Read rendile Luuka 5 Bible Online

Luuka 5 - rendile bible

Luuka 5

¹Yeesso maantoo beyti Gennaasarete[9] toolla, enenyet la usu kuurure Yeedi Waakhe dagansataa.

²Ulla koobanhoo lammeenye beytaas afiche lakatabe arge. ꞌDooꞌdi kooban leh la oroohti bahag lakakhabti iche dikha.

³Yeesso koobanhoo kore. Koobanha la eti leh a etoo Siimon layadeeh. Yeesso la leeyeede ꞌdee kooban a leetakho bey afiche iꞌdaaru a kaseehicho. Yeesso ꞌdeerka kooban goya orronte, Yeedi Waakh ꞌdooꞌd abche.

⁴Inkoo us yeediis massiche ka, wihi us Siimon iyidah, “Bal kooban inti bicche kahogyahiin iwoye, ꞌdee oroohtiin bicche goya iseya, bahag khabda.”

⁵Siimon wihi us Yeesso ilaabe “Eti ween, nah ibeenki noole hol downe, bahag nah khabanne la mele. Iꞌdaasenyi jeenteti at iꞌdaas itidah u, oroohti bahag lakakhabti bey goya a kalugꞌda on gon.”

⁶Orooh bicche goya kalugꞌdeene, bahaggi weyti ittaawe khabteene ichoowka oroohe soogoote.

⁷ꞌDeerka wahalhichoki koobanhi addan fuulo dahan ka waheene, ꞌdee a gargaareen. Icho la yimaateene, kooban lammacho bahag labuuhiche ichoowka kooban bicche goya kabaabiin leheet.

⁸Chirri Siimonhi Beetero layadeeh wihi yitah arge ka, inkaanyit ka Yeesso ortiis ka jilbo il kaguꞌdde wihi us iyidah, “Kamur an a eti uskeel leh, nyaam ikatab.”

⁹A mehe Siimon ichoow wahalhiis tuumman ba bahaggi ittaawenye icho khabteen ka weyti girmeesteen.

¹⁰Yeele Sebedaayoti iche laka Siimon walhisse, Yaakoobo ichoow Yoohana leh laka weyti girmeysatte. Yeesso la wihi us Siimon iyidah, “Roorro akhabin. Uus toolla kakhabatti, enenyete Waakh ikeenta.”

¹¹ꞌDeerka koobanohicho jiiteene bey afiche geesse, walah tuumman katabte, Yeesso raahte.

¹²Yeesso ilkerengeettoo kajiraayi, etoo buꞌdatoo uskul sar tuumman kasoofoofte yimiy. Chirri us Yeesso arge ka fool il kakhabte hawwaaste wihi us iyidah, “Kamur, chirri at ꞌdoonto at biꞌdir ibihin a tabuuꞌd.”

¹³Yeesso dahan ooge, et ꞌdaare, wihi us iyidah, “A ꞌdoona, biꞌdir bah!” Chirraas on et buꞌda kabahte.

¹⁴Yeesso la amur ibahche wihi us iyidah, “Etoo kalday laka jit ka aleeyeedine, iꞌdaasenyi kuhaani iiro saggi at isamaatte istus. Sadakhati amurre Muusa kachiirane eti buꞌda lakabahche bahcho bihiche, ꞌdee garti saggi lakisamaache a titaahe.”

¹⁵Iꞌdaasenyi wori Yeesso miinsan weyti ilaas tuumman kataaꞌhe, ꞌdeerka ꞌdooꞌdi buure yimiyye wihi us ꞌdooꞌd abcho dagansate, ꞌdooꞌdi khakkhannan laka yimiyye lasamaache.

¹⁶Iꞌdaasenyi Yeesso kolassi ittaawe intoo us keley kayahe irte Waakh wahte.

¹⁷Maantooka Yeesso Yeedi Waakhe ꞌdooꞌd abcha, Farissaayotoo ichoow tagaammeti amurre la intaase fiddiyaan. ꞌDooꞌda la goobassi Gaalilaaya ichoow Yaꞌhuudiya ichoow ilkerengeetti weene Yeerusaleeme kayimaateen. Kamur la Yeesso miigti us ꞌdooꞌdi khakkhannan kasamaacho a siiche.

¹⁸ꞌDooꞌdoo la etoo sar tuumman hanjaawte ilaal kasoosiꞌde, ichehi min goyaka Yeesso ortiis tassille ꞌdoontaa.

