Read rendile Yoohana 4 Bible Online

Yoohana 4 - rendile bible

Yoohana 4

¹Farissaayo saggi Yeesso abattiti too Yoohana kiittaawe ibahsate toro la ibaattissiyo daagte.

²Rumanka la Yeesso rubeytiis enenyet ma baattissiyine, iꞌdaasenyi abattitiissa enenyet baattissite.

³Kamur chirri us waha daage ka, boroofenhi Yaꞌhuudiya katabe, toro abattitiis khabaayi boroofenhi Gaalilaaya inokhte.

⁴Wihi massan, chirri us boroofenha Gaalilaaya irti, boroofenhi Saamariya dah kagoocha.

⁵Chirri us boroofenhi Saamariya gele ka, ilkerengeettoo Siikar layadeehe, gosi goorat archiiy Yaakoobo inankiiski Yuussuf layadeeh siiche idow irte.

⁶Wor Yaakoobo la intaase kajirta. Yeesso la wor afiche orronte. A mehe geeddi deere soosohte, a kurme. Waha la a geeddi sahaꞌd tomon ichoow lammati gelebeet.

⁷Chiꞌ makhaabassoo yaafohi Saamariyee bicche waraaban timiy ka, Yeesso wihi us iyidah, “Bicchehoo an abhuub isii.”

⁸Abattitiis la ilkerengeete iratte golole soogattaa.

⁹Makhaabassi Saamariya la wihi iche Yeesso ilaabte, “Ya! Atiha Yaꞌhuude saggoh anihi yaafohi Saamariyee bicchehi at tabhuub idaahta?” A mehe yaafohi Yaꞌhuud ichoow yaafohi Saamariya walah icho iskakhabaan mele.

¹⁰Yeesso wihi us iche ilaabe, “Wihi Waakh enenyet siin ꞌdoono garatte ka, ommos anihi bicche kidaaho eti an ahe garatte ka, kootte ati ani bicche idaahta, ani la bicchehi enenyet jiro keelo kisiicha.”

¹¹Makhaabale la wihi iche itidah, “Eti ween, wore a hoge, at la wihi bicche lakasoogesso ma khabto. Biccheha jiro lakeelo intoh kaꞌhessa?

¹²Toro la, at aacchiheenyoki Yaakoobo layadeehe nah worta kaꞌhelle a kaweentahe? Usu rubeytiis ichoow yeeletiis ichoow hoolahiis tuummamba worta on yubhaabeen.”

¹³Yeesso wihi us ilaabe, “Eti tuummane biccheha yabhuub toro a subgaata.

¹⁴Iꞌdaasenyi eti tuummane bicchehi an siicho yabhuub, jirtuu tuumman ma subgaati. Bicchehi an siicho la, goytiis ka iꞌdi issi bicchehi jiro lakeelo yateehiine, jiroti rummaate jirtuu imassanne ꞌhela.”

¹⁵Makhaabale la wihi iche itidah, “Eti ween, bicchehaas isiiche, ꞌdee uus an jirtuu subgaanne, ommos worta isoonokhanne bicche waraaban.”

¹⁶Yeesso la wihi iyidah, “Nyaame, makhaabalaah soowahe, ꞌdee soonokho.”

¹⁷Wihi iche ilaabte, “An makhaábal ma khabo.” Yeesso la wihi us iyidah, “Rume cheekte, chaꞌat, ‘Makhaábal ma khabo,’ tidah.

¹⁸Wihi at tidah a rum! At áram chane kidisatte, ki toolla at leefiddiito la makhaabalaah mee.”

¹⁹Makhaabale wihi iche itidah, “Eti ween, saggi at eti Waákh íyeyyeedo itahe a arga.

²⁰Aacchinyeteenti yaafteeyti Saamariyee, goorat halane Waakh kawahatte. Iꞌdaasenyi atinhi yaafohi Yaꞌhuude, ‘Inti enenyet Waakh kawahti a ilkerengeetti weene Yeerusaleem,’ iche elattaan.”

²¹Yeesso wihi us makhaabál iyidah, “Makhaabassa, wihi an kidowo rummeyso. Ibeen a yamiit ki enenyet hala ommos ilkerengeetti weene Yeerusaleem Aabbaheey ikawahanne, meelbaaw us kijiro on ka wahti.

²²Atinhi yaafohi Saamariya chirri atin Waakh wahattaan laka, atin usu rubeytiis ma garattaan. Nahi yaafohi Yaꞌhuude la, Waakkhi nah wahanni a garanna. A mehe eti ꞌdoorribo yaafohi Yaꞌhuude kayamiit.

²³Ibeen a yamiite toro la kola a yitah. Ibeenki Rubeyti Waakh ꞌdooꞌd woyto, ꞌdee ꞌdooꞌd Waakh saggi rumanka us iyahe iwahti. Aabbaheey la ꞌdooꞌdi usú saggaas iwahti iche yowta.

²⁴A mehe Waakh a rubey kalday on. Weeli enenyet la, sammata Rubeyti Waakh igargaarin, koloo kalday laka Waakh saggi us rumanka iyahe ma iwahti.”

²⁵Makhaabale la wihi iche itidah, “Saggi Ki Lasubhe Kiriistohi lasugo layadeeh iyamiit a garda. Ulla maanti us yamiit, walah tuumman a inno ibabbakkaahicha.”

²⁶Yeesso la wihi us ilaabe “Aniha kileeyeyyeedo a usu rubeytiissa.”

²⁷Geeddaas on ka abatti Yeesso soonokhatte. Abatti la chirri iche Yeessohi makhaabál leeyyeedo agarte ka, weyti girmeysatte. Iꞌdaasenyi eticho, “At mehe ꞌdoonta?” worsate mele. Ommos eticho Yeesso, “A iꞌdoh makhaabál ileeyyeedda?” iyidah mele.

