Read rendile Yoohana 6 Bible Online

Yoohana 6 - rendile bible

Yoohana 6

¹Waha ꞌdubicho ka, Yeesso abattitiis khabaayi Beyti Buurenye Gaalilaaya, magahichekoo addan Beyti Buurenye Tibeeriya layadeeh, aficheki ꞌdiri imaahe.

²Ururoo buure la Yeesso raahe, wahanyeyyohi ittaawenye miigti Waakh tuso us haaggicho us ꞌdooꞌdi khakkhannan samaache, iche argeen.

³Yeesso la abattitiis khabaayi haloo kore, orronte.

⁴Ibeenki Daawti Yaꞌhuude Baasakka lagelo la a soodowwaate.

⁵Chirri Yeesso serey yeye ururi buurenye isoosohti arge ka, wihi us Fiilif iyidah, “Intoh gololi inno ꞌdooꞌda tuumman kagoollinno kasooganna?”

⁶Yeesso jeenteti us etaas ikajo on waha iworsate, a mehe wihi us sooyeelo orey on garte.

⁷Fiilif wihi us Yeesso ilaabe, “Gololi ꞌdooꞌda ebba wohoor on yaham, chilimmeti eti orrah kud lamma hil haaggiche laguto, iche ꞌdoona!”

⁸Andereeyahi ullaka abatti Yeesseenye, Siimonhi Beetero layadeeh leedesse, sooyeede wihi us yidah,

⁹“Inankoo makaate chan ꞌdargaayye lakahaaggiche, ichoow bahag lamma rurrucchul khabo kalla. Iꞌdaasenyi koloo kalday laka ꞌdooꞌda ittaawe ma yaakhaan.”

¹⁰Yeesso la wihi us yidah, “ꞌDooꞌd orrommicha.” Intaas la hoosi buurenye khabte. Mejeli orronte la a geeddi alif chan.

¹¹Yeesso ꞌdeerka makaateyyo khaate, Waakh kalaꞌd ilaabe, ꞌdooꞌdi intaas fiddiyo geeddi icho ꞌdoonaan gise. Bahag laka iꞌdaas on yeele.

¹²Chirri icho tuumman dargeen ka, Yeesso wihi us abattitiis iyidah, “Gololi laajjebche lasoowaache soosuuna, uus inno wohoo rucchul laka baabiinne.”

¹³ꞌDeerka abatti enjel tomon ichoow lamma makaateyyohi chanenye ꞌdargaayye lakahaaggiche lasoowaache buuhaan soosuunte.

¹⁴Inkoo ꞌdooꞌd wahanyeyyoha miigti Waakh tuso Yeesso yeele arge ka, ꞌdooꞌd wihi us yidah, “Rumanka, eti goorat Muusa cheeke, ‘Etoo Waákh íyeyyeedo ꞌdee berri harrata a yamiit,’ yidah a kan.”

¹⁵Yeesso la saggi icho miig ka ikhabtaane, icho karnat ikayeelin iꞌdoonaan abte, keley toro haloo inokhte.

¹⁶Chirri il gelebnowe ka, abattitiis beyti Gaalilaaya ikhubatte.

¹⁷Intaas ka kooban goya gesse bey aficheki ꞌdiri imaahte, ilkerengeetti Kafarnaaꞌhume isohtaanee. Sohtaani, il ibeennowe. Yeesso la uliba abatti ma isoonokhan.

¹⁸Hafaroo miige sookahe, bicche uskulaateen.

¹⁹Chirri iche geeddi kiilomitta chan ommos lih illeh kooban woyte ka, Yeessohi bicche sarcho kasoosohti kooban isoodowwaate agarte, weyti nahte.

²⁰Iꞌdaasenyi wihi us iyidah, “A ani, roorro akhabina!”

²¹Abatti la ichehi Yeesso kooban korisso ꞌdoonte. Kooban la chirraas on inti icho isohtaan eleeleen.

²²Ibeenki kaas sooraaho ka, ururi bey aficheki ꞌdiri kajire, saggi chele koobanhoo kalday on intaas ikajireen kase. Toro saggi Yeesso abattitiis kooban ileekorine, iꞌdaasenyi abatti kalday on iiratte laka kaseen.

²³Koobanohoo anki ilkerengeetti Tibeeriya kayimiy la yimaateene, inti chele inkoo Kamur Waakh kalaꞌd ilaabe urur fiddiye makaate kayuhum yimaateen.

²⁴Inkoo urur saggi Yeesso ichoow abattitiis ba intaas ikajirin kaseen ka, koobano geleene, ilkerengeetti Kafarnaaꞌhum irteen, Yeesso yowtaanee.

