Read rendile Yoohana 3 Bible Online

Yoohana 3 - rendile bible

Yoohana 3

¹Etoo Farissaayeenye Nikodeemo layadeehe Jaldaabti Weene Yaꞌhuud kichokoowe a jire.

²Ulla ibeen Yeesso iyimiyye wihi us iyidah, “Eti ween, saggi at etoo Waakh sooergate enenyet walah abcho itahe a garanna. A mehe wahanyeyyohi miigti Waakh tuso at yeesso, et addane yeelo mele, eti Waakh leejiro on menye.”

³Yeesso la wihi us ilaabe, “Rume kisoocheeka, et dakhi Waakh argo mele sammata koli lammaatteet liidelin.”

⁴Nikodeemo la wihi us worsate, “Saggoh eti ween toro liidela? Rumanka koli lammaatteet uur abartiis ma inokhti ma dessi!”

⁵Yeesso wihi us ilaabe, “Rume atin icheeka, et dakhi Waakh gelo mele, sammata bicche ichoow Rubeyti Munyee ka liidelin.

⁶Weeli enenyet sartiis aabbahiis ichoow abartiissa kaꞌhela, toro la rubeyti weeli enenyet, Rubeyti Munyeenye jiro kaꞌhessa.

⁷Yeedeeyki an, ‘Atin toro koli lammaatteet a atin laaddelo,’ idah akagirmeysan.

⁸Hafar anki us ꞌdoono isohta. Yeenaanki us yeedo la ladaaga, iꞌdaasenyi et inti us kayimiy ichoow inti us isohti garti mele. Eti Rubeyti Munyee jiroti husub siisse laka a iꞌdaas on.”

⁹Nikodeemo la wihi us worsate, “Waha saggoh iyateehiin?”

¹⁰Yeesso la wihi us ilaabe, “At a etoo ꞌdooꞌdi Issiraayel Yeedi Waakh abcho, toro la wahanyeyyoha ma abanna?

¹¹Rume kisoocheeka, wihi nah garanni a atin isoocheekna, wihi nah indo kaagarre laka a atin isoocheekna. Iꞌdaasenyi, atin wihi nah atin idowno ma rummeysattaan.

¹²An wahanyeyyohi harratane atin isoocheeke atin la ma rummeysattaan. Sag ꞌdeerka atin wahanyeyyohi goobi Waakh miinsane an atin idowo irummeysattaan mele gon.

¹³Ínam Aadamhi goobi Waakh kasookhubte on menye, et addane injire goobi Waakh ikore mele.

¹⁴Saggi goorat Muusa hidaad ka toof iokkhichuu, saggaase Ínam Aadam laka liiokhicha,[4]

¹⁵ꞌdee eti tuummane ani irummeeste, jiroti jirtuu imassan ꞌhela.”

¹⁶Iꞌdi tahe Waakh weeli enenyet tuumman weyti ꞌdoone, ꞌdeerka weeliiski kalday soodiibe, ꞌdee eti tuummane Weeli Waakh rummeeste ma yamuute, iꞌdaasenyi jiroti jirtuu imassan ꞌhela.

¹⁷A mehe Waakh Weeliis weeli enenyete us hukkumo ma isooergin. Iꞌdaasenyi a sooerge, ꞌdee weeliis ka weeli enenyet tuumman uskeeliis kariba.

¹⁸Eti tuummane Weeli Waakh rummeeste ma lahukkumo. Iꞌdaasenyi eti tuummane irummeysan orey on lahukkume, a mehe Weeli Waakhe keleye ma rummeysan.

¹⁹“Wihi Waakh gooche kallaayo. Runti Waakhe iꞌdi banayeete harra a soogesse, iꞌdaasenyi enenyet banayhi Waakh menye, mugꞌdi on ꞌdoona. A mehe wihi icho yeelaan a wihi uskeel kaldach on.

²⁰Eti tuummane suujoon yeelo, banayhi runti Waakh a ꞌdiiꞌda, toro la banay goya ma soogelo. Iꞌdi tahe usuhi uskeeli us yeelo laargo ma ꞌdoono.

²¹Iꞌdaasenyi eti tuummane wihi rummaat yeelo banay goya soogela, ꞌdee banay la saggi wihi us yeele wihi Waakh ꞌdoono iyahiin tusaan.”

²²ꞌDaꞌddaboka, Yeesso abattitiis khabaayi boroofenhi Yaꞌhuudiya ankiiskoo irte, geeddoor leefiddiye, toro la enenyet laka baattissiye.

²³Yoohana laka iloo Aynoone layadeehe ilkerengeetti Saalim haggee, iche ꞌdooꞌd kabaattissiya. Iꞌdi tahe bicchehi buurenye intaas kajira. ꞌDooꞌd la geeddi nool usu iirta, ulla baattissiya.

²⁴Waha la a geeddi Yoohana jeela liigelin.

²⁵Abatti Yoohanatoo ichoow etoo Yaꞌhuude ba yeedoo daawti saggi isliidikho biꞌdir islabahcho miinsan isleeiriireen.

²⁶Yoohana iyimaateene, wihi icho iyidaaheen, “Eti weenoow, eti goorat hawti Yoordane ꞌdusso ꞌdirihiche ka kileejire, at woriis kayeyyeedde kalla. Yey, enenyet tuumman la usu iirta, ulla baattissiya.”

²⁷Yoohana waha ka wihi us ilaabe, “Wihi Waakh soomure on menye, walah eti iꞌdee kayateeh mele.

²⁸Atin tuumman a cheektaane, wihi goorat an idah a mehe ya, ‘An Ki Lasubhe mee, iꞌdaasenyi a eti Waakh ortiis sooerge.’

²⁹Mindischo ka, eti min disti iche iname makhaabassiis tahe. Aali eti min disti la, chirra us hooyi eti min disti daago, iche hamaada. Annaka jeentetaase weyti ihamaada.

³⁰Usu gon magah ꞌdiriheey ꞌhela, anna magah waaya.”

³¹“Weeli Waakhe goobi Waakhe saraat kayamiit, usu ꞌdooꞌd tuumman kaween. Ani a ki harratane, wihi harratane kayeyyeeda. Ki goobi Waakh kayamiit la, usú ꞌdooꞌd tuumman kaween.

³²Us wihi us arge ichoow wihi us daage ꞌdooꞌd icheeka, iꞌdaasenyi et wihi us cheeke rummeesti mele.

³³Chiꞌ etoo yeediis kakhuufe, etaas saggi wihi Waakh yidah rum iyahiin, iche tusa.

³⁴A mehe eti Waakh sooerge farniinki Waakhe kaayyeeda. Iꞌdi tahe Waakh etaas Rubeytiisti Munyee iche buuh ka rubeytiis goya gessa.

³⁵Aabbaheen weeliis a ꞌdoona, walah tuumman la dahantiissa gesse.

³⁶Eti tuummane Weeli Waakh rummeeste, jiroti jirtuu imassan a khaba. Iꞌdaasenyi eti tuummane Weeli Waakh ꞌdiiꞌdo jiro ma khabo. A mehe holi Waakh usu a fuula.”