Read rendile Hilassi Ergaano 15 Bible Online

Hilassi Ergaano 15 - rendile bible

Hilassi Ergaano 15

¹ꞌDooꞌdoo ili Yaꞌhuudiya kasookhubte ilkerengeetti Antiyookhiya yimiyye wihi us ꞌdooꞌdi Kiriisto rummeeste abche, sammata iꞌdi amurre Muusa atin iabissuu atin liikhandiyin, Waakh ma atin ribo.

²Baawulo ichoow Barnaba jeenteti yeedaas u ꞌdooꞌdaas leejaakheen. ꞌDeerka jeentetaas u Baawulo ichoow Barnaba ichoow ꞌdooꞌdoo addane Kiriisto rummeeste lasoobahche, ꞌdee ilkerengeetti weene Yeerusaleem irtaane wihi ayta miinsan ka ergaano ichoow ewweenki urur Kiriisto woyo argaan.

³Urur Kiriisto icho ergate. Geedda icho ili Foniikiya ichoow ki Saamariya tabaan, saggi yaafohi Yaꞌhuud ieheynan Waakh ikakhuufeen cheekeen. Wora la ꞌdooꞌdi Kiriisto rummeeste tuumman weyti kahamaadiche.

⁴Chirri icho ilkerengeetti weene Yeerusaleem sooeleeleen ka, urur Kiriisto ichoow ergaano ichoow ewweenki urur Kiriisto woyo ba icho martiisteen. Baawulo ichoow Barnaba la wihi Waakh icho ka yeele tuumman icheekeen.

⁵ꞌDeerka ꞌdooꞌdoo Kiriisto rummeeste orey rabitti Farissaayo eheet la tolossate wihi us yidah, “Wihi massan, yaafohi Yaꞌhuud ieheynan a lakhandiya toro wihi lakaꞌdoono a ichohi amurre Muusa raaho.”

⁶Ergaano ichoow ewweenki urur Kiriisto woyo ba jeenteti aytuu tossateen.

⁷Inkoo icho geeddi deer hawwoocheen ka, Beetero tolossate, wihi us iyidah, “ꞌDooꞌd Kiriistokaaw, atin saggi goorat goytiin ka Waakh isoobahsate, yaafohi Yaꞌhuud ieheynan ani Wori Haaggan ikadaagaane ꞌdee icho Kiriisto irummeestaan a garattaan.

⁸Waakkhi uurassi enenyet garti Rubeyti Munyeenye us icho siiche ka saggaas us inno laka inno isiichuu saggi us icho ikhaatte a tuse.

⁹Inno ichoow icho la walah inno yeerarroocho mele, wihi tahe kakhuufnaanki icho Waakh kakhuufeen ka, Waakh uurassicho a dikhe.

¹⁰Toollaka a iꞌdoh Waakh kajme igelissaane, huleesi aacchinyeteen ommos inno iubaaꞌdan, abatti adah ikarartaan?

¹¹Mele! Wihi inno rummeysanni a innohi haaggi buurenye inno imunneynane koo Yeessohi Kamureene ka inno laribe. Icho laka a iꞌdaas on.”

¹²Chirra Baawulo ichoow Barnaba wahanyeyyohi miigti Waakh tuso ichoow girmohi Waakh icho ka yaafohi Yaꞌhuud ieheynan iyeele cheekaan ka nabah isudeene, urur tuumman ba rukkuy gooche.

¹³Chirri icho yeyyeed massicheen ka, Yaakoobo sooyeede, wihi us yidah, “ꞌDooꞌd Kiriistokaaw idagansada.

¹⁴Siimonhi Beetero layadeeh saggi Waakh kolooraat ꞌdooninti us yaafohi Yaꞌhuud ieheynan iꞌdoono ituse, us gaasichokoo isoobahsate ꞌdooꞌdiis ikayeesse a inno isoodowdowe.

¹⁵Yeedi ꞌdooꞌdi Waákh íyeyyeedo yidah ichoow kan laka a israahaan. Wihi chiiran,

¹⁶“ ‘Waha ꞌdubicho ka a soonokhda, min Dawuudki jejjebe disa. Raasiis ka toro min disa, toro icho toollicha.

¹⁷ꞌDee ꞌdooꞌdi addane harra tuumman, ichoow yaafohi Yaꞌhuud ieheynane magaheey khabo Kamur yowtaan, iche Kamuri waha yeelo,’ [22]

¹⁸goorat archiiy waha ꞌdooꞌd idowdowe essa.

¹⁹“Maantaka wihi an gooche, uus inno yaafohi Yaꞌhuud ieheynane Waakh iurgiyo ꞌhowloon.

²⁰Iꞌdaasenyi khadaab ichiirro ꞌdee gololi iyookkoyyo ka labiꞌdirrooche uumhana, toro la ꞌdooꞌdi isidisan uus isleeurꞌdine, naffi laluulliche uumhana, diig adamina inidaahe.

