a iꞌda, “Wul on menye, wohoo addan asiꞌdanna. Golol ommos ugar ommos chilimme asiꞌdanna.

⁹Kobo gessada, ubbaari deere atin khabtaan on menye, koo addan agessanna.

¹⁰Meelbaaw atin gessaan ka, minkaas on fiddiya ichoowka maanti atin ilkerengeettaas kabahtaan.

¹¹Meelbaaw atin liikamartiisanne ommos atin liidagansan, ebeeri luhlo atin fuulo sahda geedda atin bahtaan. Waha a garti ichó cheekatti.”

¹²Abatti bahte, Yeedi Waakh cheekte, enenyet tuumman la, “Uskeeliin kasoonokhda,” itidah.

¹³Ginnayyohi ittaawe enenyet goya kabihisse, ꞌdooꞌdi ittaawenye khakkhannan laka subakki geeyi oolif ka matah subahte, samaasse.[6]

¹⁴Karnati ꞌHerood layadeeh la waha tuumman daage, a mehe magah Yeesso weyti ballaaste. Enenyet gaasoo mehe essa ya, “Yoohanahi Enenyet Baattissiyo iche omoot lakasookahche! Miigta iꞌdeenye goytiis ka hil haaggisso, wihi enenyet iubaaꞌdan us yabuuꞌd, a jeentetaas on.”

¹⁵ꞌDooꞌd gaasoo laka mehe essa ya, “Eta a Eliiya.” Gaasoo la mehe essa ya, “Eta a eti Waákh íyeyyeedo, a iꞌdi makhaaballeti goorat Waakh iyeyyeeddo kichekoo.”

¹⁶Iꞌdaasenyi ꞌHerood maanti us waha leessi daage ka, mehe yidah ya, “Yoohanahi goorat an matah gooche iche omoot lakasookahche!”

¹⁷ꞌHerood rubeytiissa ꞌdooꞌd erge, Yoohana lasookhabte, jeela ka lahide. A mehe ꞌHerood ꞌHeroodiyati makhaabál walaaliiski Fiilif layadeehe diste.

¹⁸A mehe Yoohana mehe ꞌHerood idowe ya, “Amurre ichoow khaatannaanki at makhaabál walaalaah khaatatti ma israahaan.”

¹⁹ꞌHeroodiya ꞌdeerka mogtaas Yoohana isiꞌdatte, ogoos ꞌdoonte. Iꞌdaasenyi ogoos ma tabuuꞌd,

²⁰a mehe ꞌHerood Yoohana karoora, saggi us etoo fissane toro munyee iyahe iche garta. A toorriba laka. Kolbaaw us Yoohana dagansate, mal la gela. Iꞌdaasenyi toro, weyti dagansan ꞌdoona.

²¹Saahka maane soomarte, ti ꞌHeroodiya ꞌdoonte, a maalinki goorat ꞌHerood dessee. ꞌHerood ꞌdooꞌdi sirgaaliis ka ichoow kiyatiis ka wewween, ichoow kamurreti Gaalilaaya magah khabto soowahe, sukuuku bahche.

²²Inám ꞌHeroodiya soogesse, ꞌdurte karnat ichoow martitiis ba hamaadisse. Karnat wihi us inám iyidah, “Walahbaaw at ꞌdoonto soodah amballa kisiichaa.”

²³Daarte, wihi us iyidah, “Walahbaaw at daahto a kisiicha, ichoowka nyuusi ili an andi laka.”

²⁴Iname khar ibahte, abarche mehe worsatte ya “Mehe maanta idaahe?” Abarche mehe ilaabte ya, “‘Matah Yoohanahi Enenyet Baattissiyo ꞌdoona,’ dah.”

²⁵Iname chirraas on tiriyye, karnat iiratte wihi iche itidah, “Atihi matah Yoohanahi Enenyet Baattissiyo karam isookorisso, toolla kofche isiisso, iche ꞌdoona.”

²⁶Karnat weyti uur suujowe. Iꞌdaasenyi jeenteti wihi us idaatte ichoow jeenteti martitiis u, wihi iname daahte usuhi tirti ma ꞌdoonin.

²⁷Chirraas on ꞌdeerka eti iskareete ꞌdooꞌdi hidan yagiis erge, yeed kaguꞌdde matah Yoohana sookhaat iyidah. Eti iskareet la jeela irte Yoohana matah soogooche,

²⁸matah karam sookorche. Inám karam ikeene, iche la abarche siisse.

²⁹Chirri abatti Yoohana wihi yitah daagte ka, timiyye sartiis khaatte goꞌddoo ka hawwaasse.

³⁰[7] Maanti ergaano soonokhatte, iche ichoow Yeesso kulmeen ka, wihi iche yeesse ichoow wihi iche enenyet abisse tuumman icheekte.

