Read rendile Yoohana 10 Bible Online

Yoohana 10 - rendile bible

Yoohana 10

¹Yeesso wihi us ꞌdooꞌd iyidah, “Rume atin icheeka, eti sunki iiyyaat ka arit itabine, iꞌdaasenyi ꞌdossoo on tabe sum gele, etaas hatto leeyahe, toro la a eti enenyet walah saro.

²Eti arit kagelo a ersinki iiytiissa.

³Eti arit yaakhicho la ersim arite ifaha. Iiye la geeddi ersim iche tuumman magahenyetiche kaawwaho hooyiis a daagta. Ulla toro iiy a tuma, toro iiy ortiche raaha.

⁴Chirra us iiy tuumman tumo, orcheeda raaha, iiye la ꞌdubiis raahta, iꞌdi tahe iiye hooyiis a garatta.

⁵Iꞌdaasenyi iiye eti ersinkicho ieheynan ma raahto a kafiridda, iꞌdi tahe hooyiis ma garatti.”

⁶Yeesso ꞌdooꞌd hawweesa icheeke, iꞌdaasenyi ꞌdooꞌd wihi hawweesa miinsanyahe ma aban.

⁷Maantaka Yeesso toro wihi us yidah, “Rume atin icheeka, ani a iꞌdi aritti sunki iiyyaat.

⁸ꞌDooꞌdi tuummane orteey yimiy a ki hatto lehe, enenyet walah saro, iꞌdaasenyi iiye icho nabah ma isudin.

⁹Ani arite, eti tuummane ikasoogelo a lariba. Eta sum a soogela, toro la baha, yaakh yowta.

¹⁰Eti walah hato, ogoos ichoow wihi us baabiicho on menye, walah addane us iyamiit mele. An la a imiyye ꞌdee jiro tuum ꞌhessaan.

¹¹“Ani a ersinki haaggan. Ersinki haaggan la jeenteti us iiytiis iribo on u, jirotiis a bahcha.

¹²Eti lakireeste, iiy yaakhime igaranne iiye la tiis ieheynan, chuꞌus yaay arge, iiy a kataba, firda. Yaaye ꞌdeerka iiy goyaka koo tagiise, iiyti addan la seley baabaata.

¹³Eti lakireeste iiye tiis mee gone, iiy la aw ma ikhabo gone, a kafirda.

¹⁴“An a ersinki haaggan. Iiyteey a garda, iiyteey la a igaratta.

¹⁵Saggi Aabbaheey ani igarti, iche ani laka Aabbaheey igarda. Anna jeenteti iiyteey u jiroteey a bahcha.

¹⁶ꞌDooꞌdoo addane iꞌdi iiyteeyenye, woyheey goya ikajirin a jira. Kaas laka a soodowa. Icho laka hooyeey a dagansataane, icho tuumman la iꞌdi woyhoo kaldache ersinkoo kaldach khabo yateehiin.

¹⁷Aabbaheey jeenteti us ani iꞌdoono, a jeenteti an jiroteey ibahcho, ꞌdee toro ꞌdaꞌddaboka an omoot ka isookaho.

¹⁸Et jiroteey ikabahcho mele, iꞌdaasenyi ani on iꞌdaanu bahcha. Antohi an jiroteey kabahcho a khaba, toro antohi an isikasoolaabo a khaba. Amura Aabbahaaya kaꞌhele.”

¹⁹Yeedaas us yidah ka, ꞌdooꞌdi Yaꞌhuud toro seley gowe.

²⁰ꞌDooꞌd buurtiis mehe essa ya, “Eta ginna dakhatta, a sirgowe. A iꞌdoh idagansattaan?”

²¹Iꞌdaasenyi ꞌdooꞌdoo addan mehe essa ya, “Waha yeyyeedi eti ginna dakhatti mee. Ginna eti indo laa indo a furta?”

²²Maantaas la Daawti Maanti Minki Waakhe Buure Ladikhe lakasooꞌhelo ilkerengeetti weene Yeerusaleeme lakagele. Yeesso laka ꞌdeerka ilkerengeetti weene Yeerusaleem irte. Maantaas la a hayohi il roffo yahe.

