Read rendile Rooma 9 Bible Online

Rooma 9 - rendile bible

Rooma 9

¹Ani ichoow Kiriisto ba rum on cheekna, ani been ma goocho. Toro la rubeyteeyti haag ichoow suujoon seley saahto ichoow Rubeyti Munyee a israahaan.

²Runtaas la a mehe ya, uureey ka oytinti buure ichoow bolokkhi uskule khaba

³jeenteti ꞌdooꞌdeey u. Chirri kootte iche tateehe an yaafteey indigirtoo igelo, incheenka Waakh a ifala, ꞌdee ani ichoow Kiriisto ba seley bahna.

⁴Icho a ꞌdooꞌdi ili Issiraayele, Waakh icho a khaatte, nyaakhutiiski iꞌdi teyyanohiise kayeesse. Toro la weynaantiis goycho ka tuse, ayyinti ittaawenye us igooche ichoow amurre Muusa ba ꞌheleene, jiti Waakh minki Waakhe buure ka lakawahti ꞌheleene, wihi ittaawenye ꞌdee yateehe Waakh gooche laka ꞌheleen.

⁵Icho la aacchinyetichoti lagarti Aburaaham ichoow Isakh ichoow Yaakoobo illehe a khabaan. Kiriisto anki weeli enenyet ka, hiiyyaase kayimiy. Ulla a Waakkhi walah tuumman anti, koolo a ꞌhelo jirtuu tuummamba! Aamiin.

⁶Waha iꞌdoo Yeedi Waakh kufe mee. A mehe ꞌdooꞌdi Yaakoobohi Waakh Issiraayel yidah hiiyyiis kayimiy tuumman mee rumanka Issiraayelenye ꞌdooꞌdi Waakhe.

⁷Ommos nyaakhuti hiiy Aburaaham kayimiy tuumman mee rumanka nyaakhuti Waakhe. Waakh wihi us Aburaaham iyidah, “Nyaakhut nyaakhutaah Isakhe lakawaha.” [17]

⁸Waha la wihi icho yihiin a waha, nyaakhuti Aburaaham uume tuumman mee rumanka nyaakhuti Waakhe, nyaakhuti ayyinti Waakh gooche kadesse on nyaakhut Aburaaham liiekkaacha.

⁹A mehe ayyinti Waakh Aburaaham igooche ka wihi us yidah, “ꞌDee maanti ibeenki lasoobahsate yitah toro a soonokhda, Saara la geeddaakka inankoo a ꞌhesse.” [18]

¹⁰Inanka aacchiheenki Isakh layadeehe eheet. Usu Rebeekka diste, iche la inam lamma manꞌdaanee desse.

¹¹Iꞌdaasenyi Waakh geeddi manꞌdaanoha idelanne icho wohoo haaggan ommos suujoonkoo laka iyeelin, iche saggi us ꞌdooꞌd iwaho ꞌdee wihi us gooche isooꞌhadaan tuse.

¹²Wihi Waakh gooche la jeenteti holi enenyet dowo menye, a jeenteti Waakh rubeytiis enenyet iwaho. Wihi us Rebeekka iyidah, “Inanki ween inanki nugule ifala.”[19]

¹³Iꞌdi liichiiruu, “An Yaakoobo a ꞌdoone, iꞌdaasenyi Essaawo a ꞌdiiꞌde.” [20]

¹⁴Mehe ꞌdeerka nidaahe? Waakh wihi us ꞌdooꞌdi yeerare igoocho ka a khollokkhanyahe? Iꞌdaaru laka iꞌdaas mee!

¹⁵A mehe Waakh wihi us Muusa iyidah, “Ani on eti an uur inugleesdi uur inugleesda, toro la ani on eti an isoonaho isoonaha.” [21]

¹⁶Maantaka chirri Waakh etoo uur isoonugleesti wahaas saggi etaas iꞌdoono ommos saggi etaas hol idowo ma iyateehiine, jeenteti Waakh etaas ikasoonaho on iyateehiin.

¹⁷Iꞌdi tahe iꞌdi Chiirnaanneti Waakh karnati Miissiri Faraawo layadeeh itadeeh u, “Wihi an kiweynaache, a jeenteti wihi an ati ichoow ilaah iyeelo ka miigteey liiargo, toro la magaheey harra tuumman ka liiabti.”[22]

¹⁸Maantaka Waakh usu on eti us uur inugleysan ꞌdoono uur inugleesta, eti us matakkiis miigoon ꞌdoono la matakkiis miigoocha.

