Read rendile Hilassi Ergaano 24 Bible Online

Hilassi Ergaano 24 - rendile bible

Hilassi Ergaano 24

¹Inkoo Baawulo lakhabte ibeen chane kutte ka, kuhaanihi weyti weene Anaaniya layadeeh, ewweenkoo Yaꞌhuud ichoow etoo af kaatahe Tertullo layadeeh khabaayi ilkerengeetti Kaaysareya yimiy. Gaafana ortiis yimaateene, Baawulo cheekteen.

²Chirri Baawulo lawahe ka, Tertullo wihi Baawulo lakacheekti iꞌduu Feelig ortiis ka cheeke, “Eti weenoow, weynaantaah ka, geeddi deere nebey khabne, wihi tuummane yaafteen deef ikeeno la a layeele.

³Feelighi weyti weenoow, meel tuumman ka ichoow jitassi ittaawe ka, gargaara ka kalaꞌddi buurenye kisoolaabna.

⁴Iꞌdaasenyi anihi kiꞌharcho ma ꞌdoono, a kidaahe gaabi ka wihi nah kisoocheekanni uuri ꞌdabakhe ka daganso.

⁵“Eta wihi nah kaagarre, a etoo weyti sina keeno. Harra tuumman ka etane ꞌdooꞌdi Yaꞌhuud goyaka ururi il baabulo sootukkicha. Rabitti suujenye eti Naasaret raahto laka usu matakkichee.

⁶Usu minki Waakhe buure laka a biꞌdirroon leheete ꞌdeerka khabanne.[29]

⁸Wihi at usu wowworsatti ka ati rubeytaah waha tuummane nah kacheekanni runtiche a abatta.”

⁹ꞌDooꞌdi Yaꞌhuud tuumman af isgele, waha tuumman a rum yidah.

¹⁰Chirri gaafana dahan ka Baawulo yeyyeed iyidah ka, Baawulo wihi us ilaabe, “Saggi at guꞌhassi ittaawe eti yaafta hukkumo ieheet a garda, ꞌdeerka an weyti hamaada chirri an ortaah ka isiyeyyeedo.

¹¹An ibeen tomon ichoow lamma kutte on ilkerengeetti weene Yeerusaleem irde Waakhe wahdaa. Chirri at goya yeyte, dowwa on runtiis abatta.

¹²ꞌDooꞌdi Yaꞌhuude ani icheekti, anihi minki Waakhe buure goyaka etoo leeiriiro ma iargine, ommos anihi minassi weysiite Yaꞌhuud goyaka ommos ilkerengeet goyaka urur sootukkicho ma iꞌhelin.

¹³Wihi toolla icho ortaah ka ikacheektaan laka runticho tusin ma yabuuꞌdiin.

¹⁴Wahane kisoocheeka, Jita toolla icho a ki rabitti suuje kidowaan, iche an Waakh aacchinyeteenyo kawahda. Iꞌdaasenyi wihi tuummane Chiirnaanneti Amurre ichoow ti ꞌdooꞌdi Waákh íyeyyeedo kachiiran a israahaane a rummeesda.

¹⁵Khajjeeli icho awtichuu Waakh kakhabaan, annaka a khaba. Khajjeelaas la a ki ꞌdooꞌd tuumman omoot ka lasookahcho, ki fiffissan eheetteey ommos ki sussuuje eheetteey ka ba.

¹⁶Anna jeentetaase kol tuumman Waakh ortiis ichoow weeli enenyet ortiis ka hol idowa, rubeyti suujoon ikacheekan ikhaba.

¹⁷“Inkoo an guꞌhassoo tuumman khar kijire ka ilkerengeetti weene Yeerusaleem isoonokhde, yaafteeyti Yaꞌhuude miskiine chilimme ikeene, sadakha laka bahche.

¹⁸Chirra icho anihi wahaas yeelo uranti minki Waakhe buure ka iꞌheleen, an Daawti Dikhaaleet a massiche. Urur ileejire mele, walah uskulaate la mele.

¹⁹Iꞌdaasenyi ꞌdooꞌdoo Yaꞌhuude boroofenhi Aassiya kayimiy intaas a kajire. Ani ka, icho laka kootte intane kijiraane awtichuu chirri icho wohoo ikakhabaan kisoocheektaan.

²⁰Chiꞌiche iꞌdaas ieheynan, ꞌdooꞌda inta kajiro, maanti an Jaldaabti Weene Yaꞌhuud orche toolle, amuri an jebche a kisoocheekeen.

²¹Kolossoo a waha kaldache an goycho ka tolossade an riire an idah, ‘Wihi kaldache maalinka liikahukkumo, a jeenteti ani saggi ꞌdooꞌdi tuume toro isookaho irummeesdi.’ ”

²²Feelig wihi ꞌdooꞌdi Jiti Kamur raaho rummeesti a garta, tol hide. Wihi us yidah, “Maanti eti iskar tuumman itoollo Luusiyas layadeeh inta yimiy, iche yeediin goocha.”

²³Feelig eti koobbintoo iskareet itoollo amur ibahche, ꞌdee Baawulo latoorriba, iꞌdaasenyi ma lahido toro aalassiiski wohoo iyeelin ꞌdoono ma lajeycho.

²⁴Inkoo ibeennetoo kutte ka, Feelig makhaabassiisti Durasilla layadeehe inanti Yaꞌhuude khabaayi yimiy. Ulla Baawulo enenyet iꞌdiiche, chirra us kakhuufnaanki Yeesso Kiriisto lakakhuufo miinsan kayeyyeedo ka dagansate.

²⁵Chirra Baawulo wori wihi fissane layeelo ichoow isjeyin ichoow hukkunnaanki ibeenki ꞌdaꞌddaboote Waakh enenyet soohukkumo kayeyyeedo ka, Feelig weyti roorro gesse, Baawulo, “A geeddaas on maanta! A geeddi at iratti on. Maanti ileehaaggan a kiwaha,” iyidah.

²⁶Ulla Baawulohi chasti chilimmetoo siicho khajjeela, ꞌdeerka geeddi buure ꞌdooꞌd ergate, Baawulo liisowahe, leehawwooche.

²⁷Inkoo guꞌh lamma kutte ka, eti Boorkiyo Feestas layadeeh meel Feelig gele. Iꞌdaasenyi Feelig usuhi ꞌdooꞌdi Yaꞌhuud jilhaati ꞌdoona, Baawuló jeela goya katabe.