²⁵Inkoo ꞌdooꞌd bey aficheki ꞌdiri ka Yeesso ꞌhele ka, wihi icho usu worsateen, “Eti ween, at chirroh inta timiy?”

²⁶Yeesso wihi us ilaabe, “Rume atin icheeka, atin jeenteti an wahanyeyyohi miigti Waakh tuso iyeele mee ani iyowattaan. Iꞌdaasenyi jeenteti atin makaate itumheene atin idaragteene ani iyowattaan.

²⁷Gololi dowwa on kheerowo hol iidowina, iꞌdaasenyi gololi ikheerowine ꞌdooꞌdi yuhum jirtuu tuumman jiro, Ínam Aadam atin siicho hol idowa. Iꞌdi tahe Waakkhi Aabbaheene saggi us usu iꞌdoono on igooche.”

²⁸ꞌDooꞌd la wihi us Yeesso worsate, “Mehe yeella ꞌdee Waakh kahamaadinna?”

²⁹Yeesso wihi us ilaabe, “Wihi Waakh atin kaꞌdoono, a atinhi eti us sooerge rummeysattaan.”

³⁰Icho la wihi icho worsateen, “Mehe ꞌdeerka miigti Waakh tusa yeessa ꞌdee kirummeysanna? Mehe yeessa?

³¹Aacchinyeteenyo goorat archiiy gololoo manna layadeehe hidaad ka tuhum. Iꞌdi liichiiruu, ‘Gololi serey kayimiyye siiche kagolossateen.’ ”[7]

³²Yeesso la wihi us icho iyidah, “Rume atin icheeka, eti gololi goobi Waakh kayimiy atin siiche Muusa mee. Iꞌdaasenyi Aabbahaaya gololi rummaate serey kayamiit atin siicha.

³³A mehe gololi Waakh ꞌdooꞌd siicho a eti goobi Waakh kayamiite, weeli enenyete harrata jiroti jirtuu imassan siicho.”

³⁴Iche la wihi iche Yeesso itidah, “Eti weenoow, golola maan dakkhan nah sii giꞌde.”

³⁵Yeesso la wihi us ilaabe, “Ani a gololi rummaate jiro lakeelo. Eti tuummane ani iyamiite, ani irummeesti la, a iꞌdoo us jirtuu iankayine ommos jirtuu isubgaan.

³⁶Iꞌdaasenyi saggi an orey atin ikiidah u, ‘Atin iagarteene toro la ma irummeysan.’

³⁷“Eti tuummane Aabbaheey dahanteey soogesso ani iyamiit. Anna eti tuummane ani iyimiy jirtuu ma riho.

³⁸Iꞌdi tahe an goobi Waakhe kiimiyye, wihi an ꞌdoono menye, iꞌdaasenyi wihi Aabbaheeyki isooerge ꞌdoono, iche yeela.

³⁹Eti isooerge la wihi us ꞌdoono a mehe ya, a anihi ꞌdooꞌdi us isiiche koo kalday laka ibaabiine, iꞌdaasenyi an ibeenki ꞌdaꞌddaboot ka, icho tuumman omoot kasookahcho.

⁴⁰Iꞌdi tahe wihi Aabbaheey ꞌdoono a mehe ya, a usuhi eti ani iarge toro irummeeste tuumman jiroti jirtuu imassan ꞌhelo. Anna ibeenki ꞌdaꞌddaboot icho tuumman omoot a kasookahcha.”

⁴¹Jeenteti Yeesso, “An a gololi goobi Waakh kayimiy,” iyidah u, ꞌdooꞌdi Yaꞌhuud nyunnyuwe.

⁴²Wihi icho yidaaheen, “Eta Yeessohi ínam Yuussufe menya? Aabbahiis ichoow abartiis inno ma garanni? Saggoh toolla goobi Waakhe kiimiy iessa?”

⁴³Yeesso la wihi us ilaabe, “Wihi an atin iidah akaannyuwina.

⁴⁴Et ani iyamiit mele, sammata Aabbaheeyki ani isooerge ikakeenin. Anna etaas ibeenki ꞌdaꞌddaboot omoot a kasookahcha.

⁴⁵Khadaaboo eti Waákh íyeyyeedo wihi kachiiran, ‘Weeli enenyet tuumman Waakhe walah abchá.’[8] Eti tuummane wihi Aabbaheey essi daago toro la wohoo kaabti, ani iyamiit.

⁴⁶Anihi Waakh kiimiy kalday on menye, et addane Aabbaheey arge mele. Ani kalday on Aabbaheey arge.

⁴⁷“Rume atin icheeka, eti tuummane ani irummeesti, jiroti jirtuu imassan a khaba.

