Read rendile Rooma 10 Bible Online

Rooma 10 - rendile bible

Rooma 10

¹ꞌDooꞌd Kiriistokaaw, wihi uur weyti iꞌdoono toro la an Waakh daaho, a ꞌdooꞌdi Issiraayele laribo.

²Ani rubeyteey saggi icho rumanka weyti Waakh ikafalin iꞌdoonaan a cheeka. Iꞌdaasenyi raahnaanki icho Waakh raahin ꞌdoonaan ka, jiti runti Waakh lakaabti ma raahaan.

³Icho jiti Waakh enenyet ꞌdooꞌdi fiffissan iekkaacho ma aban. Icho awtichooda on u jiti icho ꞌdooꞌdi fiffissan iskayeelaan yowtaan. Icho jiti Waakh enenyet ꞌdooꞌdi fiffissan iekkaacho raahin a ꞌdiiꞌdeen.

⁴Kiriisto jiti amurre Muusa laraaho ꞌdee enenyet ꞌdooꞌdi fiffissan lakayeelo a massiche, ꞌdee eti tuummane Kiriisto rummeeste, Waakh eti fissan iekkaacha.

⁵Wihi Muusa yidahye jita amurreta laraaho ꞌdee enenyet ꞌdooꞌdi fiffissan liiekkaacho miinsan a waha, “Eti tuummane wihi amurre cheekto tuum raaho, amurretaas us raaho ka, jiro ꞌhela.”[29]

⁶Iꞌdaasenyi jiti Waakh lakakhuufo toro la Waakh enenyet eti fissan iekkaacho ka, “Uur ka iꞌda ma leessi, ‘Ayyo serey irta ichoowka goobi Waakh goya gela?’ ” ꞌDee iꞌdaakka Kiriisto iche harrata lakeena.

⁷Toro la, “Iꞌda ma leessi, ‘Ayyo ankhari dahane ieleelin iyaga?’ ” ꞌDee iꞌdaakka Kiriisto iche omoot kasookahcha.

⁸Kamalda bal, Chiirnaanneti Waakh mehe tadeeh? “Farniinki Waakh weyti atin idowyahe, furuurohiinna fuula, uurassiin goya la kajira.” Wahaas la a farniinki kakhuufnaanki Waakh lakakhuufo miinsane, nah enenyet icheekno.[30]

⁹Farniinka la a mehe ya, chirri at afaah ka, “Yeesso usu Kamure,” cheekto, uuraah ka la saggi Waakh Yeesso omoot ka isookahche rummeysatte, Waakh a kiriba.

¹⁰Iꞌdi tahe uuraahha Yeesso karummeysatta, wahaas la mehe delaan ya, Waakkhi eti fissan kiekkaacho. Toro la chaꞌat ꞌdow ka saggi at Yeesso rummeysatti cheekto, waha mehe delaan ya, Waakkhi kiribo.

¹¹Iꞌdi Chiirnaanneti Waakh lakachiiruu, “Eti tuummane usu kakhuufo, lakhaanyo ma lakadowo.”[31]

¹²Waha mehe tusaan ya, eti Yaꞌhuude ichoow eti Yaꞌhuud ieheynan seley ma gaan. Kamur a Kamuri enenyet tuummane, ulla eti tuummane usu wahe, weyti imaala.

¹³A mehe iꞌdi Chiirnaanneti Waakh liikachiiruu “Eti tuummane magahi Kamur waho, Waakh a riba.”[32]

¹⁴Iꞌdaasenyi, saggoh Kamuri icho irummeysan iwahaan? Toro la chirri icho woriis idaagin, saggoh Kamura irummeestaan? Toro la saggoh wora idaagaan chirri etoo wora ikacheekin?

¹⁵ꞌDooꞌdi wora cheeko la saggoh woraas ꞌdooꞌd ieleelicha chirri liiergin? Iꞌdi liichiiruu, “Luhti Wori Haaggan keento, weyti lagantahe!”[33]

¹⁶Iꞌdaasenyi ꞌdooꞌd tuumman mee Wori Haaggan raahe. Iꞌdi Isaaya rubeytiis chiiruu, “Kamur, ayyo woreenyo rummeeste?”[34]

¹⁷Maantaka kakhuufnaanki Waakh lakakhuufo Wora Haaggane ladaago kayamiit. Wora Haaggan la chirri wori Kiriisto miinsan lacheeko iche ladaaga.

¹⁸Iꞌdaasenyi wihi an worsadi a mehe ya, ꞌdooꞌdi Issiraayel wora ma daagin a? Aa! Rumanka a daageen. Iꞌdi Chiirnaanneti Waakh liikachiiruu, “Hooyassicho harra tuumman a kataaꞌheene, yeedi icho yeyyeedeen harra ginꞌdohiche tuumman a eleele.”[35]

¹⁹Toro la wihi an worsadi, ꞌdooꞌdi Issiraayel wora ma aban a? Aa! A abteen. Kolooraat Muusa wihi us soolaabe yaafohi Issiraayel miinsan a mehe ya, “An inaafi atin ꞌdooꞌdoo yaafti rummaat laka ieheynan kiinaaftaan iche goytiin gessa, yaafti ꞌdalammee ka a atin holloocha.”[36]

²⁰Yomboka Yeedi Waakhe Isaaya roorro laan cheeke kalla, “ꞌDooꞌdi ani iꞌhele a ki ꞌhor ani iyowan. ꞌDooꞌdi an istuse la, a ki ꞌhor ani iwahin.”[37]

²¹Iꞌdaasenyi wihi ꞌdooꞌdi Issiraayel miinsane Waakh yidah a waha, “An maalinki noole goya ween ꞌdooꞌdi yeedeey iraahine, ani itirrimo iche dahanoheey iooge.”[38]