Read rendile Rooma 11 Bible Online

Rooma 11 - rendile bible

Rooma 11

¹ꞌDeerka wihi an worsadi, Waakh ꞌdooꞌdiis a ꞌdiiꞌde? Mele, iꞌdaaru laka ma ꞌdiiꞌdin! Ani rubeyteey a ꞌdooꞌdi Issiraayele, hiiy Aburaahame kiimiyye, a yaaf Beenjameen.

²Waakh rumanka sag us ꞌdooꞌdiiski goorat usu on uumaccho ka garte iꞌdiiꞌde mele gon. Atin laka rumanka Chiirnaanneti Waakh goyaka maanti eti Waákh íyeyyeedo Eliiya layadeeh Waakh hawwaaste us yaafohi Issiraayel wihi ittaawe kacheekte a garattaan. Eliiya wihi us yidah a mehe ya,

³“Kamur icho ꞌdooꞌdaahki kiyeyyeedo a bakkicheene, chalagtaahti hoola lakasoorriyoocho laka jejjebcheen. Ani kalday on sooꞌhade, toro ani laka ogoose iꞌdoonaan.”[39]

⁴Kamalda bal, wihi Waakh Eliiya isoolaabe a mehe? “An mejeli alif teebeenye Baali waakkhi beenaate iwahan, iche isisooꞌhaache.”[40]

⁵Toolla laka a iꞌdaas one, Waakh haaggiiski buurenye inno imunneynan ka, ꞌdooꞌdoo rucchule soobahsate, isisooꞌhaache.

⁶ꞌDooꞌda Waakh soobahsate jeenteti icho wohoo haaggan iyeeleen menye, a jeenteti haaggi Waakhe buure on. A mehe chirri Waakh wihi enenyet yeele yeyo, kootte ꞌdeerka iꞌdaakka haaggaas kola haaggi Waakhe buure mee gon.

⁷Mehe ꞌdeerka nidaahe? ꞌDooꞌdi Issiraayel wihi us weyti yowte ma ꞌheline, iꞌdaasenyi ꞌdooꞌdi Waakh soobahsate iche waha ꞌhele. ꞌDooꞌdi addane Waakh ikakhuufin Waakh matahenyeticho a dagahnooche.

⁸Iꞌdi liichiiruu, “Waakh matahenyeticho saggoo icho ikamalanne iyeele, indohicho saggoo icho walah ikaargin iyeele, dogohicho la saggoo icho walah ikadaagin iyeele, ichoowka maanta laka waha a iꞌda on.”[41]

⁹Karnati Dawuud layadeeh wihi us yidah, “Waakh ba ꞌdooꞌda gololi us yaham ka angey gessa, khabta. Genney dagah halgo gela, sinati imasse taham.

¹⁰Genney indohicho ꞌduuꞌdamaane, icho il argiwwaayaan. Toro la genney huleesicho dabarreticho jirtuu jebcha.”[42]

¹¹Toro wihi an worsadi, ꞌdooꞌdi Issiraayel goorat a tarraantarrate ichoowka sookahin agaafte? Mele! Iꞌdaaru laka iꞌdaas mee. Jeenteti ꞌdooꞌdi Issiraayel Waakh idaagiwwaaye, iche Waakh ꞌdooꞌdi yaafohi Yaꞌhuud ieheynan iribe, ꞌdee ꞌdooꞌdi Issiraayel inaafi us ꞌdooꞌdi yaafohi Yaꞌhuud ieheynan us kiinaafo gesse.

¹²Iꞌdaasenyi jeenteti ꞌdooꞌdi Issiraayel Waakh idaagiwwaayuu ꞌdooꞌdi harra tuumman buuhi buure a ꞌhele. Toro la jeenteti icho buuhi Waakh iwaayeen u, ꞌdooꞌdi yaafohi Yaꞌhuud ieheynan kamurroonki rubeyeet a ꞌhele. ꞌDeerka maanti tiri ꞌdooꞌdi Issiraayel labuuhiche kamurroonkicho buuhoo geeddohenye keena!

¹³An atinhi yaafohi Yaꞌhuud ieheynane atin leeyyeeda. An a ergaanoti yaafohi Yaꞌhuud ieheynane, toro la hila wohoo weyti khummane iekkaacha.

¹⁴An iꞌdane yeela a mehe anihi ꞌdooꞌdeey inaaf gesso khajjeela, ꞌdee saggoo an gaasichokoo iribo ꞌhola.

¹⁵Iꞌdi tahe maanti Waakh ꞌdooꞌdi Issiraayel ꞌdiiꞌde, iche ꞌdooꞌdi addane harrata ankiis keene. A haaggoo geeddohe maanti Waakh ꞌdooꞌdi Issiraayel khaatti? A iꞌdoo ꞌdooꞌdi goorat tuume omoot kasookaho!

¹⁶Chirri goonanki oraate makaate Waakh liibahche munya yahe, makaatetaas tuumman a munya gon. Toro la chirri hiiyyassi geey munya yahiin, liikhimohi geeyaas a munya gon.

