Read rendile Hilassi Ergaano 17 Bible Online

Hilassi Ergaano 17 - rendile bible

Hilassi Ergaano 17

¹Baawulo ichoow Siila orey isohteene, ilkerengeetohi Amfifooli ichoow Aboolloniya dah kagoocheene, ilkerengeetti ꞌDessaloonika minki weysiite Yaꞌhuud kajiro geleen.

²Baawulo la iꞌdi orran us yeeluu irte, minki weysiit irte. Intaas ka teeba seyyah issoorahto Seeri Lanaso tuummamba leejire, wihi Chiirnaanneti Waakh tadeeh idowdowe,

³wihi massan, Ki Lasubhe sina lakawaaricha, toro omoot kasookaha. “Yeessoha an atin idowdowo iche Ki Lasubhee,” iyidah.

⁴ꞌDooꞌdoo Yaꞌhuud la yeedaas rummeeste, Baawulo ichoow Siila ikhayeen. ꞌDooꞌdoo ittaawenye Yaꞌhuud ieheynane Waakh karooro ichoow deyyehoti ittaawenye magah khabto laka Kamur rummeeste.

⁵Iꞌdaasenyi ꞌdooꞌdi Yaꞌhuud inaaf gele, ꞌdeerka ꞌdooꞌdoo sussuuje sokko ka soobaayicheene, ururi suuje yitaaheene ilkerengeet tuumman wereericheen. Minki etoo Yaason layadeeh dihte, kol Baawulo ichoow Siila minkaas kijiraane koogyihiine, ꞌdee reeraas khaatta enenyet igeessa.

⁶Iꞌdaasenyi chirri icho waayeen ka, Yaason ichoow ꞌdooꞌdoo Kiriisto rummeeste khabteene, il kajiiteene, ꞌdooꞌdi ilkerengeet iwewween igeecheen. Riireene, “Reera harra tuumman sina a ikeene, toro toolla ilkerengeetteen laka a yimaateen,” yidaaheen.

⁷“Yaason la icho minkiis ka a martiiste. Icho tuumman la amurreti karnati ili Rooma jebchaane, karnatoo addane Yeesso layadeeh a jira, ꞌdooꞌd idowaan.”

⁸Chirri icho waha daageen ka, urur ichoow weynaanti ilkerengeeteet weyti wereereen.

⁹ꞌDooꞌdi wewween la inkoo us Yaason ichoow ꞌdooꞌdi usu leejire chilimme geeddi kootte lakaꞌdoono icho kaꞌheleen ka ꞌdiicheene, irteen.

¹⁰Uus il ibeennowe ka ꞌdooꞌdi Kiriisto rummeeste Baawulo ichoow Siila ilkerengeetti Beeroya ierge. Chirri icho Beeroya geleen ka minki weysiite Yaꞌhuud irteen.

¹¹ꞌDooꞌdi ilkerengeetti Beeroya la iꞌdi ꞌdooꞌdi ꞌDessaloonika menye, a ꞌdooꞌdoo mujjum dogo khabo, weyti wihi liidowo dagansati, Chiirnaanneti Waakh soomo usu wihi Baawulo illeh idoween rum yahiin yeyo.

¹²ꞌDooꞌdi Yaꞌhuude ittaawe Kiriisto rummeeste. Deyyehoti ittaawenye magah khabto yaafohi Yaꞌhuud ieheynan ichoow mejeli yaafohi Yaꞌhuud ieheynane ittaawe laka Kiriisto rummeeste.

¹³Chirri ꞌdooꞌdi Yaꞌhuude ilkerengeetti ꞌDessaloonika kajiro saggi Baawulo ilkerengeetti Beeroya ka Yeedi Waakh icheeko abte ka, yimaateene, ꞌdooꞌd ururicheene, Baawulo isootukkicheen.

¹⁴ꞌDooꞌdi Kiriisto rummeeste chirraas on Baawulo khaate, beyti buure afiche eleeliche, iꞌdaasenyi Siila ichoow Timooti Beeroya fiddiyeen.

¹⁵ꞌDooꞌdi kootte Baawulo khaate la, Baawulo raahe ichoowka ilkerengeetti Aaꞌden eleelicheene intaas ka nokhteen. Baawulo Siila ichoow Timooti amur ibahche ꞌdee dowwa ilkerengeetti Aaꞌden ka usu a isookhayeen.

¹⁶Baawulo la ilkerengeetti Aaꞌden ka Siila ichoow Timooti sugaayi, weyti uur suujowe jeenteti ilkerengeettaas iyookkoyyohi waakkhakh lakayeessi ibuuhaan u.

