Read rendile Yoohana 2 Bible Online

Yoohana 2 - rendile bible

Yoohana 2

¹Ibeenki seyyahnaatteet ka, oroosoo ilkerengeetti Kaana boroofenhi Gaalilaaya kajirto ka lagele. Abar Yeesso la intaas a kajirte.

²Yeesso ichoow abattitiis laka oroosaas a liiwahe.

³Inkoo farsoti sabiib ꞌdooꞌd kaguute ka, abar Yeesso usu itimiyye, “Farsoti sabiib a guute,” itidah.

⁴Yeesso wihi us ilaabe, “Abartaay, ati mee wihi an yeelo isoocheekto. Ibeenki Waakh isoogooche a ankhanyahe.”

⁵Abartiis wihi iche ilbooyye itidah, “Walahbaaw us yeela atin iidah, yeela.”

⁶ꞌDiraammetoo lihenye burbuurenye dagaheete bicche lakachibo yaafohi Yaꞌhuud hugumme ka kadikhatti intaas a kajireen. Kooba la bicchehi geeddi litta tomon siyyeet ichoowka litta kudoo ichoow tomon lamma iche khaata.

⁷Yeesso wihi us ilbooyye iyidah, “ꞌDiraamme bicche buuhicha.” Ilbooyye ꞌdiraamme buuhisse af keente.

⁸ꞌDeerka wihi us ilbooyye iyidah, “Bal wohoor soogessa, ꞌdee khaata, ilbooyi oroos ka golol itoollo igeecha.” Ilbooyye la iꞌdaas yeesse.

⁹Ilbooyi golol itoollo la bicchehi luurgiyiche farsoti sabiib lakayeele chanchame. Ulla inti lakakeene ma garanne, ilbooyyeti bicche soogelisse la a garatta. Ilbooyi golol itoollo eti min diste ꞌdol iwahe,

¹⁰wihi us iyidah, “Ebba farsoti sabiibe weyti haaggane orey leekeena, inkoo marti farsoti buure dante ka, farsoti gato ꞌdabakhe lasookhaata. At la farsoti weyti haaggane laabte ichoowka toolla.”

¹¹Waha a wahanyeyyohi oraate miigti Waakh tuso Yeesso ilkerengeetti Kaana boroofenhi Gaalilaaya kajirto ka haaggiche. ꞌDeerka weynaantiis ꞌdooꞌd isoobabbakkaahiche, abattitiis la usu kakhuufte.

¹²ꞌDaꞌddaboka Yeesso abartiis ichoow walaalinyetiis ichoow abattitiis khabaayi ilkerengeetti Kafarnaaꞌhum ikhubte, intaas ibeennetoo fiddiye.

¹³Maanti Daawti yaafohi Yaꞌhuude Baasakka layadeeh soodowwaatte, Yeesso ilkerengeetti weene Yeerusaleem ikore.

¹⁴Uranti minki Waakhe buure ka, ꞌdooꞌdi looyyo ichoow iiy ichoow kutukuurrug ba ororicho ichoow ꞌdooꞌdoo addane komborohi balballaaddan koorronte chilimme iskadooricho ꞌhele.

¹⁵ꞌDeerka yabarretoo laajja kayeesse, icho tuumman ichoow iiy ichoow looyyo ba uranti minki Waakhe buure karihe. Komborohi balballaaddane ꞌdooꞌd chilimme iskadooricho rerreeche, chilimme la seley turraaꞌhiche.

¹⁶Wihi us ꞌdooꞌdi kutukuurrug ororicho iyidah, “Kutukurrugtaas inta kabahcha. Min Aabbaheey uurgiyinna sokko akayeelina!”

¹⁷Abattitiis waha chiiran kasooꞌhesse, “Kamuraaw, ꞌdooninti an minkaah ꞌdoono, weyti buurtahe ichoowka a ikhaatta laka.”[3]

¹⁸ꞌDeerka ewweenki yaafohi Yaꞌhuud wihi us Yeesso worsate, “Wahanyeyyohi miigti Waakh tuso at nah tusso ꞌdee saggi rumanka Waakh antohi at waha kayeesse kisiiche iagarro a mehe?”

¹⁹Yeesso wihi us icho ilaabe, “Minka Waakhe buure jejjebcha, anna ibeen seyyah goyaka toro a disaa.”

²⁰Iche la wihi iche ilaabte, “Minka Waakhe buure, guꞌh tomon affar ichoow lihe khaate ladise. Alla maan seyyah goya on ka dissa?”

²¹Iꞌdaasenyi minka Waakhe buurenye Yeesso woriis kayeyyeedo a sartiissa.

²²Inkoo Waakh usu omoot kasookahche ka, abattitiis wihi us ꞌhor kayeyyeede kasooꞌhesse. Abatti ꞌdeerka Chiirnaanneti Waakh ichoow wihi Yeesso yidah ba rummeysatte.

²³Geedda Yeesso ilkerengeetti weene Yeerusaleem ka daawti Baasakka kajiro, ꞌdooꞌdi buure wahanyeyyohi noole miigti Waakh tuso us yeelo arge, usu rummeeste.

²⁴Iꞌdaasenyi Yeesso icho ma kakhuufin, a mehe us enenyet tuumman iꞌdiis a garta.

²⁵Walah etoo miinsane usu liicheeko mele, iꞌdi tahe usu rubeytiis uuri weeli enenyet a garta.