²⁸Makhaabale ꞌdirihicheki biccheet katabte, ilkerengeet inokhatte, wihi iche ꞌdooꞌd itidah,

²⁹“Kaaleya eti wihi tuummane goorat an yeele isoocheeke arga. Eta a geeddi us Ki Lasubhe yahe?”

³⁰ꞌDooꞌd ilkerengeet kasoobahe, Yeesso iyimiy.

³¹Geeddaas tuumman la abatti Yeesso hawwaassatta, “Eti ween, bal wohoo aham,” idowta.

³²Iꞌdaasenyi wihi us ilaabe, “An gololi atin wihiiskoo rucchul laka igaran a khaba.”

³³Abatti ꞌdeerka wihi iche isitidah, “Etoo sarka golol ikeene?”

³⁴Yeesso la wihi us iyidah, “Wihi uur iꞌdoono iꞌdi gololeeye a mehe ya, a anihi wihi Waakkhi isooerge ꞌdoono yeelo, toro la hili goorat us dahanteey soogesse massicho.

³⁵Atin orran, ‘Hay affare yomboossa, ꞌdee gurnaan lagoocha,’ ma elattaan a? Iꞌdaasenyi wihi an atin iadeeh, bal indo ooga gos yeya, gurnaan kola a bissaate, a geeddi lakagoocho.

³⁶Waakh la ꞌdooꞌdi gos goocho mujjume guta. Gurnaanka icho soogoochaan la, a ꞌdooꞌdi jiroti jirtuu imassan ꞌhelo. ꞌDeerka ꞌdee eti gurnaan il kachibe, ichoow ki gurnaan goocho ba isleehamaadaan.

³⁷Jeentetaase mammahti, ‘Koo ilmo il geessa, koo la gurnaane soogoocha,’ tadeeh rum itahe.

³⁸Ani a atin erge, gosi atin ilmo il ikachibin ka, gurnaan soogoossaan, gosaas la ꞌdooꞌdoo addane hol kadowe, atin la gurnaanki bissaate on soogoossaan.”

³⁹Jeenteti kootte makhaabale, “Eta wihi goorat an yeele tuumman a isoocheeke,” itidah u, ꞌdooꞌdi Saamariya ilkerengeettaas yaal ki ittaawe Yeesso rummeeste.

⁴⁰ꞌDeerka chirri ꞌdooꞌdi Saamariya Yeesso iyimiy ka, hawwaasteene, “Kaale nah leefiddiy,” iyidaaheen. Yeesso la ibeen lamma intaas barye.

⁴¹ꞌDooꞌdi weyti ittaawe la, jeenteti wihi Yeesso yidah u, Yeesso rummeeste.

⁴²Wihi icho makhaabál iyidaaheen, “Toolla yeedaah kalday on ma rummeysanni, iꞌdi tahe nah laka awteenyuu usu a daagne, toolla la saggi rumanka eta ꞌDoorribehi enenyeti harra tuumman iyahe a garanna.”

⁴³Inkoo Yeesso intaas ibeen lamma barye ka, anki boroofenhi Gaalilaaya tabe.

⁴⁴Yeesso rubeytiis ꞌhor mehe yidah ya, “Eti Waákh íyeyyeedo, ilicho ka ma liinkaanyito.”

⁴⁵Iꞌdaasenyi, chirri us boroofenhi Gaalilaaya yimiy ka, ꞌdooꞌdi Gaalilaaya martiiste. Iꞌdi tahe wihi us daawti Baasakka ka us ilkerengeetti weene Yeerusaleem ka yeele tuumman a argeen. Icho laka goorat daawtaas a kijireen.

⁴⁶Yeesso toro ilkerengeetti Kaana boroofenhi Gaalilaaya kajirto us bicche kuurgiyiche farsoti sabiib kayeele inokhte. Ilkerengeetti Kafarnaaꞌhum ka la, etoo sirgaal ka weene inankiis weyti khannanyahe a jira.

⁴⁷Eta chirri us saggi Yeesso boroofenhi Yaꞌhuudiya ikayimiyye, boroofenhi Gaalilaaya isoogele daage ka, iirte hawwaaste, ꞌdee a yimaate inankiiski omoottan a samaacho.

⁴⁸Yeesso la wihi us iyidah, “Atin sammata atin wahanyeyyohi miigti Waakh tuso ichoow girmo iargin ma irummeysattaan.”

⁴⁹Eti sirgaal ka ween la wihi us iyidah, “Eti ween, bal kaale dowwa a khubanni, inankeey geeddi us iumaatan samaay.”

⁵⁰Yeesso wihi us ilaabe, “Nyaam on iro, inankaah a samaataa.” Et wihi Yeesso iyidah rummeeste, irte.

⁵¹Jit raahaayi, ilbooyyetiis usu ꞌhesse, saggi inankiis isamaate icheekte.

⁵²Ulla ilbooyye sahaꞌddi inam kasoodeefsate worsate. Iche la wihi iche ilaabte, “Chele sahaꞌddoo kaldaye chirdeereete kuleel kabukkhe.”

⁵³Aabbahiis la chirraakka saggi wahaas sahaꞌddi chele Yeesso, “Nyaam, inankaah a samaataa,” ikayidah itahe, abte. ꞌDeerka usu ichoow minkiis tuummamba Yeesso rummeesteen.

⁵⁴Wahaas a wihi lammaatteete miigti Waakh tuso, Yeesso inkoo us boroofenhi Yaꞌhuudiya kayimiyye us boroofenhi Gaalilaaya soogele yeele.