¹⁹Chiꞌiche jeenteti urur buur iyahuu, inti iche gatto waayte ka, min sartiis korte. ꞌDohtoo yeesse, et ilaaliis khabaayi ꞌdohtaas ka il isoowoyte ichoowka urur ukkuriis ka Yeesso ortiis tissil.

²⁰Chirri Yeesso saggi ꞌdooꞌdaas ikakhuufo arge ka, wihi us etaas iyidah, “Aalaaw, uskeelaah a liikaakute.”

²¹Farissaayo ichoow tagaammeti amurre wihi icho uurassicho goyaka esseen, “Eta gafo a ayyo? Ayyo enenyet uskeeliis ikakuta, Waakh on menye?”

²²Yeesso la wihi icho kamassaan garte, wihi us worsate, “Mehede malassi iꞌdaase uurassiin ka idowattaan?

²³Mehe maanta ki addan kaꞌdabakhe, chirri an, ‘Uskeelaah a liikaakute,’ iadeeh a ommos an, ‘Kahe soho’ iadeeh?

²⁴Iꞌdaasenyi saggi Ínam Aadam antohi us harrata ka enenyet uskeel ikakuto ikhabo a abattaan.” Wihi us eti sare hanjaawte iyidah, “Wihi an kisoocheeko, tolosso ilaalaah okkhiche, goob iro!”

²⁵Et chirraas on ꞌdooꞌd tuumman ortiis ka tolossate, wihi us kajiife okhsate, usuhi Waakh saaꞌdo goob irte.

²⁶ꞌDooꞌd tuumman girmeeste, Waakh saaꞌde. Icho tuumman roorro gesse, wihi icho yidaaheen, “Maalinka girmo a agarre!”

²⁷Waha ꞌdubicho ka Yeesso bahe, sohtaayi etoo kooddi goocho magahiis Laawi [10] layadeeh, usuhi meessi kooddi lakagoocho goya fiddiyo wihi us iyidah, “Isooraahe, abattiteey ateeh!”

²⁸Laawi la kahe, walah tuumman katabe usu raahe.

²⁹Laawi saahka goobiis ka sukuukuhi buure Yeesso ibahche, ururi buurenye ꞌdooꞌdoo kooddi goocho illeh kijiraan ichoow ꞌdooꞌdoo addan icho a leegolossata.

³⁰Iꞌdaasenyi Farissaayo ichoow tagaammeti amurre iche laka Farissaayee nyunnyuute wihi iche abatti Yeesso itidah, “Atin a iꞌdoh ꞌdooꞌdi kooddi goocho ichoow ki uskeel leh ileegolossattaan?”

³¹Yeesso wihi us ilaabe, “ꞌDooꞌdi ilkitárri yowti ki feffeyyan menye, iꞌdaasenyi a ki khakkhannan.

³²ꞌDooꞌdi an iimiyye an waho, ki ꞌdooꞌdi fiffissan isiekkaacho menye, iꞌdaasenyi a ki uskeel lehe, ꞌdee uskeelicho a kasoonokhti.”

³³Icho la wihi icho Yeesso iyidaaheen, “Abatti Yoohana ichoow too Farissaayo kolassi ittaawe af a hidatta, weysatta, iꞌdaasenyi taah a golossatta one walah danta.”

³⁴Yeesso wihi us ilaabe, “ꞌDooꞌdi mindischo yimiy geeddi us eti min disti leejiro af a hiita?

³⁵Iꞌdaasenyi maane a tamiit, ti ꞌdooꞌd eti min disti lakakhaato. Maanassaase ꞌdee ꞌdooꞌd af hiita.”

³⁶Yeesso ꞌdooꞌd imammahte wihi us iyidah, “Et goonankoo dafareete husub soogoocho, too raagan kadaddabo mele. Chirri us iꞌda yeele, dafarti husub a khakkharradiche, goonanki dafarti husub ichoow dafarti raagan la ma isgelaan.

³⁷Ommolla et farsoti sabiibe husub urgohi uktoote raagan kachibo mele. Chirri iꞌda layeele, farsoti husub urgo a fuurissa doossa, farsotaas khubatta, urgo laka lawaaya.

³⁸Farsoti sabiibe husub, urgohi uktoote husub on lakachiba.

³⁹Et inkoo us farsoti raagan dame toro farsoti husub ꞌdoono mele. Iꞌdi tahe mehe yadeeh ya ‘Farsoti raagane deefta.’ ”