Read rendile Rooma 12 Bible Online

Rooma 12 - rendile bible

Rooma 12

¹Maantaka ꞌdooꞌd Kiriistokaaw, jeenteti uurnugleeli Waakh u, a atin hawwaasda, taba sartiin Waakh ibahcha, iꞌdi soorriyoti jirto toro la munyee u. Soorriyotaas la a ti Waakh kahamaadisso. Waha la a saggi imasse atin Waakh iwahattaan.

²Taba giꞌde, jiroti ꞌdooꞌdi wahanyeyyohi harratane sussuuje raaho ajirina. Rubeyti Waakh mali atin malattaan tuum a husubnaasso. Iꞌdaas ka wihi Waakh atin igooche a fiirissaane toro khaatattaan. Waha la a wihi haaggan ichoow wihi Waakh kahamaado toro la a tuum.

³A mehe haaggi Waakhe buurenye liisiiche ka, an etiimba waansihane siicha. Taba etiimba uus weyti serey isgeen iꞌdoo us khummanyahuu. Iꞌdaasenyi ebba mujjum a isfiiricho geeddi kakhuufnaanki Waakh usu siiche ka.

⁴Saggi sarteen miilassi ittaawe ikhabto, miil ba la hiliis yeer iyahuu,

⁵saggaas on u innohi ittaawe laka, jeenteti inno ichoow Kiriisto ba wohoo kalday inahuu, a iꞌdi sartoo kaldaye miilassi ittaawenye iskaattoollo khabto.

⁶Waakh haaggiiski buure ka, eteemba siimohi yeerenye siiche. Maantaka, chirri siinti Waakh kisiiche ti Waakh liiyeyyeedo tahe, taba giꞌde, ebba kakhuufnaanki Waakh siiche ka, Waakh mujjum a iyeyyeedo giꞌde.

⁷Chirri siinti Waakh kisiiche ti enenyet liihilo tahe, enenyet ihil giꞌde. Chirri siintaah ti enenyet walah laabcho tahe, enenyet mujjum wihi rummaat abi giꞌde.

⁸Chirri siintaah ti enenyet uur lamiigoocho tahe, tab enenyet uur miigooy. Chirri siintaah ti enenyet walah lasiicho tahe, tab uuri haaggan ka enenyet walah sii. Chirri siintaah ti enenyet lawoyo tahe, tab enenyet mujjum woy. Chirri siintaah ti enenyet uur liinugleesti tahe, tab hamaad ka enenyet uur inugleyso.

⁹ꞌDooninti atin enenyet ikhabtaan ti rummaat a eheetti. Wihi suuje tuumman ꞌdiiꞌda, haag on jurkhicha.

¹⁰Iꞌdi ꞌdooꞌdi uuroo kaldaye u, isꞌdoona, ꞌdooꞌdi addan kol tuumman ꞌdirihiin inkaanyita.

¹¹Hiliin ka ꞌdooꞌdi seyꞌhooti iitaahana. Rubeyohiin ka hili Kamur tuum gela.

¹²Jeenteti atin khajjeel ikhabtaan u, hamaada. Sinati atin loomhicho ka garrahsada, kol dakkhan la Waakh wahda.

¹³Wihi atin khabtaan ꞌdooꞌdi Waakhe gargaar ꞌdoono leegisma, toro la artohiin faha, marti urmohiin a soogesso.

¹⁴Eti sina atin omhicho afalina iweesda on.

¹⁵ꞌDooꞌdi hamaado leehamaada, ki ooyo la leeooya.

¹⁶Maloo kalday khaba. Eeylajina, ꞌdooꞌdi miskiine fiddihi haaggan ikhaba. Weyti serey iisgeenna.

¹⁷Etoo kalday laka suujoon suujoon akagutanna. Wihi enenyet tuumman ortiis ka haaggan on yeela.

¹⁸Chiꞌiche tateeh, geeddi atin tabuuꞌdiin tuumman, hol dowa, ꞌdooꞌdi addan nebey kaleefiddiya.

¹⁹Aalassaay koloo kalday laka aál agutanna, holi Waakhe buure aassiin a gutti. A mehe wihi chiiran, “Aale a taaya, ani baha,” iche Kamur essa.[47]

²⁰Atinhi iꞌdaas yeessaan ka atinhi iꞌda yeessaane deefta, “Chirri chiiytankaah raarah khabo, golol sii. Chirri us sugub khabo, sugub bihi. Iꞌda ka jilahti lakhaanyo matahenyeticho kichibta.”[48]

²¹Taba giꞌde, suujoon uus atin kahataatine, haag yeela, ꞌdee suujoon sooricha.