Read rendile Hilassi Ergaano 5 Bible Online

Hilassi Ergaano 5 - rendile bible

Hilassi Ergaano 5

¹Etoo Anaaniya layadeeh makhaabassiisti Saffiira layadeeh khabaayi gosiiskoo ororiche.

²Chilimme gaasoo laabte, iꞌdaasenyi wihi addan ergaano ikeene. Arantiis laka a leeogtahe.

³Beetero la mehe iyidah ya, “Anaaniya, saggoh Seytaan uuraah ibuuhiche, ichoowka Rubeyti Munyee been ikagoosse, chilimmeti gosaah bahe gaasoo ilaabatte?

⁴Gosaas geeddi at iororin kaahha on menya? Inkoo at ororisse la chilimme dahantaahha on menya kijirte? Mehe mali iꞌdee kiguꞌdde? At weeli enenyet ma ekkeysanne, iꞌdaasenyi Waakh rubeytiissa ekkeysatte.”

⁵Anaaniya chuꞌus yeedaas daage ka, il guꞌdde, yumuy. ꞌDooꞌdi yeedaas daage tuumman weyti roorro gesse.

⁶ꞌDooꞌdi nunnugul ꞌdeerka yimiyye, sartiis dafar kaayyube, khaate hawwaale.

⁷Geeddi sahaꞌdohoo seyyahe lafiddiye, arantiis wihi yitah ma garatti soogesse.

⁸Beetero la wihi us iche worsate, “Chilimmeti atin gosiin gatteen tuumman a tan on a?” Iche la wihi iche tidah, “Aa, iche tuumman a geeddaas on.”

⁹Beetero wihi us arám iyidah, “Saggoh ati ichoow makhaabalaah isileegoossaane Rubeyti Kamur ikajjaan? ꞌDooꞌdi makhaabalaah hawwaale afafe toolla ati laka kikhaata.”

¹⁰Chirraas on ortiis ka il guꞌdubte tumuy. Reeri nunnugul ꞌdeerka min soogele, saggi iche itumuy arge. Iche laka khaateene makhaabaliche garabiis ka hawwaaleen.

¹¹Urur Kiriisto tuumman ichoow ꞌdooꞌdi yeedaas daage tuumman, weyti nahtime gesse.

¹²Ergaano ꞌdooꞌd goyaka wahanyeyyohi ittaawenye miigti Waakh tuso ichoow girmo yeesse. ꞌDooꞌdi Kiriisto rummeeste tuumman la orran Oosim Soolomone kakulma.

¹³Chirri enenyet icho weyti inkaanyito laka, et addane goycho leemeet iggo mele.

¹⁴Eheetteey laka, enenyeti buurenye Kamur rummeeste, mejel ichoow deyyeho liikasookhaye.

¹⁵Jeenteti wihi ergaano haaggissuu, enenyet ꞌdooꞌdichoki khakkhannan jitate keene, siriiro ichoow ilaalle kareeche. Iꞌdane yeeleene, ꞌdee kolossoo chirri Beetero sohti oosintiis ꞌdooꞌdoo khakkhannan oosimmoosse, samaataan.

¹⁶Enenyeti buure ilkerengeetohi Yeerusaleem idow tuumman ka soobahe, ꞌdooꞌdichoki khakkhannan ichoow ki ginnayyo dakhtaan sookhaate. Icho tuumman la lasamaache.

¹⁷Kuhaanihi weyti ween ichoow ꞌdooꞌdiiski usú raaho rabitti Sadukaayo kijiro ba jeenteti ergaanuu inaaf gele.

¹⁸Ergaano sookhabatte jeelati ilkerengeeteet ka hidde.

¹⁹Iꞌdaasenyi ibeen ka, hertoo Kamur afafhi jeela furte, ergaano bihisse.

²⁰Wihi iche itidah, “Nyaama, minki Waakhe buure irda, enenyet buuhi wora jiroti husub icheeka.”

²¹Ergaano la yeedaas liiyidah raahte, baryo ka, minki Waakhe buure gesse iꞌdi liiyidah u enenyet walah abisse. Kuhaanihi weyti ween ichoow ꞌdooꞌdiis ba Jaldaabti Weene Yaꞌhuud tuummamba tol iwaheen, iskar ergeene ergaano jeela ka a lasookhaato yidaaheen.

²²Iꞌdaasenyi chiꞌ iskare jeela tamiit, ergaano intaas ma kijirto. ꞌDeerka iratte cheekte mehe tidah ya,

²³“Chiꞌ nah jeela iranni, iskarti afaf yaakhisso a tolossa one, min la afaf mujjum on hidanyihiin. Iꞌdaasenyi chiꞌ nah furro, nah goya gello, weeli enenyet min goya ma kijiro!”