¹⁹Etiinkoo kolossoo mehe iworsata ya, “A iꞌdoh ꞌdeerka Waakh weeli enenyet uskeeli us yeelo ikacheekta? A mehe ayyo injire mali Waakh tirrime?”

²⁰Etaaw, atiha Waakh yeed ilaabto, at ayyo iskoogtahe? ꞌDirihi doobbo eti yeele, “At a iꞌdoh sagga ikayeesse?” [23] ma worsati gon.

²¹Iꞌdaasenyi eti ꞌdiryohi doobbo yeelo, antohi us doobbotaas kalday ꞌdirihoo daaweet kahaaggicho koo la ki hili ballaaddan kahaaggicho ma khabo?

²²Saggaas on u, chiꞌ Waakh enenyet holiis ichoow miigtiis tusin ꞌdoone laka, wihi us gooche, us ꞌdooꞌdi kootte baabiin liigooche weyti a isamacchaara on.

²³Ulla toro samacchaare eheete, ꞌdee kamurroonki weynaantiis ꞌdooꞌdi us uur isoonugleesti us orey on tannabiche ꞌdee weynaantiis ꞌhelo tuse.

²⁴Inno laka ꞌdooꞌdi Waakh wahe goya a kijirra, ki Yaꞌhuude kalday on menye, iꞌdaasenyi ꞌdooꞌdi yaafohi Yaꞌhuud ieheynan laka.

²⁵Buuggi ꞌHoseeya chiire ka, wihi Waakh ꞌdooꞌdi Yaꞌhuud ieheynan iyidah kallaayo, “An ꞌdooꞌdi keey ieheynan iche, ‘ꞌDooꞌdaaya,’ adeeh. ꞌDooꞌdi goorat ꞌhor an iꞌdoonin iche, ‘Chinnitaaya,’ ” adeeh.[24]

²⁶Toro, “Wihi yateeh, inti Waakh, ‘Atin ꞌdooꞌdeey mee,’ ikayidah, intaas on ka wihi us icho iyadeeh, ‘Atin a nyaakhuti Waakkhi jiro.’ ”[25]

²⁷Isaayahi Waákh íyeyyeedo wihi nyaakhuti Issiraayel miinsane us kooye a waha, “Chirri nyaakhuti Issiraayel ittaaw ka geeddi yoohti beyti buure afichee yahe laka, Waakh ꞌdooꞌdoo rucchul on goycho ka riba.

²⁸A mehe Kamur ꞌdee koloo kalday on ꞌdooꞌdi harra tuumman hukkuma sina igoocha.” [26]

²⁹A iꞌdi ꞌhor Isaaya icheeke on, “Chirri Kamuri Miig Tuumman Leh nyaakhutoo nah ikasoowaan, nah laka iꞌdi goorat ꞌdooꞌdi ilkerengeetti Soodom ichoow ti Goomorah u, Waakh afe nah kahiyyaayta.”[27]

³⁰ꞌDeerka mehe nidaahe? ꞌDooꞌdi yaafohi Yaꞌhuud ieheynane goorat jiti icho ꞌdooꞌdi fiffissan liiekkaache iyowan, iche toolla Waakh ꞌdooꞌdi fiffissan iekkaacha jeenteti icho Waakh ikakhuufaan u.

³¹Iꞌdaasenyi, ꞌdooꞌdi Issiraayel amurre Muusati laraaho jiti Waakh icho ꞌdooꞌdi fiffissan iekkaacho a yowteene, toro la ma ꞌhelin.

³²Icho a iꞌdoh iꞌhelin? A jeenteti icho kakhuufnaanki icho Waakh kakhuufaan ka iyowanne, icho wihi icho yeeleen ka wahaas iyowteen. Iꞌda ka icho daakki enenyet tarraantarricho kombicheen.

³³Iꞌdi liichiiruu, “Yeya, an ilkerengeetti Saayon goya daakkoo enenyet tarraantarricho gessa, waha la a daddaabtoo enenyet lagaꞌddo. Eti tuummane usu rummeeste la, lakhaanyo ma lakadowo.”[28]