¹⁷ꞌDeerka minki weysiite Yaꞌhuud ka, ꞌdooꞌdi Yaꞌhuud ichoow ꞌdooꞌdi Yaꞌhuud ieheynane Waakh karooro laka leehawwooche. Maanti addan la sokko ka ꞌdooꞌdi us ꞌhele leehawwooche.

¹⁸ꞌDooꞌdoo wihi etoo Eebikur layadeeh ꞌdooꞌd abcho raaho ichoow ꞌdooꞌdoo wihi rabittoo Siitoyig [24] layadeeh enenyet abisso raaho leehawwooche. Gaasichokoo mehe worsateen ya, “Waha immarah yeyyeedo mehe essaan?” Gaasichokoo la mehe essaan ya, “Waakkhassi ꞌdooꞌdi yeelane woricho cheeka.” Wihi icho iꞌdaas kayidaaheen la a jeenteti Baawulo Wori Haaggane Yeesso miinsan ichoow saggi Yeesso omoot ikasookahe ikayeyyeedo.

¹⁹Baawulo khaateene, kurteti Ariyobaag ka jaldaabti tossatti igeecheen. Wihi iche tidah, “Waha husube at ꞌdooꞌd abisso iche aban ꞌdoonna.

²⁰Waha at nah icheekto, gaasoo a wihi nah injire idaagin, toollaka nahi wihi icho yahiin abanni iche ꞌdoonna.”

²¹ꞌDooꞌdi ilkerengeetti Aaꞌden kajiro ichoow ꞌdooꞌdi yeelane intaas fiddiyo tuumman ayti husube us dagansati toro us kahawwoocho on menye, walah addane us haaggicho mele.

²²Baawulo ꞌdeerka ꞌdooꞌdi kootte Ariyobaag ka tossati ortiis tolossate, “Mejeli Aaꞌden!” yidah. “Saggi atin jitat tuumman ka ꞌdooꞌdi waakkhassi ittaawe wahti itahiin a arga.

²³Wihi tahe, geedda an ilkerengeettiin goya dah kagooche, an wahanyeyyohi atin wahattaan mujjum fiiriche, chalagtoo hoola lakasoorriyoocho waha kachiiranyahiine ꞌhele, WAAKKHI LIIGARAN. Kaas chirri atin igaran laka atin wahattaan, iche toolla atin isoocheeka.

²⁴“Waakkhi harra ichoow wihi tuummane goya kajiro soouume, a Kamuri serey ichoow harra leh. Ulla minassi weysiite dahanohi weeli enenyet diseen goya ma fiddiyo.

²⁵Ulla iꞌdoo us wohoo ꞌdoonuu, dahanohi weeli enenyet ma liikafalo. A mehe usu rubeytiissa weeli enenyet tuumman jiro ichoow neebsi ichoow walah tuumman siicha.

²⁶Etoo kalday on ka yaafohi harra tuumman soouume ꞌdee harra tuumman furtaane, toro inti icho furtaan ichoow maanti icho furtaan a gooche.

²⁷Ulla iꞌdaas a yeele ꞌdee icho laka usu yowtaan, ꞌdee kolossoo yowtaani kasooyegaan. Iꞌdaasenyi Waakh eteen us kadeeryahe mele.

²⁸‘A mehe inno goytiissa kajirra, kasohanna, toro kanoolnahe.’ Iꞌdi mammahtiintoo tadeeh u, ‘Inno laka a delootiissa.’

²⁹“Maantaka inno a nyaakhuti Waakh gone, kol Waakh iꞌdi iyookkoyyohi ꞌdahabyahe ommos iꞌdi lahaageetyahe ommos iꞌdi dagakki layeele yahe ommos iꞌdi iyookkoyyohi layeelo yahe uus inno koogeynan.

³⁰Goorat ꞌhor Waakh enenyeti aytiis igaran walah us iekkaache mele, iꞌdaasenyi toolla amuri us enenyet tuumman meelbaaw us kijiro ka ibahcho, a ki icho uskeelicho kasoonokhtaan.

³¹A mehe us ibeenki us enenyet tuumman jiti fissan ka eti us soobahsate ka hukkumo a gooche. Waakh la omoottaas us kasookahche ka enenyet tuumman a irummaache.”

³²Chirri icho Baawulohi omootti lakasookaho kaayyeedo daageen ka, gaasoo kachaarteene, iꞌdaasenyi gaasoo “Atihi waha inokhatti kayeyyeeddo iche daagin ꞌdoonna,” iyidaaheen.

³³Baawulo geeddaas ka Jaldaab katabe.

³⁴ꞌDooꞌdoo rucchul la Baawulo raahe Kiriisto rummeeste. Goycho ka, koo a etoo jaldaabti toli Ariyobaagenye Diyoonissa layadeeh ichoow makhaabassoo Daamaris layadeeh ichoow ꞌdooꞌdoo addan.