⁴⁸Ani la a gololi rummaate jiro lakeelo.

⁴⁹Aacchinyetiin goorat archiiy hidaad ka gololoo manna layadeehe tuhuyye, toro la a tuunte.

⁵⁰Iꞌdaasenyi gololi goobi Waakh kayamiit, iꞌdi manna mee. Eti tuummane golola goobi Waakh kayamiit yuhum la ma yamuut.

⁵¹Ani a gololi rummaate jiro lakeelo goobi Waakh kayamiit. Eti tuummane golola yuhum, jirtuu tuumman a jira. Gololi an eta siicho a sarteeyti an soobahcho, ꞌdee ꞌdooꞌdi harrata jiro kaꞌhelo.”

⁵²ꞌDeerka ꞌdooꞌdaas Yaꞌhuud yeedaas Yeesso ka weyti holloweene, isleeiriireen. Wihi iche isworsatte, “Eta saggoh sartiis inno isiicha inaham?”

⁵³Yeesso la wihi us ilaabe, “Rume atin icheeka, sammata atin ínam Aadam sartiis iumhane toro la diiggiis idamin, jiroti rummaat ma khabtaan.

⁵⁴Eti tuummane sarteey yahame diiggeey la damo, etaas jiroti jirtuu imassan a khaba. Anna eta ibeenki ꞌdaꞌddaboot omoot a kasookahcha.

⁵⁵A mehe sarteey a gololi rummaate, diiggeey la chirri ladame, rumanka rubey nolole ikeena.

⁵⁶Eti tuummane sarteey yahame diiggeey la damo, goytaaya fiddiya, anna goytiissa fiddiya.

⁵⁷Aabbaheeyki jiro lakeelo ani isooergate jiro a isiiche. Saggaas u la, eti tuummane sarteey yaham ani laka usú jiro a siicha.

⁵⁸Maantaka gololi goobi Waakh kayimiy a kane, golola la iꞌdi gololi goorat aacchinyetiin tuhuyye saahka tuunte mee. Iꞌdaasenyi eti golola yuhum jirtuu tuumman a jira.”

⁵⁹Yeesso chirra us waha essi, a chirri us ilkerengeetti Kafarnaaꞌhum ka, minki weysiite Yaꞌhuud ka enenyet walah abcho.

⁶⁰ꞌDooꞌdi ittaawenye Yeesso raaho waha daage wihi us yidah, “Yeeda weyti miigyahe. Ayyo nabah isuda?”

⁶¹Yeesso saggi ꞌdooꞌdi usu raaho waha ka inyunnyuuwo kase, wihi us icho iyidah, “Ahollowina.

⁶²Eemba Ínam Aadam usuhi inti goorat us kijire ikoro a agarteen?

⁶³Rubeyti Waakhe enenyet jiro siissa. Weeli enenyet, enenyet jiro ma siicho. Yeedi an atin icheeke la Rubeyti Waakhe kayamiite, toro la enenyet jiro siicha.

⁶⁴Iꞌdaasenyi gaasiinkoo uliba ma irummeesti.” A mehe Yeesso uus uumaccho ka ꞌdooꞌdi usu irummeysan ichoow eti ꞌdub soogoocho a garta.

⁶⁵Yeesso toro yeed orey iwoye wihi us yidah, “Jeentetaase an mehe atin iidah ya, et ani iyamiit mele sammata Aabbaheey ani isiin.”

⁶⁶Uus chirraas la, ꞌdooꞌdi ittaawenye Yeesso raaho Yeesso adah kakhabte, ma raahin.

⁶⁷Yeesso abattitiisti tomon ichoow lammee wihi us worsate, “Atin laka atinhi adah ikakhabattaane ꞌdoontaan?”

⁶⁸Siimonhi Beetero layadeeh wihi us ilaabe, “Kamur ayyo addane iiranna? Ati kaldaye yeedi jiroti jirtuu imassan lakeelo khabta.

⁶⁹Toolla la nah saggi at Ki Munyeenye Waakh kayimiy itahe a rummeysanna toro la a garanna.”

⁷⁰Yeesso ꞌdeerka wihi us ilaabe, “Ani menya atinha tomon ichoow lammee atin soobahsade? Iꞌdaasenyi goytiin ka, etoo a ki Seytaan!”

⁷¹Eti us woriis kaayyeedo la a Yuuda Iskaariyoot. Yuuda la a ínam Siimon Iskaariyoot. Iꞌdi tahe Yuuda, chirri us abatti Yeessoti tomon ichoow lammee goya kajiro laka, usu berri Yeesso ꞌdub goocha.