Read rendile Rooma 1 Bible Online

Rooma 1 - rendile bible

Rooma 1

¹Khadaaba eti atin isoochiiro a ani, Baawulohi ilbooy Yeesso Kiriisteenye, toro la ergaanoti Waakh soobahsate, ꞌdee Woriiski Haaggan cheekto.

²Wora Haaggane goorat archiiy on Waakh ꞌdooꞌdi Waákh íyeyyeedo ka ayyiche, icho la Chiirnaanneti Waakhe munyee goya kachiireen la,

³Weeliissa miinsanyahe, ulla a Yeesso Kiriistohi Kamureene. Sartiis la a sarti weeli enenyete, ulla hiiy karnati Dawuud layadeehe kayimiy.

⁴Waakh maanti us Rubeyti Munyee ka Yeesso Kiriisto omoot kasookahche, jiti miige ka saggi rumanka Yeesso Kiriistohi Kamureene Weeli Waakh iyahe a tuse.

⁵Kiriisto ka ichoow iroonoti magahiis u, haaggi Waakhe buure ichoow hila khummane ergaano layahe a ꞌhelle. ꞌDee ꞌdooꞌdoo yaafohi Yaꞌhuud ieheynan tuumman kakhuufnaanki icho Waakh kakhuufaane yeediis raahaan iwahna.

⁶Atin laka ꞌdooꞌda Waakh wahe Yaꞌhuud ieheynane koo Yeesso Kiriisto yateeh goya a kajirtaan.

⁷Atinhi tuummane ilkerengeetti weene Rooma taalliine, Waakh ꞌdoono, Waakh wahe ꞌdooꞌdi Waakh lakayeele, iche khadaaba isoochiira. Waakkhi Aabbaheene ichoow Yeesso Kiriistohi Kamure ba atin imaalaane nebey atin kakaalaan.

⁸Wihi an kasoodaabdi, Waakkhaaya Yeesso Kiriisto ka kalaꞌd ilaaba jeentetiin u. Wihi tahe, saggi atin Yeesso Kiriisto ikakhuuftaan, ꞌdooꞌdi harra kajiro tuumman a cheeka.

⁹Waakkhi an uureey tuumman ka ifalo, an Wori Haaggane Weeliis miinsan an cheeko, garti saggi an ayti rummaat ieldi koli an weesdi tuumman an koloo kalday laka atin ikadabin a laaba.

¹⁰Chaꞌan weesdi Waakhe hawwaasda, ꞌdee chiꞌ ꞌdoonintiis tahe, Waakh jit isoofura, ꞌdee dowwanoha ka atin sooꞌdaara.

¹¹Anihi atin argo ꞌdee siintoo Rubeyti Munyee katamiit atin siicho, ꞌdee rubeyohiin miigowaan weyti imoona.

¹²Wihi an eldi a mehe ya, saggi eteen ba Kiriisto ikakhuufo ka, uur a ismiigoonna.

¹³ꞌDooꞌd Kiriistokaaw, saggi an kolassi ittaawe anihi atin sooꞌdaaro iꞌdoone, iꞌdaasenyi ichoowka uliba wohoo on ijeychaan abda. Anihi goytiin ka hil haaggicho gurnaanki Rubeyti Munyee argo iche ꞌdoona, saggi maanta an ꞌdooꞌdi addane yaafohi Yaꞌhuud ieheynan goyaka hil ihaaggiche ichoowka gurnaan isoobahuu.

¹⁴Hili Waakh ikorche a ki enenyet tuumman. Ani ꞌdooꞌdi hugummeti Giriig raaho ichoow ki hugummeti Giriig iraahin ba hilichooda khaba. Ani ꞌdooꞌdi soome ichoow ki isoomin ba hilichooda khaba.

¹⁵Jeentetaas u, anihi atinhi ilkerengeetti weene Rooma taalliin laka Wori Haaggan atin icheeko iche weyti ꞌdoona.

¹⁶An Wori Haaggan ma kuuryaawo. Iꞌdi tahe Wora a miigti Waakhe hol dowto, eti tuummane Kiriisto rummeeste ribto. Koloo ꞌdooꞌdi Yaꞌhuude Kiriisto rummeeste lariba, ꞌdee toro yaafohi Yaꞌhuud ieheynane Kiriisto rummeeste laka lariba.