³¹ꞌDeerka abattitiis wihi us iyidah, “Kaaleya, intoo khaawwan a iranni, ꞌdee atin laka iꞌdaaru nasa.” Jeenteti ꞌdooꞌdi yamiit ichoow ki nokhti ibuuraatuu, Yeesso ichoow ergaano ba sag icho igolossataan mele.

³²ꞌDeerka keley kooban goya kidiheene, intoo khaawwan irteen.

³³Iꞌdaasenyi enenyeti buure maanti iche kahto arge, toro la eti icho yahiin garte. ꞌDooꞌd la ilkerengeeto tuumman kasoobahe, luhlo on ka inti Yeesso illeh isohtaan ioryeene, geeddi kooban yomboochaan meel eleeleen.

³⁴Chirri beyti Gaalilaaya afiche ka Yeesso kooban kasooyage ka, urura buure arge. Weyti uur inugleeste, a mehe ꞌdooꞌdaas a iꞌdi iiyti ersim laa. ꞌDeerka wihi ittaawenye Waakh miinsan abinnaan sookhabte.

³⁵Geedda ka il a ibeennowe, abattitiis itimiyye, mehe itidah ya, “Il kola a ibeennowe, inta la a yib alah.

³⁶ꞌDooꞌd laabe, a irti gosasha ka, ichoow goobassi soodow ka, wohoo icho yamhiin a soogatteen.”

³⁷Iꞌdaasenyi wihi us ilaabe, “Atin rubeytiin wohoo icho yamhiin siicha.” Icho la wihi icho iyidaaheen, “Rumanka wahaas chilimmeti eti hay siyyeet hil haaggiche laguto khaataan! Nahi chilimmeti geeddaase golol ganno wihi icho yamhiin siinno ꞌdoonta?

³⁸“Makaate geeddoh khabtaan?” worsate, “Nyaama bal yeya,” iyidah. Chirri iche abatte ka, “Makaate chan ichoow bahag lamma jirta,” tidah.

³⁹Yeesso ꞌdeerka abattitiis amur ibahche, enenyet seley a goggoosso, koobbino ka hoosi ulhaw a koorronti.

⁴⁰Enenyet ꞌdeerka kukkud ka ichoow tomon chacchan ka orronte.

⁴¹Makaateyyohi chane ichoow bahaggi lammee khaate, serey yeye, Waakh kalaꞌd ilaabe, makaateyyo la jejjebche. ꞌDeerka abattitiis idiibe, ꞌdee enenyet a gisso. Bahaggi lammee laka jejjebche icho tuumman gise.

⁴²Enenyet tuumman golossate, darge.

⁴³Abatti la enjel tomon ichoow lamma makaate ichoow bahaggi laajjebche lasoowaache buuhaan soosuunte.

⁴⁴Mejeli golossate, tiriis a geeddi alif chan.

⁴⁵Yeesso chirraas on abattitiis kooban gesse, geeddi us urur kahcho, iche la ortiis inti beyti Gaalilaaya afichekuusenye Bessaayda layadeehe iratta.

⁴⁶Inkoo us icho bariitiche ka, Yeesso burroo kore, Waakh wahte.

⁴⁷Chirri il gelebnowe ka, kooban bey ukkuricheeda raahaane, Yeesso la keley on meessi kootteet kijira.

⁴⁸Saggi abattitiis khoꞌdoommeti kooban lakawoyo ka kooban downaan ileefaddo arge, a mehe hafare icho jeychaa. Geedda baryo kasoodowwaatte ka, Yeesso bey sarche kasohte, iirte, kakutin leheet.

⁴⁹Iꞌdaasenyi chirri iche usuhi bey sarche kasohti agarte ka, meleyka koogtahe, riirte.

⁵⁰A mehe iche tuumman a agarte, nahte rubey kabahte. Yeesso chirraas on, “Anahina, a ani roorro akhabina,” iyidah.

⁵¹ꞌDeerka kooban kaleedihe, hafar tolossate. Abatti tuumman weyti girmeysatte,

⁵²a mehe girmohi makaateyyohi ittaawe walah iche kaabatte mele. Iꞌdi tahe uurassicho a ladagahnooche.

⁵³Chirri icho beyti Gaalilaaya afichekuus imaaheen ka, intoo Gennaasaret layadeeh yimaateene, kooban hideen.

⁵⁴Uun iche kooban kasooyagte, enenyet Yeesso kase.

⁵⁵Ilaas tuumman goya kooryeene, ꞌdooꞌdi khakkhannan siriiro kasoosiꞌdeene, inti Yeesso kijiro icho daageen ka igeecheen.

⁵⁶Meelbaaw Yeesso irte ka, ilkerengeeto eheetteey, goobab eheetteey ommos gosas eheetteey ka ba, ꞌdooꞌdichoki khakkhannan siriiro kasoosiꞌdaane, sokkoti ꞌdee us yamiit, geecheen. Hawwaasteene, “Alley bal laddi kabuuꞌdaah kalday laka a ꞌdaareen,” iyidaaheen. Eti tuummane ꞌdaare la samaate.