²³Yeesso la minki Waakhe buure goyaka intoo, Gaayim Soolomon layadeeh iche raaha.

²⁴Weynaantoo Yaꞌhuud Yeesso khaarisse, wihi iche itidah, “Ichoowka maantoh waha nah kadagissa? Chaꞌat Ki Lasubhe tahe, rum on nah isoocheek.”

²⁵Yeesso wihi us ilaabe, “An orey on atin isoocheeke, iꞌdaasenyi atin ma irummeysan. Wihi ittaawenye weeli enenyet yeelin iubaaꞌdane an antohi magah Aabbaheey ka yeelo, eti an ahe cheekaane,

²⁶iꞌdaasenyi atin ma rummeysattaan, a mehe atin ꞌdooꞌdi iꞌdi iiyteeye mee.

²⁷ꞌDooꞌdi iꞌdi iiyteeye hooyeey a daaga, anna icho a garda, icho la ani a isooraahaan.

²⁸ꞌDooꞌdi ani isooraaho la jiroti jirtuu imassanne siicha, icho la jirtuu ma yamuutiin. Et dahanteey ikasaro mele.

²⁹Aabbaheeyki dahanteey soogesse walah tuumman a kaweenyahe, jeentetaas u la, et dahan Aabbaheey kabihin yabuuꞌd mele.

³⁰Ani ichoow Aabbaheey a koo kalday.”

³¹Weynaanti Yaꞌhuud toro dagah okhsatte, Yeesso dagah kachibtaa.

³²Iꞌdaasenyi Yeesso wihi us iyidah, “Anto Aabbaheey ka wihi ittaawenye weeli enenyet yeelin iubaaꞌdan goytiin ka a yeele. Waha an yeele goyaka, jeenteti kichekoh dagah ka ogoos iꞌdoontaan?”

³³Wihi icho ilaabeen, “Jeenteti haagga at yeesse mee dagah ikaasaano, iꞌdaasenyi a jeenteti at igafte. Iꞌdi tahe at a weeli enenyet one, toro Waakhe iskaayyeessa.”

³⁴Yeesso la wihi us icho ilaabe, “Amurretiin rubeyche ka mehe chiiran ya, ‘Waakh mehe yidah ya, atin a waakkhakh.’[12]

³⁵Saggi atin igarattaan u, Chiirnaanneti Waakh ma luurgiyicho. Chirri ꞌdooꞌdaas Yeedi Waakh ꞌhele, ‘waakkhakh’ lakawahe,

³⁶ki Aabbaheey soobahsate kiis kayeesse harrata isooerge la? A iꞌdoh ꞌdeerka chaꞌan, ‘Ani a Weeli Waakh,’ idah, a gafe ielattaan?

³⁷Chirri an wihi Aabbaheey yeelo iyeelin, iirummeysanna.

³⁸Iꞌdaasenyi chirri an wihi Aabbaheey ꞌdoono yeelo toro la atin ani irummeysan laka, wihi ittaawenye weeli enenyet yeelin iubaaꞌdan rummeesda. Iꞌda ka saggi Aabbaheey goyteey ikijiro anna goytiis ikijiro a abattaan.”

³⁹ꞌDooꞌd toro Yeesso khaban leheete, iꞌdaasenyi ꞌdooꞌd goya tabe kabahsate.

⁴⁰Yeesso ꞌdeerka toro nokhte, hawti Yoordan aficheki ꞌdiri goorat Yoohana ꞌdooꞌd kabaattissiyo imaahe, intaas fiddiye.

⁴¹ꞌDooꞌdi buure la Yeesso iyimiy. Wihi icho yidaaheen, “Chirri goorat Yoohana wohoo miigti Waakh tuso iyeelin laka, wihi eta miinsane us yidah tuumman a rum.”

⁴²ꞌDooꞌdi buure la intaakka Yeesso rummeeste.