Read rendile Hilassi Ergaano 3 Bible Online

Hilassi Ergaano 3 - rendile bible

Hilassi Ergaano 3

¹Maantoo, geeddi sahaꞌd saagaassi maalimeete lakaweesti ka, Beetero ichoow Yoohana minki Waakhe buurenye iꞌdulaan.

²Etoo uus goorat desse luhlo laa la a jire. Eta maan tuumman a lasoosiꞌda, aritti minki Waakhe buure ka Aritti Haaggan layadeeh loorrommicha eti gelo tuumman walah daaha.

³Et chirri us Beetero ichoow Yoohanahi minki Waakhe buure gelin leheet arge ka, chilimme daahe.

⁴Beetero ichoow Yoohana et indo kakhabteen. Beetero la wihi us et iyidah, “Bal nah sooyey!”

⁵Et la, chiꞌ wohoo lasiicho koogyahe, ꞌdooꞌd yeye.

⁶Beetero ꞌdeerka et iiyeyye, “Walah chilimenye an khabo mele, iꞌdaasenyi wihi an khabo kisiicha. Antohi magah Yeesso Kiriistohi Naasaret ka, kahe soho!”

⁷Ét dahanti miigeet sookhabte, samacchaar sootololiche, chirraas on et luhlo haagsateene, miigoween.

⁸Serey isoonyaame, tolossate, sohte. Reér raahe minki Waakhe buure leegele. Geeddaas tuummane us sohti la hamaad ka sereye inyannyaama, Waakh koolicha.

⁹Enenyet tuumman la usuhi sohti Waakh koolicho arge.

¹⁰Chirri icho saggi us eti orran luhlo laaye, minki Waakhe buure ka Aritti Haaggan fiddiyo walah daaho iyahe argeen ka, wihi et kayitah weyti kagirmeesteene roorro gesse.

¹¹Et Beetero ichoow Yoohana kadage. Enenyet tuumman la girmeeste ankaas isooryeene, inti icho toollaane, Oosim Soolomon layadeeh isooryeen.

¹²Beetero chirri us waha arge ka wihi us ꞌdooꞌd iyidah, “Mejeli Issiraayeloow a iꞌdoh waha ikagirmeysattaan? A iꞌdoh iꞌduu nah iyeytaan? Kol nah miigteenyo on ka ommos nah weyti Waakh kahamaadinno eta samaanne akoogeynana.

¹³Waakh Aburaaham ichoow Isakh ichoow Yaakoobo ichoow Waakh aacchinyeteenna Yeessohi falfatiise weynaache. Atin la Yeesso dahanohi chiiyeet gelisseene layigis. Chirri Bilaato soofurin gooche laka, atin Bilaato ortiis ka us keenyo menye tidaaheen.

¹⁴Atin Eti Munyeenye toro Fissan a ꞌdiiꞌddeene, etoo dubunuunu enenyet yigisye atin liisoofuro daahteen.

¹⁵Atin ki jiro kasoouummanto a tigaaseene, iꞌdaasenyi Waakh omoot a kasookahche. Nah la gartaas a laabna.

¹⁶Kakhuufnaanki nah antohi magah Yeesso kakhuufno ka, eta orran dakkhan atin wihiis garattaane, toolla la agartaan, a lasamaache. Magah Yeesso ichoow kakhuufnaanki usu kayamiit, iche eta tuum samaache, saggi atin tuumman iagartaan u.

¹⁷“Toollaka yaafeey saggi atin ichoow weynaantiin garawwaayyo ka wahaas iyeesseen a garda.

¹⁸Iꞌdaasenyi Waakh saggane wihi us ꞌdooꞌdi Waákh íyeyyeedo tuumman orey cheeke ka ibuuhiche. Wihi icho orey cheekeen la a Lasubhehiiski sina lakawaaricho.

¹⁹Uskeeliin kasoonokhda, Waakh iurgiya, ꞌdee uskeeliin a lahiyyaayo, ꞌdee Kamur a atin imaalo,

²⁰ꞌdee Ki Lasubhe us atin isoobahche a atin isooergo, kaas la a Yeesso.

²¹Iꞌdi goorat archiiy Waakh ꞌdooꞌdiiski munyeenye usú íyeyyeedo ka cheekuu, wihi Waakh gooche, Yeesso goobi Waakhe fiddiya ichoowka ibeenki Waakh walah tuumman husubnaacho yateeh.

²²Iꞌdi tahe Muusa mehe yidah ya, ‘Kamuri Waakkhiine etoo yaaftiinenye iꞌdeey u Waákh íyeyyeedo a atin isooerga. Atin la taba wihi us atin idowo tuumman nabah isuda.

²³Eti tuummane etaas Waákh íyeyyeedo idagansan, ꞌdooꞌdi Waakhe goya lakabahcha, labaabiicha.’

²⁴“ꞌDooꞌdi Waákh íyeyyeedo tuumman uus Saamuwel kasookhabatte ichoowka ki ꞌdubiis sooraahe tuumman, wihi maanassa yitah a kaayyeede toro orey on cheeke.

²⁵Atin a yeeleti ꞌdooꞌdi Waákh íyeyyeedo toro a yeeleti ayyinti Waakh aacchinyetiin igooche muꞌdan. Waakh Aburaaham mehe iyidah ya, ‘Hiiyyaah ka, ꞌdooꞌdi harra tuumman a imaala.’

²⁶Maanti Waakh falfatiis sooerge, kolooraat atine atin isooerge, ꞌdee ebba jitiiski suuje kasoolaaba. Waakh saggaase atin ikamaale.”