Read rendile 1 Koriinto 14 Bible Online

1 Koriinto 14 - rendile bible

1 Koriinto 14

¹ꞌDooninti ꞌdooꞌdi addan laꞌdoono yowda, toro la siimohi Rubeyti Munyee kayamiit weyti imoona. Kach ka la, siinti Waakh liiyeyyeedo yowda.

²Iꞌdi tahe eti afi Rubeyti Munyee kayamiit kaayyeedo, weeli enenyet mee leeyyeedo, iꞌdaasenyi Waakh rubeytiissa leeyyeeda. Et yeediis daago mele, iꞌdi tahe rubeytiis ka [22] us wihi dagsane kaayyeeda.

³Iꞌdaasenyi eti wori Waakh kaayyeedo enenyete leeyyeeda, ꞌdee enenyet disa, uur miigoocha, toro la uur khoboocha.

⁴Eti afi Rubeyti Munyee kaayyeedo usu on isdisa. Iꞌdaasenyi eti wori Waakh kaayyeedo urur Kiriisto tuummane disa.

⁵An atin tuumman atinhi afassi Rubeyti Munyee kaayyeeddaan a ꞌdoona, iꞌdaasenyi kootte incheenka atinhi wori Waakh kaayyeeddaane weyti ꞌdoona. Iꞌdi tahe eti wori Waakh kaayyeedo ichoow ki afi Rubeyti Munyee kaayyeedo, ki wori Waakh kaayyeedo weyti khumman. Eti afi Rubeyti Munyee kaayyeedo, walah us ꞌdooꞌdi Waakh ibaho mele, sammata us afaas ilaabine, urur Kiriisto tuumman idisin.

⁶Toolla ꞌdooꞌd Kiriistokaaw saggoh atin igargaaro chirri an amiite, an afi Rubeyti Munyee kaayyeedo? Sag ba! Sammata an wihi Waakh isoobabbakkaahiche ommos runti an gardi ommos farniinki eti Waákh íyeyyeedo an atin ikasoochekin, ommos an walah atin iabin, an walah an atin kagargaaro mele gon.

⁷Iꞌdaasu laka chirri reemassi jiro ikhabine toro hooy bahcho iꞌdi ki ꞌhaab layadeeh ichoow indulle ba icho tuumman hooyi icho bahchaan seley liibahin, saggoh geeyi kooba dowo liigarta?

⁸Toro la chirri arabi laafuufo mujjum iyeedin, ayyo tannabta, diho irta?

⁹Atin laka ꞌdeerka a iꞌdaas on. Sammata at harrab ka yeedi ꞌdooꞌdi addan mujjum daago ikaayyeedin, saggoh yeedaah liigarta? A iꞌdoo at hafar leeyyeeddo on.

¹⁰Rumanka afassi ittaawenye yeerarenye harra ka jira, ki fool ikhabin la ma jiro.

¹¹Chirri ꞌdeerka an afoo foolicho ikhabin, an etaas ka a yeelanahe, etaas la ani ka a yeelayyahe.

¹²Waha ꞌdeerka atin laka a atin miinsanyahiin. Atin siimohi Rubeyti Munyee kayamiit weyti yowattaan gone, weyti tirriinsada ꞌdee siinti urur Kiriisto disso yowda.

¹³Maantaka, eti afi Rubeyti Munyee kaayyeedo, Waakh a wahti ꞌdee afaas laabin a yubaaꞌde.

¹⁴Iꞌdi tahe chirri an afi Rubeyti Munyee ka Waakh wahdi, rubeyteey ka a weesda, iꞌdaasenyi maleey indigir us ꞌhelo mele.

¹⁵ꞌDeerka mehe yeelo? Rubeyteey ka Waakh a wahda toro maleey ka laka Waakh a wahda. Rubey ka Waakh a saaꞌda toro maleey ka laka Waakh a saaꞌda.

¹⁶Chaꞌat rubey ka Waakh saaꞌddo, ꞌdooꞌdoo siintaas ikhabin la kileejiro, saggoh, “Aamiin,” iyadeehiin, chirri icho wihi at elatti idaagin?

¹⁷Iꞌdi tahe saggi mujjumenye Waakh kalaꞌd ilaabta, iꞌdaasenyi ꞌdooꞌdaas ma disso gon.

¹⁸An weyti Waakh kalaꞌd ilaaba jeenteti an ꞌdirihiin afassi Rubeyti Munyee ikaayyeeduu.

¹⁹Iꞌdaasenyi urur Kiriisto goya yeedi ittaawenye afi Rubeyti Munyee kayamiite etoo kalday laka idaagin ma kaayyeedo. Yeedoo rucchule enenyet tuumman daago, enenyet walah abcho, iche kaayyeeda.

²⁰ꞌDooꞌd Kiriistokaaw, saggi nyaakhut iimalanna. Iꞌdaasenyi anki uskeeli layeelo ka, iꞌdi nyaakhuti rurrucchul ateeha, mali atin malattaan ka la, ꞌdooꞌdi wewweynaate ateeha.

