Read rendile Yoohana 14 Bible Online

Yoohana 14 - rendile bible

Yoohana 14

¹Yeesso toro wihi us abattitiis iyidah, “Amalalina, Waakh kakhuufa, ani laka ikakhuufa.

²Min Aabbaheey goonanneti ittaawenye khaba. Anna a irda, meel atin iyeela. Chirri kootte waha iꞌdaas ieheynan, ma atin isoocheeko.

³Chirri an irde meel atin iyeele la, a soonokhda, meesseey atin geecha, ꞌdee inti an kajiro, atin laka kajirtaan.

⁴Jiti inti an isohdi irti a garattaan.”

⁵Toomas la wihi us iyidah, “Kamur, inti at isohatti nah ma garanni, saggoh jiti intaas isohti iabanna?”

⁶Yeesso wihi us ilaabe, “An a jit, an a rum, an a jiro. Eti ani ileeyimiy on menye, et Aabbaheey iyamiit mele.

⁷Chaꞌatin rumanka igaratteen, Aabbaheey laka a garattaan. Uus toolla kakhabatti atin usu a abatteene, toro la a agarteen.”

⁸Fiilif la wihi us iyidah, “Kamur, bal Aabbahaah nah tus, nah walah addane nah ꞌdoonno mele.”

⁹Yeesso wihi us ilaabe, “Fiilif, geeddi deere atin tuumman atin leejire, toro ichoow uliba at ma iaban ba? Eti tuummane ani iarge, Aabbaheey a arge. A iꞌdohe toro, ‘Aabbahaah nah tus,’ ielatta?

¹⁰Fiilif, at saggi an Aabbaheey goytiis ifiddiyo, ulla goyteey ifiddiyo ma rummeysatti? Yeeda an eldi ani ma ikiimaatane, Aabbaheeyki goyteey fiddiyo iche waha tuumman yeela.

¹¹Chirra ani, ‘An Aabbaheey goytiissa fiddiya, ulla goytaaya fiddiya,’ atin iidah, irummeesda giꞌde. Chirri atin irummeysan, wihi ittaawenye weeli enenyet yeelin iubaaꞌdane an yeelo ka rummeesda giꞌde.

¹²Rume atin icheeka, eti tuummane ani irummeesti, wihi an yeelo a yeela. Wihi waha kussan laka a yeela, iꞌdi tahe an Aabbahaaya inokhda.

¹³Anna walahbaaw atin jeenteti atin keey itahiin u daahteen a atin iyeela, ꞌdee Weeli Waakh Aabbahiis weynaacha.

¹⁴Walahbaaw tahe ka, jeenteti atin keey itahiin idaaha anna a atin iyeelaa.

¹⁵“Chirri atin iꞌdoontaan, amuri an atin siiche a raahtaan.

¹⁶Anna Aabbaheey a daaha, ulla ꞌDooggargaartotoo[20] addane jirtuu tuumman atin leejirto atin isooerga.

¹⁷Waha a Rubeyti Munyeenye rum leh. ꞌDooꞌdi harrata la Rubeyti Munyee ma khaatti. Iꞌdi tahe icho Rubeyta Munyee ma argaane, ommos ma gartaan. Iꞌdaasenyi atin a garattaan, a mehe Rubeyti Munyee toolla a atin leefiddiita, toro berri goytiinna kijirta.

¹⁸Saggi nyaakhuti ꞌdooꞌdi dele katuume ma atin ikatabo, a atin isoonokhda.

¹⁹Geeddoo rucchul ka kola ꞌdooꞌdi harrata toro ma iargo, iꞌdaasenyi atin a iagartaan. Toro jeenteti an ijiruu, atin laka ꞌdee jiro a ꞌhessaan.

²⁰Maantaas saggi ani ichoow Aabbaheey wohoo kalday inahe, atin ichoow ani wohoo kalday inahe, toro la ani ichoow atin wohoo kalday inahe a kassaan.

²¹Eti iꞌdoono, a ki amurreteey khabti, toro raaho. Eti iꞌdoono la, Aabbaheey laka usú a ꞌdoona, ani laka usu a ꞌdoona, toro la eti an ahe la a tusa.”

²²Yuuda ꞌdeerka, kan Yuudahi inam Iskaariyoote menye, wihi us yidah, “Kamur, at a iꞌdoh dowwanoha ka nah isitussa, ꞌdooꞌdi harrata la isitusiwwaayta?”

²³Yeesso la wihi us ilaabe, “Eti tuummane iꞌdoono, wihi an abcho a raaha. Aabbaheey usu a ꞌdoona. Aabbaheey ichoow ani usu a inamiite fureenyo goytiis kayeelanna.

²⁴Eti tuummane ani iꞌdoonin, wihi an abche laka ma raaho. Wihi atin daagteen la weheey menye, Aabbaheeyki isooerge iche kayimaateen.

²⁵“Waha tuumman geeddi an atin leefiddiyo iche atin isoocheeke.

²⁶Iꞌdaasenyi Rubeyti Munyeenye ꞌDooggargaarto layadeehe, Aabbaheey meesseey ka sooergo, walah tuummane atin abissa, toro la wihi tuummane an atin isoocheeke, atin kasooꞌhelissa.

²⁷Nebeye atin ikataba. Nebeytaaya atin siicha. Saggi ꞌdooꞌdi harrata nebey ꞌdooꞌd isiicho mee an nebey atin isiicho. Amalalina toro la roorro akhabina.

²⁸“Anihi, ‘A irda toro a atin isoonokhda,’ eldi a daagteen. Chirri atin iꞌdoonteen, jeenteti an Aabbaheey ikiirduu, a hamaaddaan. A mehe Aabbaheey ani a ikaweenyahe.

²⁹Waha tuumman la geeddi icho iitaahane atin icheeke, ꞌdee ꞌdeerka maanti icho yateehiin rummeysattaan.

³⁰Geeddi deer ma atin leeyyeedo, a mehe karnati harrata a soosohtaa. Us miig ma ikakhabo,

³¹iꞌdaasenyi ꞌdooꞌdi harrata saggi an Aabbaheey iꞌdoono an amur Aabbaheey iraaho a abta. “Kaaleya inta a katabno.”