²⁴Eti iskarti minki Waakhe buure yaakhisso iween ichoow kuhaaniyyohi wewween chiꞌicho wora daageen ka wihi nool isworsateene, wihi soobaho kamalaleen.

²⁵Chirraas on etoo la yimiyye iiyeyye, “Reeri chele atin jeela gelisseen minki Waakhe buurenye goya kijira, enenyet walah abcha.”

²⁶Eti iskarti minki Waakhe buure yaakhisso iween, iskartoo khabaayi bahe ergaano toro sookhabte. Iskartaas la ergaano ma tottoganne, afi haaggan on ka soobihisse. Wihi iche karoorte la a ꞌdooꞌdi ꞌdee dagah kachibo yagiis.

²⁷Ergaano sookhaatte Jaldaabti Weene Yaꞌhuud ortiis keente, ꞌdee kuhaanihi weyti ween ergaano waha a iyidaahe.

²⁸“Nah goorat a katirriinsanne, amur atin ibihinne, uus atin magahi reenkaas ichoow yeediis enenyet abin. Iꞌdaasenyi wori Yeesso miinsan ilkerengeetti weene Yeerusaleem tuumman a kataaꞌhisseene, toro diiggiis nahe nah korin ꞌdoontaan.”

²⁹Beetero ichoow ergaanoti addan la mehe soolaabeen ya, “Wihi massan, nah Waakhe yeediis raahna, enenyet mee yeediis raahno.

³⁰Inkoo atin Yeesso massalaaba kakaahteene atin tigaaseen, Waákh aacchinyeteen, Yeesso rubey a isoolaabe, omoot kasookahe.

³¹Waakh anki dahantiisti miigeet ka weynaache, Karnat ichoow ꞌDoorribe kayeele, ꞌdee yaafohi Yaꞌhuud uskeelicho kasoonokhtaane, Waakh la uskeelicho ikakuta.

³²Nah ichoow Rubeyti Munyeenye Waakh eti yeediis raaho tuumman siicho a garti waha tuumman.”

³³Jaldaabe la chiꞌiche wahaas daagte ka, weyti hollowte, ergaano ogoos ꞌdoonte.

³⁴Iꞌdaasenyi etoo Farissaayeenye Gamaliyeel layadeehe, enenyet tuumman inkaanyito a jira. Usu a tagaanki amurre. Gamaliyeel Jaldaabti Weene Yaꞌhuud goycho ka tolossatte, amur bahche ergaano iꞌdaaru khar a liibahcho.

³⁵ꞌDeerka wihi us jaldaab iyidah, “Mejeli Issiraayeloow, ꞌdooꞌda wihi atin sooyeessaan mujjum kamalda.

³⁶Wihi inno orey agarre, Dewuudo a soobahe etoo ween iskayeele. Ullaka geeddi et kud affare raahte. Inkoo usu layigis ka, ꞌdooꞌdiiskaas ichoow yeediis tuumman ba baabe.

³⁷Kaas ꞌdubiis ka, maanti enenyet leekkaacho ka Yuudahi boroofenhi Gaalilaaya inno gele. Ullaka ꞌdooꞌdoo usu raaho sirgaal ꞌdiiꞌdo ꞌhele. Inkoo usu layigis ka ꞌdooꞌdiis tuumman seley turraaꞌhe.

³⁸Maantaka yeeda ka a atin waanicha, ꞌdooꞌda wohoo rucchul laka ayeelina! ꞌDiicha a irti! A mehe chirri wihi icho kamassaan ichoow wihi icho yeelaan weeli enenyet on kasoouummameen a baabaan on.

³⁹Iꞌdaasenyi chiꞌ yeedicho Waakh kiyimiy, reera koloo kalday laka jeyin ma tabuuꞌdiine, atinhi Waakh rubeytiis ꞌdiiꞌddaan on isagartaan.”

⁴⁰Yeed Gamaliyeel malicho urgiyiche. Ergaano min goya iwaheene, lajahe. ꞌDeerka amur ibahcheen, uus icho yombuu toro magah Yeesso kaayyeedin. ꞌDeerka laꞌdiiche.

⁴¹Ergaano Jaldaabti Weene Yaꞌhuud katabte. Weyti hamaadeen a mehe jeenteti icho koo Yeesso iyahiin u sinati lakawaaricho a muꞌdanyahiin.

⁴²Maan dakkhan uranti minki Waakhe buure ka ichoow minan ka Wori Haaggane saggi Yeesso rumanka Ki Lasubhe iyahe iche enenyet abisso toro cheekto ma ꞌdiin.