Read rendile Yoohana 12 Bible Online

Yoohana 12 - rendile bible

Yoohana 12

¹Geeddi ibeen lihe ankhantahe ꞌdee daawti Baasakka sootateeh, Yeesso ilkerengeetti Beꞌdaaniya Laassaro yaal yimiy. Laassaro la, a eti goorat Yeesso omoot kasookahche.

²Yeesso intaas ka gololi gelebeet liikarche. Maarta la icho goollisse. Laassaro ꞌdooꞌdi Yeesso leegolossate a leejire.

³Maariya ꞌdeerka miricchihoo gato miigenye geeyoo naad layadeeh kalday lakahaaggiche geeddi kiilo nyuusichee khaatte, Yeesso luhlo kasubahte, toro tintiche ka luhlohiis hiyyaayte. Uyuuggi miricchihaas min tuumman leekahe.

⁴Iꞌdaasenyi etoo abatti Yeesseenye, Yuuda Iskaariyoot layadeehe, dowwanoha ka Yeesso ꞌdub soogoocho ꞌdiiꞌde wihi us yidah,

⁵“A iꞌdoh miricchiha liiororinne, ꞌdee chilimme miskiin liisiin? Chilimmeti eti guꞌhoo hil haaggiche laguto iche baha.”

⁶Jeenteti us miskiino uur ikasoonugleeste mee waha iyidah. Jeenteti us iꞌdaas iyidah, a jeenteti us ugarti chilimme ikhuccho, us chilimme ihato.

⁷Yeesso wihi us ilaabe, “ꞌDii! Iche miricchiha ibeenki ani liihawwaalo iche meel igelissee.

⁸Miskiin kol dakkhan goytiinna kakhabtaane, iꞌdaasenyi ani kol dakkhan ma ikhabtaan.”

⁹Ururoo buurenye Yaꞌhuud Yeessohi ilkerengeetti Beꞌdaaniya kajiro daage, intaas yimiy. Icho la jeenteti icho Yeesso iargaan kalday menye, Laassarohi Yeésso omoot kasookahche laka argine yimaateen.

¹⁰Kuhaaniyyohi wewween ꞌdeerka jiti icho Laassaro laka kayagiisiin yowteen.

¹¹Waha a jeenteti ꞌdooꞌdi Yaꞌhuude ittaawe jeente Laassaruu icho ikatabo, Yeesso irummeesti.

¹²Ibeenki kaas sooraaho ka, ururi buurenye daawti Baasakka yimiy, saggi Yeesso ilkerengeetti weene Yeerusaleem iyamiit daage.

¹³Seytohi geeyi baar sookhaateene, baheene, Yeesso or kadoween. Chirra icho or kadowaan la a riiraane, “Waakh a lakoolicho!” “Waakh ki magahi Kamur kayamiit a imaale.”[14] “Waakh Karnati Issiraayel a imaale!” iche essaan.

¹⁴Yeesso inkuraarruhoo ꞌhele kore, iꞌdi liichiiruu,

¹⁵“ꞌDooꞌdi ilkerengeetti Saayon yaal, wohoo rucchul laka akaroorina! Yeya karnatiin kalla, inkuraarru fuulaayi soosohtaa.”[15]

¹⁶Abattitiis laka kolooraat waha tuumman ma aban. Inkoo Yeesso goobi Waakh ka laweynaache on iche saggi yeedaas lachiire usu imiinsanyahe, toro wahaas laka usu iyeeleen kaseen.

¹⁷Ururi goorat maanti Yeesso Laassaro goꞌddi lakahawwaale goya kasoowahe omoot kasookahche leejire, wihi yitah tuumman cheeke.

¹⁸ꞌDooꞌdi buure jeenteti Yeesso waha miigti Waakh tuso iyeele us idaage, iche ibahe Yeesso iꞌhele.

¹⁹Farissaayo ꞌdeerka wihi iche isitidah, “Ma agartaan a, wihi inno yeelin leheet ma yeelloo! ꞌDooꞌd tuumman usu raaha!”

²⁰ꞌDooꞌdi daawti Baasakka ka irte ilkerengeetti weene Yeerusaleem ka Waakh wahte, ꞌdooꞌdoo yaafohi Yaꞌhuud ieheynan laka goycho a kijire.

²¹ꞌDooꞌdaas la Fiilifhi ilkerengeetti Bessaayda boroofenhi Gaalilaaya kajirto kayimiy iirte, wihi icho iyidaaheen, “Eti ween, nahi Yeesso agarro ꞌdoonna.”

²²Fiilif la irte Andereeya icheeke, lammache ba iratte Yeesso icheekte.

²³Yeesso wihi us ilaabe, “Sahaꞌddi Ínam Aadam laweynaacho kola a titah.

²⁴Rume atin icheeka, sammata ilinti ꞌdargaayye il ikadihine, iche koloo iumaatan, ilintoo on kafiddiita, gurnaan iche desso mele. Iꞌdaasenyi chiꞌiche wohoo yumuy titah, gurnaanki buurenye dessa.

