Read rendile Hilassi Ergaano 19 Bible Online

Hilassi Ergaano 19 - rendile bible

Hilassi Ergaano 19

¹Aboollo ilkerengeetti Koriinto kajiraayi, Baawulo kahe il dah kagooche ilkerengeetti Efeesso gele, intaas ka abattitoo ꞌhele.

²Ulla wihi us icho worsate, “Maanti atin Yeesso rummeysatteen Rubeyti Munyee a ꞌhesseen?” Wihi icho ilaabeen, “Nah Rubeyti Munyeenye jirto laka ma daagin.”

³Baawulo ꞌdeerka wihi us worsate, “Maanti atin labaattissiye, soonnaankeyya raahteen?” Wihi icho ilaabeen, “Soonnaan Yoohana.”

⁴Baawulo wihi us iyidah, “Wihi baattissiyo Yoohana enenyet tusso, a ꞌdooꞌdi uskeel kasoonokhte. Yoohana rubeytiis la wihi us ꞌdooꞌd iyidah, ‘Ki ꞌdubeey ka yamiit rummeesda,’ kaas la a Yeesso.”

⁵Chirri icho waha daageen ka magah Yeessohi Kamure ka labaattissiye.

⁶Chirri Baawulo icho dahano korche ka, Rubeyti Munyee isooyagte, icho la afassi icho idaagin kaayyeedeene toro wori Waakh kayimiy cheekeen.

⁷Ichohi labaattissiye la isgoya a geeddi et tomon ichoow lamma.

⁸Baawulo minki weysiite Yaꞌhuud gele, intaas ka hay seyyah roorro laan icho hawwaaste, wori dakhi Waakh miinsane isoojijjiitaa.

⁹Iꞌdaasenyi ꞌdooꞌd gaasiiskoo a ki matah miigenye, yeed rummeysan ꞌdiiꞌde, toro enenyet tuumman ortiis ka, jiti Kamur wihi noole sussuuje kacheekeen. Baawulo ꞌdeerka icho katabe. Abatti khaatte, maan tuumman min Turannoki buure ka ꞌdooꞌd Yeedi Waakh kaleehawwooche.

¹⁰Guꞌh lamma tuumman ba saggaas on isohte ichoowka ꞌdooꞌdi boroofenhi Aassiya kajiro tuumman ki Yaꞌhuud ichoow ki Yaꞌhuud ieheynan ba Yeedi Kamur daage.

¹¹Waakh la Baawulo ka, wihi ittaawenye weeli enenyet yeelin iubaaꞌdane injire liiargin yeele.

¹²ꞌDeerka dafartoor fool lakahiyyaayti ichoow darfohiiski chaafo kalaabo sartiissa on ꞌdaare laka a lakhaata ꞌdooꞌdi khakkhannan liigeecha, samaataane ginnayyo laka enenyet goya lakariha.

¹³ꞌDooꞌdoo Yaꞌhuud a sossohta ꞌdooꞌdi ginnayyo dakhtaan ginnayyo kabahchaane, magah Yeessohi Kamurenye lawaho ka ginnayyo bihin leheet. Wihi icho ginnayyo iyadeehiin, “Antohi magah Yeessohi Baawulo woriis cheeko ka amure kibahcha, soobah.”

¹⁴Ínam teebati etoo kuhaanihi weene Yaꞌhuude Iskeefa layadeeh leeyahe iꞌdane yeessa.

¹⁵Maantooka ginna wihi iche icho ilaabte, “An Yeesso a garda, Baawulo laka wihiis a garda, iꞌdaasenyi atin a ayyo?”

¹⁶Eti kootte ginna dakhatte ꞌdeerka icho tuumman inyaame, icho tuumman kahataate. Icho weyti jahe ichohi murukkheenye toro nabarre diigto minkiis kafirdeen.

¹⁷Chirri ꞌdooꞌdi Yaꞌhuud ichoow ki Yaꞌhuud ieheynane ilkerengeetti Efeesso kajiro tuumman wahaas daage ka, weyti burꞌdowe. Magah Yeessohi Kamure la weyti liinkaanyite.

¹⁸ꞌDooꞌdi ittaawenye rummeeste, yimiyye, uskeeli icho yeelaan ꞌdow ka cheekeen.

¹⁹ꞌDooꞌdoo moroyyee laka khadaabbetichoti yuyyuuban sookhaate ꞌdooꞌd tuumman ortiis ka gubeen. Khadaabbeti yuyyuuban la chirri islakachibe gatoticho a chilim alif tomon chan. [25]

²⁰Iꞌdaas ka la, ꞌdooꞌdi buurenye Yeedi Kamur daage, toro raahe.