²¹A mehe uus goorat archiiy ilkerengeetohi wewween tuumman ka wihi amurre Muusa miinsan a lacheeke, toro la Seeri Lanaso tuumman ka minki weysiite Yaꞌhuud ka a lasooma.”

²²ꞌDeerka ergaano ichoow ewweenki urur Kiriisto woyo ichoow urur Kiriisto tuumman wihi icho goocheen, ꞌdooꞌdichokoo soobahchaane, ꞌdee Baawulo ichoow Barnaba kaꞌdaraane ilkerengeetti Antiyookhiya leeirtaan. Et lamma ꞌdooꞌdi Kiriisto rummeeste goyaka weynaan leh soobahcheen. ꞌDooꞌdaas la a Yuudahi Barsabba layadeeh ichoow Siila.

²³Khadaaba leergeen. Khadaab la wahane kachiiran. ꞌDooꞌdi khadaaba atin isoochiiro a nahi ergaanee ichoow ewweenki urur Kiriisto woyo iꞌdiin u Kiriisto rummeeste. ꞌDooꞌdi nah isoochiirro la a atinhi yaafohi Yaꞌhuud ieheynane Kiriisto rummeysatteene ilkerengeetohi Antiyookhiya ichoow Siiriya ichoow Kiliikiya taalliin. Nebeeheyte!

²⁴Wihi nah daagne, ꞌdooꞌdoo ki intee a atin iyimiyye yeedicho ka atin malalicheene toro atin kaholloocheen. Iꞌdaasenyi nah ꞌdooꞌdaas amur ma siin.

²⁵Nah la a tossanne ꞌdeerka ꞌdooꞌdoo farniin keeno atin ieregno nidah. Icho la a aalasseenyoki nah weyti ꞌdoonno, Barnaba ichoow Baawulo issooraahaan.

²⁶Barnaba ichoow Baawulo la jeenteti hil Yeesso Kiriistohi Kamureene u jiroticho adahe gateen.

²⁷Maantaka Yuuda ichoow Siila iche atin isooeregna, icho la waha nah soochiirre atin isoocheekaan.

²⁸Waha on menye, nah ichoow Rubeyti Munyee ba uus nah huleesoo addan atin korin iche nidah.

²⁹Gololi iyookkoyyohi waakkhakh lakayeessi liisoorriyooche uumhana, diig adamina, naffi laluulliche uumhana, ꞌdooꞌdi isidisan uus isleeurꞌdin. Chirri atin waha tuumman iskaholisseen wihi haaggane yeesseen. A Waakh atin bariisti.

³⁰ꞌDooꞌdi leergate irte, ichoowka ilkerengeetti Antiyookhiya ka urur Kiriisto tuumman ururiche, khadaab idiibe.

³¹Chirri ꞌdooꞌd khadaab soome ka weyti hamaadeen, jeenteti us uur imiigooche u.

³²Yuuda ichoow Siila la icho rubeycho a ꞌdooꞌdi Waákh íyeyyeedo, wihi ittaawe ꞌdooꞌdi Kiriisto rummeeste icheekeene, uur miigoocheen.

³³Inkoo icho geeddoo intaas fiddiyeen ka, ꞌdooꞌdi Kiriisto rummeeste icho nebey ꞌdiiche ꞌdooꞌdi goorat sooergate inokhteen.[23]

³⁵Iꞌdaasenyi Baawulo ichoow Barnaba geeddoo ilkerengeetti Antiyookhiya fiddiyeen. ꞌDooꞌdoo addane ittaawe khabaani Yeedi Kamur cheekeen.

³⁶Inkoo geeddoo lafiddiye ka Baawulo wihi us Barnaba iyidah, “Kaale a nokhanni ꞌdooꞌdi Kiriisto rummeeste ilkerengeetohi goorat inno Yeedi Kamur kacheekne kijiro tuumman a tabno, saggi icho ijiraan a sooagarro.”

³⁷Barnaba ichohi Yoohanahi magahiiskoo Marko layadeeh khaatti, iche ꞌdoona.

³⁸Iꞌdaasenyi Baawulo Marko weyti ꞌdiiꞌde. A mehe us icho ili Bambiiliya ka a katabe, icho hil ma kaleejirin.

³⁹Lammache ba weyti isleeiriirte seley bahte. Barnaba Yoohanahi Marko layadeeh khaatte, anki kurti bicche dahcho kajirto Kuuburo layadeeh kooban igele.

⁴⁰Iꞌdaasenyi Baawulo Siila soobahsate kahe. ꞌDooꞌdi Kiriisto rummeeste icho Waakh iwahe, dahanohi haaggi Kamure buure gesseen.

⁴¹Siiriya ichoow Kiliikiya tabe ururre Kiriisto uur miigooche.