²⁵Eti jiroti awtiis ꞌdoono, jiroti rummaat a waaya. Eti harrata ka jirotiis ꞌdiiꞌdo la, jirotiis jiroti jirtuu imassan a ikaaya.

²⁶Eti tuummane falfateey itaahan ꞌdoono, ani isooraaha. Meelbaaw an irdi ka ileejira. Aabbaheey la eti tuummane hileey haaggicho, usú a weynaacha.

²⁷“Toolla rubeyteey a suujowte, mehe idaahe? ‘Aabbahaaw, sahaꞌdda sinayyoot ikarib,’ iche adeeh? Mele! An jeentetane sahaꞌdda isooeleele.

²⁸Aabba, magahaah weynaay!” Hooyoo ꞌdeerka serey ka sooyeede, mehe yidah ya, “Magaheey a weynaache, toro la a inokhda weynaacha.”

²⁹Ururi intaas toolle hooyaas daage gaasoo, “A guuguh,” esse, gaasoo la, “Hertoo Waakhe leeyyeedda,” esse.

³⁰Yeesso wihi us yidah, “Hooya jeenteteey ma isooyeedine, jeentetiinna isooyeede.

³¹Ibeenki Waakh ꞌdooꞌdi harrata hukkumo kola a yitah. Waakh toolla karnati harrata a riha.

³²Iꞌdaasenyi ani maanti massalaaba ka serey liiokkhicho, weeli enenyet tuumman ankaaya keena.”

³³Iꞌdane yidahye, omootti us sooyamuut enenyet tusa.

³⁴Urur la wihi us iyidah, “Amurre Muusa ka, Ki Lasubhe jirtuu tuumman a inno leefiddiya iche daagne. Saggoh ꞌdeerka ‘Ínam Aadam serey a liiokkhicha’ itadeeh? ‘Ínam Aadamha,’ a ayyo?”

³⁵Yeesso la wihi us icho iyidah, “Geeddoo rucchul on banay khabtaan. Banay goya kasohda giꞌde, geeddi banay jiraane mugꞌdi ikhaatin. Eti mugꞌdi kasohti, inti us isohti ma garti.

³⁶Anihi banay atin ikeeno, geeddi an atin leejiro irummeesda, ꞌdee atin laka ꞌdooꞌdi banay goya kasohti ateeha.” Inkoo Yeesso waha yidah ka, ꞌdooꞌd katabe, irte dagte.

³⁷Chirri Yeesso wahanyeyyoha miigti Waakh tuso tuumman geedda ꞌdooꞌd leejiro us yeele laka, ꞌdooꞌd usu ma rummeysan.

³⁸Wahaas la a yitaaheene ꞌdee wihi eti Waákh íyeyyeedo Isaaya layadeeh ka lachiire labuuhicha, “Kamur, ayyo wori nah cheekne rummeeste? Ayyo miigti Waakh latuse?”[16]

³⁹Jeenteti icho irummeysawwaayeen la, a jeenteti Isaaya intoo addan ka iꞌda iyidah,

⁴⁰“Waakh icho indo a tire, uurassicho la dagahnooche, ꞌdeerka indohicho ka il ma argaane, ommos uurassicho ka walah ma abtaan, ommos ani ma isoonokhtaane ꞌdee ma samaacho.”[17]

⁴¹Isaaya jeenteti us waha iyidah, a jeenteti us weynaanti Kamur iarge, toro wori usu miinsan ikayeyyeede.

⁴²Chirraas weynaanti Yaꞌhuud buurche laka usu a rummeysatte. Iꞌdaasenyi jeenteti iche Farissaayo ikaroortuu, saggi iche Yeesso ikakhuufte ma cheekin, minki weysiite Yaꞌhuude lakabahcho iche karoortaa.

⁴³Iꞌdi tahe koolohi Waakh icho koolicho menye, koolohi weeli enenyet icho koolicho iche ꞌdoonaan.

⁴⁴Yeesso riire wihi us yidah, “Eti tuummane ani irummeesti, ani kalday ma irummeesti, iꞌdaasenyi ki ani isooerge laka a rummeesta.

⁴⁵Eti tuummane ani iargo la, ki ani isooerge laka a arga.

⁴⁶An iꞌdi banayhi harratane iimiyye, ꞌdee et ani irummeesti mugꞌdi goya fiddiyo mele.

⁴⁷“Eti yeedeey daago iꞌdaasenyi iraahin an ma hukkumo. Iꞌdi tahe an hukkunnaanki an harra hukkumo ma iimaatan, iꞌdaasenyi ribnaanki ꞌdooꞌdi harra iimiy.

⁴⁸Eti ani iꞌdiiꞌdo toro yeedeey ikhaatan, wihi hukkumo a jiraan. Yeedaas an idah rubeytiissa ibeenki yomboot etaas sina igoochá.

⁴⁹A mehe an antoheey ma kaayyeedin. Iꞌdaasenyi Aabbaheeyki isooerge iche amur ibahche, wihi an adeeh ichoow saggi an iadeeh isiiche.

⁵⁰Anna saggi amuriis jiroti jirtuu imassan ikeeno a garda. Toollaka wihi an eldi tuumman a wihi Aabbaheey dah iyidah on.”