¹⁷Wora Haaggan wihi us soobabbakkaahicho a saggi Waakh enenyet ꞌdooꞌdi ortiis ka fiffissan ikayeelo. Waha la koli enenyet Waakh kakhuufe kaldach on yateehiin. Iꞌdi liichiiruu, “Eti Waakh ortiis ka fissan Waakhe rummeesta. Saggaase rumanka jiro ikhaba.”[1]

¹⁸Waakh goobiis on ka, saggi us ꞌdooꞌdi jiroticho ka usu ꞌdiiꞌdo toro uskeel yeelo ikahollowo a tusa. Uskeela ka la, ꞌdooꞌda runti Waakhe laabti iche ꞌdooꞌdi addan kajeycha.

¹⁹Runta Waakh miinsane enenyet garti la a ti nyiikhsan on. Waakh rubeytiissa isoonyiikhe.

²⁰A mehe uuꞌ goorat harra lasoouume, weeli enenyet saggi miigti Waakh jirtuu tuumman ijirto ichoow saggi us rumanka Waakh iyahe, a abte. Wahanyeyyoha Waakh leeyahe ma laargo, iꞌdaasenyi wihi Waakh soouume tuumman ka a lagarta. Jeentetaas u, wohoo rucchule icho laabaan ma khabaan.

²¹Icho eti Waakh yahe a abteene, eheetteey laka inkaanyiti kootte Waakh imale ma siinne, toro la kalaꞌd laka ma ilaabin. Wihi ꞌdalam on kamasseene, toro la uurassicho mugꞌdi weele.

²²Icho rubeycho khara iskaayyeeleene, eheetteey laka ꞌdalammeti tuunte eheet.

²³Ichohi kootte weynaanti Waakkhi jirtuu iumaatan wahtaan ka, iyookkoyyohi enenyeti yamuut ommos chimbiro ommos binahi sohti ommos binahi uur il kajiito wahteen.

²⁴Maantaka Waakh icho a ꞌdiiche, ebba uskeeli uuriis imoono yeele. Jeentetaas u biꞌdirroonki nool sarticho ka a isyeeleen.

²⁵Icho runti Waakh miinsan ma rummeysanne, dib on u ayti beenaat rummeesteen. Waakkhi walah tuumman soouume kootte jirtuu tuumman saaꞌdo imaleen rubeytiis ma wahanne toro la ma inkaanyitine, wahanyeyyohi Waakh soouume inokhteene, Waakh kayeesseen.

²⁶Jeentetane Waakh iꞌdiiche, ildeerroti sareete lakhaanyeyyo keento icho ꞌdoonaan ikaassohtaan. Deyyeho laka mejeli laleeurꞌdo a kasoonokhatte, iche on isinokhatta.

²⁷Saggaas on u mejel laka deyyehoti laleeurꞌdo kasootabe, ildeerroti mejel laleeurꞌdo buuhisse. Mejel on lakhaanyeyyohi nool isyeela. Jeenteti suujoonki icho yeeleen u, sinati imasse isikeeneen.

²⁸Toro la jeenteti icho Waakh garan iꞌdiiꞌdeen u, Waakh icho a ꞌdiiche, uskeeli nool kamassaan. Suujoonki nool on kamassaane, jeentetaas u wihi kootte ikamaline yeelaan.

²⁹Wihi jiroticho buuhiche a khollookkhi nool ichoow suujoon ichoow ꞌdamaam ichoow uskeel. Wihi addane icho buuhicho a kalꞌdarri ichoow ogoossi dubunuunu lagelo ichoow isjihit ichoow ekkeysi ichoow rubeyti suuje ichoow meꞌdeꞌddeel.

³⁰ꞌDooꞌda enenyete hanta toro la Waakh ꞌdiiꞌddayyahiine, enenyet leeabaarrama, enenyet a rannyaane toro isatahnoochaan. Kol tuumman la jiti icho suujoon kayeelaan on mal kadowtaane, toro la ꞌdooꞌdi dele ma daagaan.

³¹ꞌDooꞌda khara us khabo mele, wihi icho ayyicheen ma buuhichaane, ꞌdooꞌdi addan ꞌdooninti imasse ma ikhabaane, uurnugleel la ma khabaan.

³²Icho wihi fissane Waakh enenyet kaꞌdoono us ꞌdooꞌdi jiroti iꞌdee jiro omoot ikagoocho a gartaan. Eheetteey laka, icho orey on isohtaane, uskeel yeelaane, toro la ꞌdooꞌdi addane wihi iꞌdaase yeelo laka leekhabtaan.