¹⁷A iꞌdi liikhimohoo geeyi oolife gos goyaka bahe geeyaas lakasoojebche. Atinhi ꞌdooꞌdi ilassi addane iꞌdi liikhimohi geeyohi oolife yibaat u, a atin lasookhaate geeyi gos goya kabahe atin lakakabe. Maantaka atin laka subakki hiiyyassi geeyaas oolif kayamiit a ꞌhessaan. Geeyaas oolif la a iꞌdi ꞌdooꞌdi Issiraayel.[43]

¹⁸Toollaka atinhi liikhimohi geeyi oolife yibaate, ꞌdooꞌdi liikhimohi Waakh jebchee, sarcho iisgeenna. Chirri atin sarcho isgeessaan waha abda, atin alah hiiyyay menye a liikhimo on. A mehe hiiyyaye liikhimo goollicha.

¹⁹Iꞌdaasenyi, ꞌdeerka mehe tadeehiin ya, “Liikhimohaas goorat a lajebche, ꞌdee ani meel liiyeele.”

²⁰A eysiisseen! Iꞌdaasenyi icho jeenteti liijebche, a jeenteti icho Waakh ikakhuufin. Atin la jeenteti atin geey ikakabantahiin, a jeenteti atin Waakh ikakhuufteen. Maantaka, taba giꞌde rannyaat akhabina, Waakh karoora.

²¹A mehe Waakh chirri goorat liikhimohi ꞌhor geey kijire iꞌdiin, atin laka ma atin ꞌdiicho gon.

²²Mujjum saggi Waakh uur iꞌdabakhyahe us uskeel ikagarrahsan isiyeya. Waakh ꞌdooꞌdi uskeel kaassohti a hukkuma, sina igoocha. Atin la uuri ꞌdabakhenye atin tusa, chirri atin saggi us iꞌdoono isohattaan. Koli addan la, atin laka Waakh a atin jebcha, atin roga.

²³ꞌDooꞌdi Issiraayel la chuꞌus uskeeliiski us Waakh ikakhuufin sooꞌdiiche, Waakh icho laka a inokhta, geey kakaba. Iꞌdi tahe Waakh geeyi us toro atin kakabo a yabuuꞌd.

²⁴Atinhi ꞌdooꞌdi ilassi addane a iꞌdi liikhimohi geeyi oolife yibaat lakasoojebche, geeyi oolife gos goyaka il lagesse, lakakabe. Waha la a wihi ꞌhoolenye wihi layeelo mee. Iꞌdaasenyi ꞌdooꞌdi Issiraayel a iꞌdi geeya oolife gos goyaka il lagesse. Geeddoo meheenye ꞌdabakhtahe, chiꞌ liikhinti geeyaas geeyi leh on lakakabo.

²⁵ꞌDooꞌd Kiriistokaaw, runtoo dagsane an atinhi abattaan ꞌdoono iche jirta, uus ꞌdee atin wihi atin tahiin ka weyti serey isgeenne. Waha la iꞌdicho a iꞌda, ꞌdooꞌdoo Issiraayel matahenyeticho a lamiigooche, iꞌdaasenyi ꞌdee maanti ꞌdooꞌdi yaafohi Yaꞌhuud ieheynan tiricho buuhsame, matahmiigtichotaas a massatta on.

²⁶Waakh ꞌdeerka ꞌdooꞌdi Issiraayel tuumman a riba, iꞌdi liichiiruu, “ꞌDoorribe Saayone kasoobaha. Ulla nyaakhuti hiiy Yaakoobo kayimiy uskeelicho tuumman a kasoolaaba.

²⁷Waha la a ayyinteeyti an icho igooche, maanti an uskeelicho tuumman kabahcho.”[44]

²⁸Jeenteti ꞌdooꞌdi Issiraayel Wori Haaggan iꞌdiiꞌduu, icho a chiiyti Waakh. Wahaas la atinhi ꞌdooꞌdi ilassi addan a atin irooyyahiin. Iꞌdaasenyi jeenteti Waakh ꞌdooꞌdi Issiraayel isoobahsatuu, Waakh weyti icho ꞌdoona. Waha la a jeenteti ayyinti us aacchinyeticho iayyiche.

²⁹Iꞌdi tahe Waakh ꞌdooꞌdi us siintiis iꞌdaanu siicho ichoow ꞌdooꞌdi us waho ka maliis ma urgiyicho.

³⁰Atinhi ꞌdooꞌdi ilassi addan goorat Waakh raahin a ꞌdiiꞌddeen. Toolla la ꞌdooꞌdi Issiraayel Waakh a raahiwwaaye gone, Waakh uur a atin isoonugleeste.

³¹Saggaas on u, ꞌdooꞌdi Issiraayel toolla Waakh raahin a ꞌdiiꞌda. Waakh uur a atin isoonugleeste gone, icho laka uur a inugleesta.

³²Maantaka Waakh weeli enenyet tuumman ꞌdooꞌdi lahide usu raahin ꞌdiiꞌde kayeele. Ulla iꞌdane yeela, ꞌdee icho tuumman uur inugleesta.

³³ꞌHay! Wihi Waakh garti ichoow kharati Waakh a too geeddohe? Enenna a buure! Ayyo maanta wihi Waakh gooche ꞌdubicho bahcha? Ebba! Toro la ayyo jitiis garta? Ebba!

³⁴“Ayyo mali Kamur garta? Ommos ayyo Waákh waanicha?”[45]

³⁵“Ayyo injire Waakh wohoo siiche, ꞌdee Waakkhi isooguto suga?”[46]

³⁶A mehe Waakh a uumacchoti walah tuummane, usu on ka walah tuumman lasoouume toro la walah tuumman usu liisoouume. Jirtuu tuumman usu a lakoolicho. Aamiin.