Read rendile Hilassi Ergaano 14 Bible Online

Hilassi Ergaano 14 - rendile bible

Hilassi Ergaano 14

¹Baawulo ichoow Barnaba ilkerengeetti Ikooniyo ka laka iꞌdi orrankateet u minki weysiite Yaꞌhuude geleen. Intaas ka wori Waakh mujjum cheekeene, ichoowka ꞌdooꞌdi buurenye yaafohi Yaꞌhuud ichoow ki yaafohi Yaꞌhuud ieheynan ba Kamur rummeesteen.

²Iꞌdaasenyi ꞌdooꞌdi yaafohi Yaꞌhuude Kamur rummeysan ꞌdiiꞌde ꞌdooꞌdi addane yaafohi Yaꞌhuud ieheynan sootukkiche ichoowka ꞌdooꞌdi Kiriisto rummeeste iholloween.

³Baawulo ichoow Barnaba ꞌdeerka intaas geeddi deer fiddiyeene, roorro laan Kamur iyeyyeedeen. Kamur la runti wori haaggi Waakhe buurenye inno imunneynane icho cheekeen tuse, ꞌdeerka miig siiche dahanohicho ka wahanyeyyohi miigti Waakh tuso ichoow girmo yeeleen.

⁴ꞌDooꞌdi ilkerengeeteet la seley gowe, gaasoo ki ꞌdooꞌdaas Yaꞌhuud yitahye, gaasoo la ki ergaano yitah.

⁵ꞌDooꞌdoo yaafohi Yaꞌhuud ieheynan ichoow ꞌdooꞌdoo yaafohi Yaꞌhuude ichoow weynaanticho ba dagsi ka isleetossateene, mali icho ꞌdee ergaano sina kawaarichaane toro dagah kachibaan goocheen.

⁶Iꞌdaasenyi Baawulo ichoow Barnaba yeedaas kaseene ilkerengeetti Deerbe ichoow ti Luussira distriighi Lukahooniya kajirto ichoow ili tuummane isoodow ifirdeen.

⁷Intaas ka orey isohteene Wori Haaggan cheekeen.

⁸Ilkerengeetti Luussira ka etoo luhlo laaye, uus ladele injire isohan a jire.

⁹Geedda Baawulo yeyyeedo dagansate. Baawulo indo katoolliche, saggi us Waakkhi usu samaacho ikakhuufo arge,

¹⁰kariire, “Kahe tolosso,” iyidah. Geeddaas on ka et serey isoonyaame sohannaan sookhabte.

¹¹Urur la chirri us wihi Baawulo yeele arge ka, afichoki Ikooniyo ka riire, “Waakkhassi ittaawe maalinka uummanki enenyete inno ikayimaateen” yidaaheen.

¹²Barnaba magah ibahcheene, Seewus yidaaheene, Baawulo la usu gon yeyyeede, Hermes yidaaheen.

¹³Minki waakkhi Seewus layadeeh la ilkerengeet kharicheeda kajira. Kuhaanihi waakkhaas la heerar sookhaate fiikhti lukhum lakorche khabaayi aritti ilkerengeeteet keene. Usu ichoow urur la ergaano soorriyo ibihin ꞌdoonaan.

¹⁴Iꞌdaasenyi chirri Baawulo ichoow Barnabahi ergaanee wahaas daageen ka, darfohicho ꞌdiiꞌddo ka khakkharradicheene, saggi icho wihi ꞌdooꞌd yeelo iꞌdiiꞌddanyahiin tuseene, oryeene urur goya geleene riireen.

¹⁵“Era iꞌda ayeelina. Nah laka iꞌdiin u a weeli enenyet on. Nah Wori Haaggan on atin icheekna, ꞌdee waakkhassi ilmarhaatteete atin wahattaan urgiyissaane, Waakkhi jiro wahattaan. Ulla a Waakkhi serey ichoow harra ichoow beyohi burbuure ichoow wihi tuummane goyahicho kajiro soouume.

¹⁶Kholoyyohi kute ka Waakh yaafo tuumman a ꞌdiiche, tooba jitiche tabte.

¹⁷Iꞌdaasenyi Waakh haaggi us yeelo ka saggi us rumanka ijiro enenyet a tuse. Hiri us atin siicho ichoow gurnaanki yeerassicho ka delo ka uuri ꞌdabakhe a atin tuste. Gololi buure la a atin siiche, rubeyohiin la hamaad buuhiche.”

¹⁸Yeedaas tuumman ka laka ergaano nyife ꞌdooꞌd soorriyoti kootte us icho igoon leheet kaholisse.

¹⁹ꞌDooꞌdoo Yaꞌhuude ilkerengeetti Antiyookhiya ichoow Ikooniyo kayimiy la yimiyye ꞌdooꞌd ankicho isoolaabeene, ichoowka Baawulo dagah kachibeen. Kol us yumuyye koogyahiine ꞌdeerka ilkerengeet khariche ijiiteen.

²⁰Iꞌdaasenyi inkoo abatti Baawulo kakhaaratte ka, Baawulo sookahe icho raahe ilkerengeet leegele. Saahka usu ichoow Barnaba ba ilkerengeetti Deerbe ikaheen.

²¹Baawulo ichoow Barnaba la ilkerengeetti Deerbe ka Wori Haaggan cheekeene ꞌdooꞌdi ittaawe abatti Kiriisto kayeeleen. ꞌDeerka toro kaheene ilkerengeetti Luussira ichoow ti Ikooniyo ichoow ti Antiyookhiya ili Bisiidiya inokhteen.

²²Ilkerengeetohaas ka abatti uur miigoocheene ꞌdee kakhuufnaanki icho Kiriisto kakhuufaan mujjum khucchaan. Wihi icho iyidaaheen, “Wihi massan, sinayyohi buurenye inno isoobaha dakhi Waakh kagella.”

²³Baawulo ichoow Barnaba urur Kiriisto ewweenkoo woyo isoobahcheene, ꞌdooꞌdi Kiriisto rummeeste iweynaacheen. Af hiiteene ꞌdooꞌdaas Kamuri icho kakhuufaan iwaheene, dahantiis gesseen.

²⁴Inkoo icho ili Bisiidiya tabeene ili Bambiiliya irteen,

²⁵intaas ka ilkerengeetti Beerga ka Yeedi Waakh cheekeen. Ilkerengeetti Attaaliya ikhubteen.

²⁶Ilkerengeetti Attaaliya ka kooban geleene ilkerengeetti Antiyookhiya ili Siiriya kajirto inokhteen. Intaase hili icho toolla massicheen ka, goorat dahanohi haaggi Waakhe buure lakagesse.

²⁷Inkoo icho ilkerengeetti Antiyookhiya geleen ka, urur Kiriisto isiwaheene, wihi Waakh icho ka yeele ichoow saggi Waakh jitoo ifure ꞌdee yaafohi Yaꞌhuud ieheynan laka Waakh ikakhuufaan icheekeen.

²⁸ꞌDeerka geeddi deer intaas ka abatti leejireen.