Read rendile Hilassi Ergaano 1 Bible Online

Hilassi Ergaano 1 - rendile bible

Hilassi Ergaano 1

¹ꞌDeyoofilohaaya, khadaabeeyki oraat ka, [1] an wihi noole Yeesso yeele ichoow wihi us enenyet abche,

²ichoowka ibeenki goobi Waakh lageeche, iche kisoochiire. Geeddi serey liigeen, Rubeyti Munyee ka ꞌdooꞌdi us soobahsate us ergaanotiis kayeesse, amurre ibahche.

³Inkoo sina lakawaariche us reera a isoobahe, jitassi ittaawe ka saggi us rumanka ijiro tuse. Geeddi ibeen tomon affar icho a isoobahe, wori dakhi Waakh miinsan kaleeyyeede.

⁴Maantoo leegolossataayi amurane ibahche, “Ilkerengeetti weene Yeerusaleem akabihina, iꞌdaasenyi siinti goorat Aabbaheey atin iayyiche, an woriche kaayyeedo atin daagteen suga.

⁵A mehe Yoohana enenyet bicche kabaattissiye, iꞌdaasenyi maanassa, Rubeyti Munyee ka a atin labaattissiya.”

⁶Saahka maanti icho kulmeen ka wihi icho usu worsateen, “Kamur, antohi yaafohi Issiraayel harraticho kaantaan maanassa on toro ilaabta?”

⁷Yeesso la icho mehe iyidah ya, “Aabbaheey antohiissa on ka maan ichoow chirri walah dakkhan yateehiin gooche. Atin mee maanti icho yateehiin abattaan.

⁸Iꞌdaasenyi maanti Rubeyti Munyee atin isooyagte, miig a ꞌhessaane, atin la weheeyki atin garattaan cheektaan. Ilkerengeetti weene Yeerusaleem ka ichoow boroofenneti Yaꞌhuudiya ichoow ti Saamariya ka ichoow harra tuumman ka cheektaan.”

⁹Inkoo us yeedaas yidah ka, iche ꞌdeyꞌdoossaayi, Yeesso serey liikorche, mirisoo la icho kadagche.

¹⁰Geedda us serey irti, sereye ꞌdeyꞌdoochaan. Chirraas on reeroo lammeenye[2] darfohoo daddakhan khabo garabicho sootolossate.

¹¹“Era atinha boroofenhi Gaalilaaya!” yidah, “A iꞌdoh itolossaane serey iꞌdeyꞌdoossaan? Yeessoha atin lakakhaate serey lageeche, saggaas atin iagartaane us serey iirti on isoonokhta.”

¹²Ergaano ꞌdeerka Hali Geeyohi Oolif kakhubatte, ilkerengeetti weene Yeerusaleem inokhatte. Halaas la Yeerusaleem ka a geeddi kiilomittatoo kalday.

¹³Chiꞌicho sooeleeleen ka, inti minki saraate iche maanassaas fiddiito ikorte. Ichehi intaas fiddiito a Beetero ichoow Yoohana ichoow Yaakoobo ichoow Andereeya ichoow Fiilif ichoow Toomas ichoow Barꞌdolomaayo ichoow Mattaayo ichoow inam Alfaayoki Yaakoobo layadeeh ichoow Siimonhi Yaaftiisꞌdoone layadeeh ichoow inam Yaakooboki Yuuda layadeeh.

¹⁴Ichohaas tuumman, ichoow oboorrihoo addan ichoow Maariyati abar Yeessee, ichoow walaalinye Yeesso ba kol tuumman a sooururaane Waakh isleewahtaan.

¹⁵Inkoo ibeennetoo kutte ka, ꞌdooꞌdi Kiriisto rummeeste soourure. Icho tuumman la a geeddi et kudoo ichoow tomon lamma. Beetero la kahe yeede,

¹⁶wihi us yidah, “ꞌDooꞌd Kiriistokaaw, wihi massan Chiirnaanneti Waakhe Rubeyti Munyee Dawuud afiis leekeente, Yuudahi ꞌdooꞌdi Yeesso khabti soowoye miinsan a labuuhicha.

¹⁷Us a keenyokoowe hila Waakh a nah kaleejire.”

¹⁸Yuuda kalaꞌddi us jiti khollokkhan kaꞌhele ka gosoo soogatte. Gosaas goya on ka soodihe, uur desme, mindakharo tuumman sookhubteen.

¹⁹Enenyeti ilkerengeetti weene Yeerusaleem kijiro tuumman daage, gosaas magah ibahcheene aficho ka Akeldaama yidaaheen. Iꞌdaakka la mehe leessa ya, “Gosi Diig.”

²⁰Beetero wihi us yidah, “A mehe buuggi Sabuur ka wihi chiiran, “ ‘Goobiis ba a baabo, uus etoo kalday laka jirin.’ [3] Wihi addane chiiran, “ ‘Etoo addan ba meessiisti weynaaneet gela.’ [4]

²¹Maantaka wihi massan, etoo geeddi Kamureenki Yeessee nah leefiddiye tuumman nah leejire soobihinno.

²²Eti uus maanti Yoohana enenyet baattissiyo sookhabte ichoowka maanti Yeesso nah lakakhaate serey lageeche nah leejire a eheetti. A mehe a nah isookhaya ꞌdee garti saggi Yeesso omoot liikasookahche nah leecheeka.”

²³ꞌDeerka et lamma magahenye waheen. Yuussufhi Barsabba layadeehe magahiiskoo Yaasto layadeeh ichoow Mattiyas.

²⁴ꞌDeerka Waakh wahteen, “Kamur, ati uurassi enenyet tuumman a garatta. Maantaka ꞌdooꞌda lammatiis ki at soobahsatte,

²⁵ꞌdee hila Waakhe ergaano gelo nah tus. Waha la a meessi Yuuda kabahe, ulla inti imasse irtee.”

²⁶ꞌDeerka magah lammataas ka kura guꞌddeen. Eti ꞌhele a Mattiyase, ꞌdeerka ergaanoti tomon ichoow koowe ikhaye.