Read rendile Marko 7 Bible Online

Marko 7 - rendile bible

Marko 7

¹Farissaayotoo ichoow tagaammetoo amurre ilkerengeetti weene Yeerusaleem katimiyye, Yeesso khaarisse.

²Abattitiistoo dahanohi biꞌdire kagolossatti, geeddi icho igolossan dahano idikhan argeen.

³A mehe Farissaayo ichoow yaafohi Yaꞌhuud tuumman, hugumme aacchinyetichooda raahaane, ma golossataan geeddi icho koloo dahano idikhan.

⁴Toro la chiꞌiche sokko katimiy, ma golossataan sammata icho koloo dahano idikhan. Saggaas on u hugummeti noole raahta iꞌdi maanta ti kokkoobbe ichoow karmohi gaꞌdaarre ichoow ibiriikkhe ladikho.

⁵ꞌDeerka Farissaayotaas ichoow tagaammetaas amurre wihi icho Yeesso worsateen, “Abattitaah a iꞌdoh hugumme aacchinyeteen iraahine, dahanohi biꞌdire ikagolossatta?”

⁶Wihi us ilaabe, “Iskaayyeessooy, Isaaya maanti us wori Waakhe atin miinsan kaayyeede a eysiiche. Wihi chiiran, “ ‘ꞌDooꞌda af on ka ikoolicha, iꞌdaasenyi uuricho goyaka foga ileejiraan.’

⁷Immarah on iwahtaan. Hugummeti enenyet soouume iꞌdi amurreti Waakh u enenyet abchaan.[8]

⁸Amurreti Waakh a ꞌdiissaane, hugunki enenyet jurkhissaan.”

⁹Yeesso toro mehe iyidah ya, “Atin jita ekkeysi atin amurreti Waakh ꞌdol ilaabtaane ꞌdee hugummetiin raahtaan ka enenna a tagaammee.

¹⁰A mehe Muusa amurane cheeke, ‘Aabbahaah ichoow abartaah inkaanyit’ ichoow ‘Eti aabbahiis ommos abartiis falo a layigaase.’

¹¹Iꞌdaasenyi mehe elattaan ya, etoo a geeddi us aabbahiis ommos abartiis, ‘Gargaari atin ikasugtaan a siinti an Waakh ibahche,’ iyadeeh on. Gargaara Korban iche layadeeh.

¹²Etaas ꞌdeerka gargaari us aabbahiis ommos abartiis gargaaro a tiratteen gon.

¹³Iꞌdaas ka antohi Yeedi Waakh a ꞌdiiꞌddaane, hugunkiin enenyet abissaan. Atin wahanyeyyohi iꞌdaasenye ittaawenye yeessaan.”

¹⁴Yeesso toro urur tuumman isiwahe wihi us iyidah, “Idagansada, waha la abda.

¹⁵Walah enenyet khar ka gelo usu biꞌdirroocho mele, wihi enenyet uuriis kasoobaho on enenyet biꞌdirroocha.” [9]

¹⁷Inkoo Yeesso urur katabe ka minkoo gele. Intaas ka abattitiis mammahti kootte us yidah, wihiis a mehe worsatte.

¹⁸“Atin laka walah atin gelo mele?” worsate. “Ma abattaan a, walah enenyet khar ka gelo biꞌdirroocho mele.

¹⁹A mehe rubeytiis ma gelaane, iꞌdaasenyi holoolo on gelaane sartiis kabahaan.” Yeesso la wahaas us yidah ka, saggi golol tuumman biꞌdir ieheynane tuse.

²⁰Yeed orey iwoye, “Enenyet wihi goytiis kasoobaho iche biꞌdirroocha.

²¹A mehe enenyet uuriis goya iche mali suuje kayamiit iꞌdi maanta, ꞌdooꞌdi isidisanne isleeurꞌdo, hatto ichoow ogoossi dubunuunu lagelo.

²²Wihi addan a mejeli makhaabassi tiis ieheynan leeurꞌdo, ꞌdamaam, uskeeli layeelo, ekkeysi, sohoꞌddarri, kalꞌdarri, ham, rannyaat ichoow ꞌdalammoon.

²³Uskeelaas tuumman a ki enenyet goytiis kasoobaho biꞌdirroocho.”

²⁴Yeesso ili Gaalilaaya kakahe, ilassi ilkerengeetti Tiiro idow irte. Minkoo gele usuhi enenyet saggi us intaas ikijiro abti ma ꞌdoono. Iꞌdaasenyi emeettiis ma dagsanto.

²⁵Makhaabassoo inanticheti rucchul ginna dakhatti uus iche emeettiis daagte on timiyye luhlohiis ka il guꞌdubte.

²⁶Makhaabassa la a yaaftoo Yaꞌhuud ieheynane ili Siiriya ka intoo Foniikiya layadeehe kadelatte. Yeesso hawwaassatte, wihi iche itidah, “Ginna inanteey goya kabihi!”

²⁷Iꞌdaasenyi arám iiyeyye, “Alley, koloo nyaakhut a golossati, a mehe gololi nyaakhute lakhaato kararre liikhubo ma haaggan.”

²⁸Wihi iche ilaabte, “Aa, Kamuraaw! Iꞌdaasenyi kararre laka, kombor iliche ka wihi nyaakhut kididdihe a suunatta on gon.”

²⁹ꞌDeerka wihi us iyidah, “Jeenteti wihi at tidah u, tab ginna weel a kabahtee.”

³⁰Goob iratte inantiche ichehi siriir kajiifto ꞌhesse, ginna la a kabahte.

³¹Yeesso saahka ilassi Tiiro idow kabahe, ilassi Siidon goya tabe, ilassi Ilkerengeetohi Tomone leeyimiyye Beyti Buurenye Gaalilaaya yimiy.

³²Etoo dogo laaye yeyyeed leeꞌhoolyahe liikeene, enenyet tuumman Yeesso hawwaaste, ꞌdee dahan a korcho a samaacho.

³³Ét ꞌdol geeche, nabho farro gesse, farro iskatufe, hanjuf harrab kaꞌdaare.

³⁴Serey yeye, “Eꞌh!” yidahye, toro, “Effaaꞌda” yidah. Iꞌdaakka la “Furam!” iche leessa.

³⁵Chirraas on et dogo bakkaaheene, harrabiis furname, mujjum yeyyeede!

³⁶Yeesso urur amur ibahche uus icho wahaas cheekin. Iꞌdaasenyi urur geedda us amur ibahcho, geeddaas ꞌdirihiissa yeed taaꞌhiche.

³⁷ꞌDooꞌd weyti girmeeste, mehe essaan ya, “Wihi us yeele tuumman weyti haagganyihiin. Dogowaayyo ichoow afwaayyo laka a haaggicha!”