²¹Amurre wihi kachiiran, “An ꞌdooꞌdeey afassi liigaranne ꞌdooꞌdi yeelan kaayyeedo kaleeyyeeda, toro la harrabbeti ꞌdooꞌdi yeelane kaleeyyeeda, iꞌdaasenyi ꞌdooꞌdeey uliba laka ma idagansati,” [23] iche Kamur essa.

²²ꞌDeerka afassi Rubeyti Munyee ꞌdooꞌdi Kiriisto rummeeste menye, ꞌdooꞌdi Kiriisto irummeysanne walah tusaan. Iꞌdaasenyi farniinki ꞌdooꞌdi Waákh íyeyyeedo ki ꞌdooꞌdi Kiriisto irummeysan menye, a ki ꞌdooꞌdi Kiriisto rummeesti.

²³Maantaka chirri urur Kiriisto tuumman kulme, ꞌdooꞌd tuumman la afassi Rubeyti Munyee kaayyeedo, ꞌdooꞌdi afassaas igaran ommos ꞌdooꞌdoo Kiriisto irummeysan atin isoogele, atin iꞌdaakka sirgo ma iyokkanaattaan a?

²⁴Iꞌdaasenyi chirri atin tuumman wori Waakh kaayyeeddaane etoo Kiriisto irummeysan ommos etoo siintaas ikhabin atin isoogele, atin uskeeli us yeele a tussaane toro saggi us eti uskeel leh iyahe idowdowtaan.

²⁵Wihi uuriis goyaka dagsan a lasoobahcha. Ulla ꞌdeerka Waakh dahan a iooga, Waakh wahta wihi us yadeeh, “Saggi rumanka Waakh atin ileejiro a abde.”

²⁶ꞌDooꞌd Kiriistokaaw ꞌdeerka mehe incheenka yeessaan? Maambaaw atin kulantaan, etoo geeyoo us Waakh idowo khaba, etoo wohoo us enenyet abcho khaba, koo laka wohoo Waakh ibabbakkaahiche khaba, koo laka afi Rubeyti Munyeenye kaayyeeda, koo laka afaase laaba, ꞌdeerka waha tuumman saggoo icho urur Kiriisto imiigoochaan iyeela.

²⁷Urur goyaka et lamma ommos et seyyah kalday on ebba koliis afi Rubeyti Munyee a kaayyeedo, etoo la afaas a laabo.

²⁸Chirri etoo afa laabo ijirin, eti afa kaayyeedo urur Kiriisto goyaka a gammadicho, a isleeyyeedo toro Waakh a leeyyeedo.

²⁹Et lamma ommos et seyyah Waákh a iyeyyeeddo, ꞌdooꞌdi addan la wihi leessi mujjum goya a fiiricho.

³⁰Chirri etoo kulam goya fiddiyo Waakh wohoo isoobabbakkaahiche la, eti oraate yeyyeedo a gammadicho.

³¹A geeddi atin tuumman ebba koliis wori Waakh kaayyeedo, ꞌdee ꞌdooꞌdi addan tuumman wohoo abti, toro icho tuumman uur lamiigoocho.

³²ꞌDooꞌdi Waákh íyeyyeedo rubeyohicho a jeycha.

³³Iꞌdi tahe Waakh Waakkhi hugum ꞌdaran menye, iꞌdaasenyi a Waakkhi nebeyeet. Waha la a wihi ururreti ꞌdooꞌdi Waakh tuumman lakaꞌdoono.

³⁴Deyyeho ururre Kiriisto goyaka a gammadisso iꞌdi tahe ma laꞌdiicho one ma yeyyeeddo. Iꞌdi Chiirnaanneti Amurre tadeeh u,[24] deyyeho iiche weynaan afiche kutin.

³⁵Chirri icho wohoo aban ꞌdoonaan, goobasicho ka makhaaballeticho a worsateen. Iꞌdi tahe a lakhaanyo chirri deyyeho urur Kiriisto goyaka yeyyeeddo.

³⁶Yeedi Waakh atine atin kasoouummame? Ommos atin kaldaye atin sooeleele?

³⁷Chirri etoo eti Waákh íyeyyeedo ommos eti siinti Rubeyti Munyee khabo iskoogyahe, saggi waha an chiiro amuri Kamur on iyahe, a kasa.

³⁸Iꞌdaasenyi chiꞌ etoo waha ikasin, Waakh laka usu ma kaso.

³⁹Maantaka ꞌdooꞌd Kiriistokaaw, taba siinti wori Waakh lakaayyeedo weyti imoona. Toro la ꞌdooꞌdi tuummane afassi Rubeyti Munyee kaayyeedin ꞌdoono, atiranna.

⁴⁰Iꞌdaasenyi walah tuumman saggi haaggan ichoow jiti mujjume on kahaaggicha.