Read rendile Luuka 24 Bible Online

Luuka 24 - rendile bible

Luuka 24

¹Baryoti ibeenki oraate teebataas ka, deyyeho uyuuggeti iche haaggisse khaatte goꞌddi Yeesso lakahawwaale iratte.

²Daddaabti goꞌd afiche lagesse ichehi laꞌdembeleeliye ꞌheleen.

³Iꞌdaasenyi chiꞌicho goꞌd goya geleen ka, sar Yeessohi Kamure goya kawaayeen.

⁴Waha ka ngꞌaayaani chirraas on et lamma darfohi iꞌdi ankhad u ababo khabto garabicho tolossateen.

⁵Deyyeho nahtim ka foolassicho ka il yeyte. Iꞌdaasenyi reeri kootte lammee wihi us iyidah, “A iꞌdoh eti jiro ꞌdooꞌdi tuume goya ikayowattaan?

⁶Inta ma kijiro, omoot a kasookahe. Wihi goorat maanti us Gaalilaaya kajiro us atin iidah kasooꞌhela.

⁷‘Wihi massan Ínam Aadam dahanohi ꞌdooꞌdi uskeel lehe lagessa, massalaaba lakakaaha, ibeenki seyyahnaatteet ka omoot lakasookahcha.’ ”

⁸Deyyeho ꞌdeerka yeediis kasooꞌhesse.

⁹Inkoo icho goꞌd kasoonokhteen ka, waha tuumman abattiti tomon ichoow koowe ichoow ꞌdooꞌdi addan tuumman ba icheekte.

¹⁰Deyyehoti waha ergaano icheekte la a Maariyati ilkerengeetti Magdaala ichoow Yoowana ichoow Maariyati abar Yaakoobee ichoow deyyehoti addane leejirte.

¹¹Iꞌdaasenyi abatti deyyeho rummeysawwaayte, a mehe icho ka yeedi liidowo a wihi ilmarhaatteet on.

¹²Iꞌdaasenyi Beetero kahe anki goꞌddi Yeesso lakahawwaale inyaame. Goꞌd kagulguubsate, goya yeye, darfohi goorat Yeesso lakaayyuube kalday hawwaal goya kaarge. Ulla usuhi wihi yitah kagirmeesti irte.

¹³Maalinkaas goya abatti Yeessotoo lammee ilkerengeetti weene Yeerusaleem kabahte, ilkerengeettoo rucchule Emaawus layadeehe geeddi kiilomitta tomon ichoow koow jirto, iche isohatta.

¹⁴Geedda icho ꞌdulaaan, wori wihi yitahye kahawwoochaan.

¹⁵Geedda icho hawwoochaan, Yeesso rubeytiis garabicho gele, leesohte.

¹⁶Iꞌdaasenyi Waakh icho indo a hide, eti us yahe ma kasin.

¹⁷Yeesso wihi us icho worsate, “Atin geedda atin ꞌdussaan mehe kahawwoossaan?” Icho la tolossateene fool ribowe.

¹⁸Kichokoo Kiiliyooba layadeeh wihi us worsate, “Ati kaldaye marteenye ilkerengeetti weene Yeerusaleem ka wihi ibeenneta kutte yitah igaran?”

¹⁹Wihi us worsate “Mehe yitah?” Wihi icho ilaabeen, “Wihi Yeessohi Naasaret layeele. Us eti Waákh íyeyyeedo eheet. Yeediis ichoow wahanyeyyohi us Waakh ichoow enenyet tuumman ortiis ka yeele miige khabeen.

²⁰Kuhaaniyyohi wewween ichoow ewweenkeen ba dahanohi ꞌdooꞌdi omoot igoocho gesseene, icho la usu massalaaba kakaaheen.

²¹Iꞌdaasenyi nah usuhi ꞌdooꞌdi Issiraayel dowwanoha ka soofuro khajjeelle. Wihi addan la, uus waha tuumman yitaaheen, waha toolla a ibeenki seyyahnaatteet.

²²Deyyehotoo nah leejirto la maanta nah eyngꞌassaasse, kootte baryo on inti goorat eta lakahawwaale iratte.

²³Iꞌdaasenyi hawwaassi marahe sare goya ikajirin iirteen. Yimaateene saggi icho herti Waakh iargeen nah isoocheekeen. Herta la saggi eta ijiro nah isoocheekte.

²⁴Chirraakka wahalheenyokoo hawwaal irteene icho laka wihi kootte deyyeho tidah on argeene, iꞌdaasenyi eti goorat yumuy ma argin.”

²⁵Yeesso la wihi us iyidah, “Atin eenna a ꞌdalamme, toro eenna kakhuufnaanki atin wihi tuummane ꞌdooꞌdi goorat Waákh íyeyyeedo cheeke kakhuuftaan ka uurassiin a gaꞌdaale!