²¹Inkoo waha tuumman yitaaheen, Baawulo Rubeyti Munyee woytaayi wihi us gooche, chirri us ilkerengeetti weene Yeerusaleem irti, ili Makedooniya ichoow ki Akhaaya dah kagoocha. Wihi us yidah, “Inkoo an intaas irde, ilkerengeetti weene Rooma laka a sooarga.”

²²Baawulo geeddi us ibeennetoo boroofenhi Aassiya fiddiyo reeroo lammeenye kiisenye usu gargaaro ili Makedooniya iergate. Reera a Timooti ichoow Eraasta.

²³Chirraase ilkerengeetti Efeesso ka jeenteti yeedi Jiti Kamur miinsan u, sinati buure isoobahte.

²⁴Etoo tumaalenye Demmediroos layadeeh la minki waakkhi deyyahe Arteemis layadeeh lakawahti iche iyookkoyyohoo nunnucchule lahaagtoo dakhan lakahaaggiche ihaaggicha. Bacchaaratiis la ꞌdooꞌdi hiliis kajiro weyti chilimmeti buure ikeenta.

²⁵ꞌDooꞌdaas ichoow ꞌdooꞌdoo addane hilicho iꞌdi kaas yahe wahe. Wihi us iyidah, “Era saggi kamurroonkeen bacchaarata ikayamiit a garattaan.

²⁶Atin la wihi eta Baawulo layadeeh yeelo a agartaane, toro la a isidaagtaan. Us wihi us essi a mehe ya, waakkhassi dahanti enenyet haaggicheen koloo kalday laka Waakh mee. Ilkerengeetti Efeesso ichoow boroofenhi Aassiya buurtiis ka, ꞌdooꞌdi ittaawe a baabiiche.

²⁷Toollaka wihi soosohti ka bacchaarateenta magah a uskulaata. Wahaas kalday la menye, minki waakkheenki deyyahe weene Arteemis layadeeh laka magah a waaya. Waakkheenki Aassiya ichoow harra tuumman ka lawahti wohoo marahe yateeh.”

²⁸ꞌDooꞌdi bacchaarti chirri us waha daage ka weyti hollowe, riire, “Arteemisti Efeesso a weentahe!” yidah.

²⁹Chirraas on riirit ilkerengeet tuumman kataaꞌhe. Urur Gaayo ichoow Aristaarkoshi Baawulo walhicho ili Makedooniya ka sooraahe khabte. Leeoryeene, inti lakagirꞌdaamo geecheen.

³⁰Baawulo rubeytiis usuhi urur ortiis irti ꞌdoone, iꞌdaasenyi abatti usu tiratte.

³¹Weynaanti boroofen gaasoo aalassiise laka Baawulo farniin isooꞌdiichene hawwaasteen uus minki lakagirꞌdaamo iran.

³²Geeddaas ka la meel tuumman a riirit kalday on. ꞌDooꞌdoo riirit ka wohoo essa, koo la riirit ka wohoo addane essa. ꞌDooꞌd buurtiis la wihi icho intaas ka isikeene laka ma garti.

³³ꞌDooꞌdi Yaꞌhuud la etoo Alekisaanda layadeeh urur isootakhe, wihi us yayyadeeh la icheeke. Ulla dahan ka ꞌdooꞌd leeyeede, wihi jiro icheekin ꞌdoonáa.

³⁴Iꞌdaasenyi chiꞌicho saggi us Yaꞌhuud iyahe kaseen ka, hooyoo kalday ka geeddi sahaꞌd lamma tuumman riireene, “Arteemisti ilkerengeetti Efeesso a weentahe,” esseen.

³⁵Eti ilkerengeet ka khadaabbe chiiro urur yaasiche, wihi us yidah, “ꞌDooꞌdi Efeesso, ꞌdooꞌdi harra tuumman saggi ilkerengeetti Efeesso minki weysiite Arteemisti ween ichoow dagahti lagane serey kasoodihte iyaakhisso ma garti?

³⁶Maantaka et runta ꞌdiiꞌdo mele gone, wihi lakaaꞌdoono a atihi gammadisso, wohoo ꞌdalammoon la iyeelin.

³⁷ꞌDooꞌda atin inta keenteen minassi weysiit ma hatine ommos waakkheenki deyyah ma igafin.

³⁸Chirri Demmediroos ichoow tumaassi addan etoo wohoo kakhabto la, kootiin a jira. Weynaanti sirgaal laka a jirta, a irteene eti icho wohoo iskakhabaan a cheekti.

³⁹Chirri atin wohoo addan keenin ꞌdoontaan la, toli amurre ꞌdoonto labahcha yeedaas lamassicha.

⁴⁰Saggi walah ijiraan u, maalinka a geeddi inno lakhabti jeenteti ururi il baabuluu. ꞌDeerka riirita ka walah inno laabno mele, jeente il liibaabulo mele gon.”

⁴¹Inkoo us waha yidah ka urur seley kahche.