Read rendile Rooma 3 Bible Online

Rooma 3 - rendile bible

Rooma 3

¹Kamalda bal, yaafohi Yaꞌhuude Waakh soobahsate ꞌdeerka yaafohi Yaꞌhuud ieheynan saggoo a ikadeefaan? Toro la khandihaas Yaꞌhuud indigirtoo khabaayi?

²Rumanka Yaꞌhuudhi layahe indigirti buurenye khaba. Kolooraat wori Waakh yaafohi Yaꞌhuude dahan lagesse.

³Rumanka gaasichokoo Waakh ma kakhuufin. Jeenteti icho Waakh ikakhuufin u Waakh koloo kalday laka ayyintiis ma jebcho.

⁴Iꞌdaas mee! Chirri weeli enenyet tuumman been goocho laka, Waakh rume leeyahe. Iꞌdi liichiiruu, “ꞌDee atihi Waakhe saggi at rum on ikaayyeeddo laarga, toro la saggi at ꞌdooꞌdi wohoo kaacheekti isoorisso laarga.”[3]

⁵Iꞌdaasenyi chirri inno ꞌdooꞌdi khokkhollokkhan nahe waha la saggi Waakh tuum ifissanyahe ꞌdooꞌd rumanka tusaan, mehe nidaaheey? Waakh chuꞌus holiis inno tuso, a khollokkhayyahe nadeeh? Waha abda, an saggi ꞌdooꞌd gaasoo iyeyyeedo iche iyeyyeeda.

⁶Iꞌdaas mee! Waakh chuꞌus wihi fissan iraahin, sag us weeli enenyete harrata ihukkumo mele gon.

⁷Etoo kolossoo a geeddi us iꞌda yadeeh, “Chirri beenteey runti Waakh enenyet mujjum tusso ꞌdee koolohi Waakh buuraataan, Waakh a iꞌdoh ani uliba eti uskeel leh ikagoocha?”

⁸Chirri atin mali iꞌdaase raahtaan, a geeddi atin iꞌdi ꞌdooꞌdoo iabaaruu iꞌda tadeehiin on, “Alleya suujoon a yeello ꞌdee haag a yimaate!” ꞌDooꞌdi wihi iꞌdee essi, wihi imale a hukkunki lahukkumo, sina liigoocho.

⁹Maantaka nahi Yaꞌhuude mehe goonna? Innohi yaafohi Yaꞌhuud yaafohi Yaꞌhuud ieheynan a kadeefna? Iꞌdaaru laka ma kadeefno! Saggi an atin ituse u, weeli enenyet tuumman Yaꞌhuud ichoow ki Yaꞌhuud ieheynan ba, uskeele sam dese, woya.

¹⁰Iꞌdi liichiiruu, “Eti fissan ma jiro, koo kalday laka ma jiro.

¹¹Etoo kaldache kharee ma jiro, etoo kaldaye Waákh yowti ma jiro.

¹²Weeli enenyet tuumman Waakh adah a kakhabte, usu tuumman la hili Waakh ka, tir a kabahe, etoo kaldaye haag yeelo ma jiro. Koo kalday laka ma jiro.”[4]

¹³“Yeedi aficho kasoobaho omoote keena, harrabbeticho la yeedi beenaat on yeyyeedda.”[5] “Ayti furuurohicho leetamiit a iꞌdi hadaadohi toof.”[6]

¹⁴“Yeedicho tuumman falo ichoow bolokh on buuha.”[7]

¹⁵“Icho la diiggi icho khubaan a iꞌharꞌharaan.

¹⁶Meelbaaw icho irtaan ka walah on baabulaane, toro oytim keenaan.

¹⁷Icho la jiti nebey lakaꞌhelo ma gartaan.”[8]

¹⁸“Waakh ma karooraane, ommos ma inkaanyitaan.”[9]

¹⁹Toollaka wihi inno garanni a mehe ya, wihi amurre Muusa goya kachiiran tuumman ꞌdooꞌdi amurretaas anatti iche leeyyeedda. Waakh la iꞌdane yeela, ꞌdee enenyet tuumman wihi us laabti waaya toro la enenyet tuumman hukkuma, sina igoocha.

²⁰Maantaka etoo kaldaye jeenteti us hili amurretaas ꞌdoonto iyeeluu Waakh ortiis ka eti fissan liiekkaacho ma jiro. Amurretaas ka saggi inno uskeel iyeelle on abanna.

²¹Toollaka Waakh jiti us ꞌdooꞌdi fiffissan inno iekkaacho a soobabbakkaahiche. Jita la ki amurre laraaho menye, a jiti goorat archiiy Chiirnaanneti amurre Muusa ichoow ti ꞌdooꞌdi Waákh íyeyyeedo cheekte.

²²Waakh kakhuufnaanki enenyet Yeesso Kiriisto kakhuufo ka iche enenyet eti ortiis ka fissan iekkaacha. Waha la eti tuummane Yeesso Kiriisto rummeesti ka a rum. Waakh enenyet seley ma sassaaho,

²³iꞌdi tahe weeli enenyet tuumman uskeel a yeele, weynaanti Waakh kadeeraate.

²⁴Iꞌdaasenyi Waakh jeenteti haaggiiski buurenye inno imunneynan u enenyet iꞌdaanu ꞌdooꞌdi ortiis ka fiffissan iekkaacha. Jiti us iꞌda kayeele la a ki us Yeesso Kiriisto ka inno gatte.

²⁵Waakh Yeesso enenyet ortiis ka soorriyo kayeele, ꞌdee diig Kiriisto ka holiiski us inno ikhabe laaba. Chirri etoo saggi Yeesso soorriyoti Waakh iyahe kakhuufe, uskeeliis a liikakuta. Waakh la Yeesso soorriyo kayeele, saggi us iffissanyahe tusa. Waakh la iꞌdane yeele a mehe us a samacchaare, ꞌdooꞌdi orey uskeel yeele sirbi ma gelin.

²⁶Toro la Waakh iꞌdane yeele saggi us weyꞌda laka ifissanyahe tusa. Iꞌdaas ka us a fissanyahe toro la eti tuummane Yeesso kakhuufe eti fissane iekkaacha.

²⁷Kamalda bal, wihi inno keeylajno a khabna? Mele, wohoo rucchule inno keeylajno ma khabno! Jeenteti inno amurretoo iraahnuu eylajin a nabuuꞌd? Mele, a jeenteti inno Yeesso ikakhuufno on.

²⁸A mehe chirri inno amurre Muusa raahno menye, chirri inno Yeesso kakhuufno kaldach on Waakh ꞌdooꞌdi fiffissan inno iekkaacha.

²⁹Waakh a Waakkhi yaafohi Yaꞌhuud kaldach on a? Us Waakkhi yaafohi Yaꞌhuud ieheynan laka menya? Aa, a iꞌdaas on,

³⁰iꞌdi tahe Waakh a koo kaldach one, jiti us weeli enenyet tuumman ꞌdooꞌdi fiffissan iekkaacho la a koo kaldach on. Waha la a chirri enenyet Kiriisto kakhuufo on, yaafohi Yaꞌhuude khandiiti eheetteey ichoow yaafohi Yaꞌhuud ieheynane ikhandiyan eheetteey ka ba.

³¹Maantaka chiꞌinno kakhuufnaanki Waakh lakakhuufo on khumummaanno, amurre Muusa ꞌdol nassil? Mele, iꞌdaas mee! Rumanka chiꞌinno Waakh kakhuufno kaldache amurretaas laka miigoonna.