Read rendile 1 Koriinto 5 Bible Online

1 Koriinto 5 - rendile bible

1 Koriinto 5

¹An a atin kanaha, wihi jiro a mehe ya, etoo goytiin ka sohoꞌddarriti suujenye kaassohta leessa. Sohoꞌddarritaas la a ti ꞌdooꞌdi Waakh igaran laka koloo iyeelin. Etoo laammo ooyohiissa inokhte.

²Atin la nane a eylajjaan! Atin kootte incheenka a ooytaane ꞌdee eti waha yeelo goytiin ka rihtaan.

³Chirri an atin ileejirin laka, rubey ka a atin leejira. Ani la eta saggi us uskeel iyeele a gooche iꞌdoo an atin leejiruu.

⁴Maanti atin anto Kamureenki Yeessee ka kulantaane anna rubey ka atin leejiro, miig Kamureenki Yeessee la atin leejirto,

⁵eta suuje dahanti Seytaan gessa. Iꞌda ka etaas wihi uuriis goya kijiro uskeel imoono a labaabiicha, rubeytiis la maanti Yeessohi Kamure soonokhti a lariba.

⁶Atin a eylajjaane, wahaas la ma haaggan. Saggi chirri makaate lahaaggicho booddati makaate fuurisso too rucchul liikakhayo ꞌdee makaate tuumman weyti ifuurto weyti garattaan. Iꞌdaasu la etoo uskeel khabo, rabitohi enenyet tuumman a suujaacha.

⁷Taba saggi booddati makaate fuurisso liibahchuu, atin laka uskeel tuum goytiin kabahcha, ꞌdee ꞌdooꞌdi husub ateeha. Atin rumanka a iꞌdi makaateti booddataas fuurisso ikhabin. Iꞌdi tahe Kiriistohi heleenkeenki Baasakkee a lasoorriyooche.

⁸Maantaka chirri inno Daawta Baasakka gello, uus innohi uskeel ichoow suujoon khabno gelin giꞌde. Iꞌdaakka inno a iꞌdi makaateti boodda fuurisse nateeh. Taba giꞌde ꞌdooꞌd Kiriisto rumanka ateeha, toro la ꞌdooꞌdi yeedi rummaat on cheeko ateeha. Iꞌdaakka atin a iꞌdi makaateti ifuurin.

⁹Khadaabeeyki oraate an atin isoochiire ka, ꞌdooꞌdi sohoꞌddarri kaassohti kaseeha atin iidah.

¹⁰Iꞌdaasenyi an wori ꞌdooꞌdi harratane sohoꞌddarri kaassohti ommos ꞌdooꞌdi ꞌdamaame ommos ki enenyet kakharaawo ommos ki iyookkoyyohi waakkhakh lakayeessi wahti mee woriis kaayyeedo. Iꞌdaas ka harrata dakkhane katabtaan.

¹¹Iꞌdaasenyi khadaabi an soochiire ka, ꞌdooꞌdi an soomiinsade a ki, Kiriisto rummeesde isyadeehe, iꞌdaasenyi sohoꞌddarri kaassohti, ꞌdamaamenye ommos iyookkoyyohi waakkhakh lakayeessi wahti ommos ꞌdooꞌdi addan hanti ommos meleefeenye, ommos enenyet kakharaawo. ꞌDooꞌdi iꞌdee aleegolossanna laka.

¹²Rumanka, hili ꞌdooꞌdi urur Kiriisto ieheynan lahukkumo keey mee. Iꞌdaasenyi hili ꞌdooꞌdi urur Kiriisteenye uskeeli iꞌdee kijiro lahukkumo atine atin fuula.

¹³Waakh rubeytiissa ꞌdooꞌdi urur Kiriisto ieheynan hukkuma. Iꞌdaasenyi iꞌdi Chiirnaanneti Waakh kachiiran u, “Eti uskeel kijiro, goytiin kabahcha.”[9]