Read rendile 1 Koriinto 6 Bible Online

1 Koriinto 6 - rendile bible

1 Koriinto 6

¹Chirri etiinkoo etoo addane Kiriisto rummeeste iswaayeen, ma uryaawtaan a chaꞌatin holaas ꞌdooꞌd Kiriisto menye kootiinhi ꞌdooꞌdi Waakh igaran igeessaane lahukkumo?

²Saggi ꞌdooꞌdi Waakh berri ꞌdooꞌdi harrata ihukkumo ma garattaan a? Chaꞌatin ꞌdooꞌdi harrata berri hukkuntaan, wahaar rurrucchule goytiin kasoobabbaho ma tabuuꞌdiin a?

³Saggi berri inno herti Waakh laka ihukkunno ma garattaan a? Geeddoo meheenye wahanyeyyohaar rurrucchule jirota miinsan igoossaan?

⁴Chiꞌ wihi iꞌdee goytiin kasoobaheen a iꞌdohe toro kootiinhi ꞌdooꞌdi urur Kiriisto ka iꞌdaaru laka liinkaanyitin ikageessaan?

⁵An iꞌdane elda ꞌdee lakhaanyo atin kadowa. Rumanka goytiin ka etoo kaldaye khareenye ꞌdooꞌdi Kiriisto rummeeste goyaka yeedi iꞌdaase goocho ma jiro?

⁶Iꞌdaasenyi wahaas ma yeessaane, etoo Kiriisto rummeeste iche koo addan kootiin geecha lahukkuma, toro la ꞌdooꞌdi Kiriisto irummeysan igeecha.

⁷Atinhi kootiin irattaan waha mehe tusaan ya, atinhi urur Kiriistee, wihi Waakh atin kaꞌdoono raahin a agaafatteen. Atinhi atin liikhufo menya deefto? Atinhi etoo atin ekkeesti menya deefto?

⁸Iꞌdaasenyi atin rubeytiinna ꞌdooꞌdi Kiriisto rummeeste ekkeysattaane toro ikhuftaan.

⁹Saggi eti uskeel leh dakhi Waakh igelin ma garattaan a? Iisekkeysanna ꞌdooꞌdi isidisanne isleeurꞌdo ichoow ki iyookkoyyohi waakkhakh lakayeessi wahti ichoow eti makhaabassi tiis ieheynan leeurꞌdo ommos mejeli mejel leeurꞌdo,

¹⁰ommos eti hatto leh ommos ki ꞌdamaame ommos eti meleefee ommos eti enenyet hanti ommos eti enenyet kakharaawo tuumman koo kaldaye dakhi Waakh gelo laka ma jiro.

¹¹Gaasiinkoo orey jiroti iꞌdaasenye jire. Iꞌdaasenyi toolla Waakh uskeeliin a dikhe, atin munyaache. Toro la ꞌdooꞌdi fiffissan atin iekkaache. Waha dakkhan a jeenteti wihi Yeesso Kiriistohi Kamure ichoow Rubeyti Waakkheen atin iyeeleen.

¹²Mehe leessa ya, “Wihi an yeelin ꞌdoono walah ikajeycho mele.” Iꞌdaasenyi walah tuumman mee atin iroon. Toro la “Wihi an yeelin ꞌdoono walah ikajeycho mele,” iche leessa. Iꞌdaasenyi walah idakhti mele.

¹³Mehe leessa ya, “Golol uure liiyeele, uur la golole liiyeele.” Iꞌdaasenyi Waakh lammacho ba a baabiicha. Toro la sarti enenyet sohoꞌddarri mee liiyeele, iꞌdaasenyi hili Waakhe liiyeele. Kamur la usu sarteen lagta.

¹⁴Waakh la sarteen laka omoot a kasookahcha saggi goorat us miigtiis ka Kamureen omoot ikasookahchuu.

¹⁵Atin saggi sartiin miili sar Kiriisto itahe ma garattaan a? An sar Kiriisto a khaata ichoow sarti malaaya ba too kalday kayeela? Waakh meesseen bujiiy!

¹⁶Atin saggi eti malaaya leeurꞌde usu ichoow malaayataas ba wohoo kalday iyateehiin ma garattaan a? A mehe saggi Chiirnaanneti Waakh liikachiiruu, “Lammacho ba sartoo kaldaye yateehiin.”[10]

¹⁷Iꞌdaasenyi eti tuummane usu ichoow Kamur ba wohoo kalday yateeh, usu ichoow Kamur ba rubey ka a koo kalday.

¹⁸Taba, sohoꞌddarri kafirda. Uskeeli addane enenyet yeelo tuumman, koo sar uskulaacho mele. Iꞌdaasenyi eti sohoꞌddarri kaassohti sartiissa uskulaacha.

¹⁹Atin saggi sartiin iꞌdi minki Rubeyti Munyeenye Waakh atin siiche goya fiddiito itahe ma garattaan a? Atin kiin menye, atin a ki Waakh alah.

²⁰A mehe Waakh wihi buurenye gute atin gatte. Maantaka ebba sartiis ka Waakh a inkaanyito.