²⁶Wihi massane ꞌdooꞌdaas Waákh íyeyyeedo cheeke, Ki Lasubhe sinayyoha tuummane ꞌhela ꞌdee inti weyti us kaababo irta menya?”

²⁷Yeesso la wihi goorat usu miinsane Chiirnaanneti Waakh goya kachiiran ibabbakkaahiche. Uus buuggag Muusa lakasookhabti ichoowka buuggassi ꞌdooꞌdi Waákh íyeyyeedo chiireen tuumman icheeke.

²⁸Chirri icho goobi kootte icho isohtaan sooeleeleen ka, Yeesso etoo orey isohti iskayeele.

²⁹Iꞌdaasenyi soojeycheene wihi icho iyidaaheen, “Kaale a isleebariino orrahe kola a dihtee.” Ulla ꞌdeerka irte icho leefiddiye.

³⁰Chirra us komborti ballaaddane lakagolossati ka meessiis koorronte ka, makaate khaate Waakh kalaꞌd ilaabe, jejjebche, icho gisin sookhabte.

³¹Chirraakka reera indo lafure saggi eta Yeesso iyahe abteen. Toro chirraas on argiwwaayeen.

³²Wihi icho isworsateen, “Eta chirri kootte us jit ka inno leeyyeedo us Chiirnaanneti Waakh wihi kachiiran us inno isoobabbakkaahicho, rubeyoheen atte ka iꞌdi wohoo ꞌdab kabolkho menya?”

³³Chirraas on kaheene, anki ilkerengeetti weene Yeerusaleem inokhteen. Intaas ka abattiti tomon ichoow koowe ichoow ꞌdooꞌdi addane icho leejiro kulme ꞌheleene,

³⁴wihi icho iyidaaheen, “Kamur rumanka omoot ka a sookahe! Ulla Siimon a isoobahe!”

³⁵ꞌDooꞌdi kootte lammee laka wihi kootte geeddi icho jit kaꞌdulaan yitah cheeke. Toro la saggi icho chirri Yeesso makaate jebche eti u yahe iabteen ꞌdooꞌd icheekeen.

³⁶Geeddi ꞌdooꞌda kootte lammee ꞌdooꞌdi addan wor siicho, Kamur goycho tolossate, wihi us iyidah, “Nebeytiin ma furatti.”

³⁷Icho dakkhamba naheen kol icho meleyka argeene koogyihiine.

³⁸Ulla wihi us iyidah, “A iꞌdoh mal atin igele? A iꞌdoh geeyoha dakkhane atin ikamalin idowattaan?

³⁹Bal dahanoheey ichoow luhloheey yeya, a ani rubeytaaya. Iꞌdaara ꞌdee mujjum eti an ahe kasa. Meleyka jid ichoow lafo ma khabto, saggi atin ani iagarteene an ikhabuu.”

⁴⁰Inkoo us waha yidah ka, dahanohiis ichoow luhlohiis tuse.

⁴¹Jeenteti icho ihamaadaane toro igirmeestaan u, icho uliba saggi waha Yeesso iyahe ma rummeysanne, ulla wihi us worsate, “Wohoo golole a khabtaan?”

⁴²Icho la bahaggoo lakarche idiibeen.

⁴³Ulla khaate orcho ka yuhum.

⁴⁴Ulla wihi us iyidah, “Waha dakkhan a wihi maanti goorat an atin leejiro an atin icheeke, wihi tuummane ani imiinsane Chiirnaanneti Amurre ichoow ti ꞌdooꞌdi Waákh íyeyyeedo ichoow ti buuggi Sabuur lakachiire a labuuhicha.”

⁴⁵Ulla ꞌdeerka malicho fure ꞌdee wihi Chiirnaanneti Waakh goya kachiiran a abteen.

⁴⁶Ulla wihi us iyidah, “Wihi chiiran a waha. Ki Lasubhe sina loomhicha, ibeenki seyyahnaatteet ka omoot kasookaha.

⁴⁷Ilkerengeetti weene Yeerusaleeme lakasookhabta, antohiis ka wori uskeeli lakasoonokhti ichoow uskeeli Waakh enenyet ikakuto miinsan ꞌdooꞌdi harra tuumman liicheeka.

⁴⁸Atin a garti wahanyeyyoha.

⁴⁹Ani wihi goorat Aabbaheey atin iayyiche a atin isooerga. Iꞌdaasenyi koloo ilkerengeet goya akabahina ichoowka miigti serey katamiit a atin ogoogto.”

⁵⁰Chirri us abatti khaate ilkerengeetti Beꞌdaaniya idowwaache ka, dahanohiis serey iooge, abatti iweeste.

⁵¹Abatti iweestaayi, abatti katabe goobi Waakh liikorche.

⁵²Icho la usu wahteene, ichohi hamaadi buure khabo ilkerengeetti weene Yeerusaleem inokhteen.

⁵³Kol dakkhan minki Waakhe buure fiddiyeene, Waakh saaꞌdeen.