Read rendile Yoohana 20 Bible Online

Yoohana 20 - rendile bible

Yoohana 20

¹Baryoti boorane ibeenki oraate teebataas ka, Maariyati ilkerengeetti Magdaala goꞌddi Yeesso lakahawwaale ijedde, saggi daddaab meel afiche liikabahche agarte.

²ꞌDeerka Siimonhi Beetero layadeeh ichoow eti ullaka abatteenye Yeesso weyti ꞌdoono isoonyaante wihi iche itidah, “Kamur goꞌd goya a lakabahche, inti lagesse la ma garanni.”

³ꞌDeerka Beetero ichoow eti abatteenye addan ba anki goꞌd tabeen.

⁴Abatti lammache ba a oriita, iꞌdaasenyi eti addan Beetero kelee luh kaꞌhele, goꞌd orey eleele.

⁵Goꞌd kagulguubsate, goya yeye, darfo kalday arge, iꞌdaasenyi goꞌd goya ma gelin.

⁶ꞌDubiis ka Siimonhi Beetero layadeeh yimiy. Ulla a yiriꞌd one goꞌd goya gele, darfohi meel yaal arge.

⁷Dafarti Yeesso matah kayuyyuubneet laka ichehi layuyyuube intoo keley taal arge.

⁸ꞌDaꞌddaboka eti abatteenye kootte goꞌd orey eleele laka goya gele, arge rummeeste.

⁹Icho uliba Chiirnaanneti Waakh ka saggi Yeesso omoot ikasookaho ma garan.

¹⁰Abatti lammache ba ꞌdeerka goobassicho inokhatte.

¹¹Iꞌdaasenyi Maariya goꞌd khariche tolossatte ooyte. Ooytaayi gulguubsatte, goꞌd goya yeyte.

¹²Herti Waakhe lammeenye gaaddi daddakhan khabto inti sar Yeesso tiil fiddiito, agarte. Hertaas Waakh la too, inti matah kijire iche fiddiita, too la inti luhlo kajireene fiddiita.

¹³Herti Waakh wihi iche Maariya worsatte, “Weela a iꞌdoh iooyta?” Maariya la wihi iche tidah, “Sar Kamuraaya lakhaate, inti lagesse la ma gardi!”

¹⁴Waha ka urgiite, Yeessohi intaas toollo agarte. Iꞌdaasenyi saggi us Yeesso iyahe ma kasin.

¹⁵Yeesso la wihi usu iyidah, “Weela a iꞌdoh iooyta? Ayyo yowatta?” Iche la kol eta ki gos hil kahaaggicho yahe koogtahe, wihi iche tidah, “Eti ween, chirri at sartiis khaatte, inti at gelisse isoocheeke, a irdi a sookhaato.”

¹⁶Yeesso wihi usu iyidah, “Maariya.” Iche la urgiite, riirte afi Ibiraaniya ka “Rabbooni,” tidah. Ayta chiꞌ lalaabe a eti ween.

¹⁷Yeesso chirraakka wihi us iyidah, “Iikhaban, iꞌdi tahe an uliba Aabbaheey ma inokhan. Nyaame, ꞌdooꞌdi irummeeste iiro, saggi an eti Aabbaheeyenye toro icho laka Aabbahichee ikanokhdi, icheek. Ulla a Waakkhaaya, toro la a Waakkhichooda.”

¹⁸Maariyati ilkerengeetti Magdaala wora abatti ileeiratte, “An Kamur a arge!” Toro saggi us wahaas ikiidah abatti icheekte.

¹⁹Gelebti ibeenki oraate teebataas ka, abatti kulante. Minkoo goya iskahidde, iꞌdi tahe weynaanti Yaꞌhuude karoortaa. Iꞌdaasenyi Yeesso goycho tolossate, “Nebeytiin ma furatti,” iyidah.

²⁰Inkoo us waha yidah ka, dahanohiis ichoow waaru ba tuse. Abatti uus iche Kamur agarte ka, weyti hamaadde.

²¹Yeesso toro wihi us iyidah, “Nebeytiin ma furatti! Saggi Aabbaheey ani isooerge, iche an laka atin ierga.”

²²Wahaas ka neebsi kaafuufe, wihi us yidah, “Rubeyti Munyee ꞌhela.

²³Chirri atin ꞌdooꞌd uskeel ikakutteen, Waakh rumanka ꞌdooꞌdaas uskeel a ikakuta. Chirri atin ꞌdooꞌd uskeel ikakutin la, Waakh laka ꞌdooꞌdaas uskeel ma ikakuto.”

²⁴Toomashi abattiti tomon ichoow lammee kichokoowenye, duddunkiis Manꞌdaan layadeeh chirri Yeesso abatti isoobahe intaas ma kajirin.

²⁵Abattiti addan ꞌdeerka wihi iche Toomas itidah, “Nah Kamur a agarre.” Iꞌdaasenyi Toomas wihi us icho iyidah, “Sammata an gumaarreti dahanohiis kajirto an iargine, an farreey inti goorat ussumaar lakaꞌhune an igelinne, dahanteey la inti waaru ka ꞌhunan an igelin, ma rummeesdi.”

²⁶Inkoo teebatoo toro kutte ka, abatti toro minkoo goyaka kulante. Toomas laka a leejire. Afaf a hidanyahiine, iꞌdaasenyi Yeesso goycho sootolossate, wihi us iyidah, “Nebeytiin ma furatti.”

²⁷ꞌDeerka wihi us Toomas iyidah, “Farraah gumaara geliche, dahanoheey la agar, dahantaah la keene, waaruheey geli. Iikamalaline saggi an omoot ikasookahe rummeyso.”

²⁸Toomas chirraakka, “Ati a Kamuraaya, toro la a Waakkhaaya,” iyidah.

²⁹Yeesso chirraakka wihi us iyidah, “At jeenteti at ani iagarte iche irummeysatte? Waakh ꞌdooꞌdi ani iargine irummeeste, a imaala.”

³⁰Geedda Yeesso abattitiis leejiro, wihi ittaawenye miigti Waakh tuso buugga goya liikachiirin iche yeele.

³¹Iꞌdaasenyi waha a lachiire, ꞌdee saggi Yeesso rumanka Ki Lasubhe iyahe, us Weeli Waakh iyahe, rummeysattaan. Kakhuufnaanki atin usu kakhuuftaan ka la jiroti jirtuu imassanne khabtaan.